ޕީޕީއެމް، ޕީއެންސީގެ ޖޮއިންޓް ސެނެޓުގެ ވަޓްސްއެޕް ގްރޫޕްގެ ޗެޓްލޮގެއް ކަމަށް ބުނެ ދައުރުވަނީ ފޭކެއް ކަމަށް ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން، ވިދާޅުވީ ޗެޓް ލޮގެއް ދައުރުވަމުން ދަނިކޮށެވެ. ހަދާފައިވާ ކަމަށް ބުނާ އެ ޗެޓް ލޮގުން ފެންނަ ގޮތުގައި އެއީ ޕީޕީއެމް، ޕީއެންސީގެ ސެނެޓުގެ ގްރޫޕްގައި ރައީސް ޔާމީންގެ އަނބިކަނބަލުން ފާތިމަތު އިބްރާހިމް (މެޑަމް ފާތުން) އާއި ޝިޔާމް ގެ އިތުރުން ރައްޔިތުން މަޖިލީހުގެ މަހިބަދޫ ދާއިރާގެ މެންބަރު އަހުމަދު ތޯރިގު ވާހަކަ ދައްކަވާފައިވާ ޗެޓް ލޮގެކެވެ.
އެ ޗެޓް ލޮގުގައި މެޑަމް ވިދާޅުވެފައި ވަނީ ރިޔާސީ ޓިކެޓު ހޯދުމަށް ސިހުރު ހެދިކަން ގަބޫލުކުރެވޭ ކަމަށާއި މިހާ ވަގުތު ކުޑަތަންވެފައި ވަނިކޮށް މުއިއްޒަށް ތާއީދު ނުކުރަން ރައީސް ޔާމީން ދެންމެ ނިންމަވައިފި ކަމަށެވެ. އެކަމާ ގުޅިގެން އެ ޗެޓުލޮގުން ފެންނަ ގޮތުގައި ޝިޔާމް ވަނީ ރައީސް ޔާމީންގެ ނިންމުން ރަނގަޅު ނޫންކަމަށާއި ޔޯލަ ވާހަކައަކަށް ބިނާކޮށް މިވަރުގެ ނިންމުމެއް ނިންމުން ރަނގަޅު ނޫން ކަމަށް ވިދާޅުވެފައެވެ. އަދި ޓިކެޓް ހޯދުމަށް މުއިއްޒު ސިހުރު ހެއްދެވި ކަމުގެ އެއްވެސް ހެތްކެއް ނެތްކަމަށް ޝިޔާމް ވިދާޅުވިއެވެ.
ޝިޔާމަށް ރައްދުދެއްވީ ތޯރިގު ވިދާޅުވީ ޔޯލަ ވާހަކައަކަށް ރައީސް ޔާމީން އެފަދަ ނިންމެވުމެއް ނުނިންމަވާނެ ކަމަށާއި އޭނާ ހުންނެވީ ރައީސް ޔާމީންގެ ނިންމެވުމާ އެއްގޮތަށް ކަމަށެވެ. އެއަށްފަހު މެޑަމް ފާތުން ވަނީ އެއީ ޔޯލަ ވާހަކައެއް ނޫންކަމާއި މާލޭގައި އިންދި ކަދުރު ރުއްތަކާ ގުޅިގެން ހިނގި ކަންކަމަށް ބަލާއިރު ސިހުރު ހެދިކަމުގެ ހެކި އެބަހުރި ކަމަށް ވިދާޅުވެފައެވެ. އަދި ވަކީލުން މެދުވެރިކޮށް އެކަން ރައީސް ޔާމީން ހާމަކުރައްވާނެ ކަމަށް މެޑަމް ފާތުން ވިދާޅުވެފައިވެއެވެ.
އެކަން ދޮގުކުރައްވާ ޝިޔާމް ވިދާޅުވީ ހަމަ ރަނގަޅަށްވެސް ރައީސް އިބްރާހިމް މުހައްމަދު ސޯލިހު ގޮތް ހުސްވެވަޑައިގެންފި ކަމަށާއި ކެންޕެއިން ކުރައްވަން އެނގިވަޑައިނުގަންނަވާތާ، އެންޓި ކެންޕެއިން ކުރައްވަންވެސް އެނގިވަޑައިނުގަންނަވާ ކަމަށެވެ. އަދި މެޑަމް ފާތުންނަކީ ޕީޕީއެމް،ޕީއެންސީ ޖޮއިންޓު ސެނެޓު މެންބަރެއްވެސް ނޫން ކަމަށާއި އެހެން ކަމުން އެ ގުރޫޕްގައި ނީންނާނެ ކަމަށް ޝިޔާމް ވިދާޅުވިއެވެ.
ޝިޔާމް ވިދާޅުވީ ސްކުރީން ޝޮޓު ޑިޒައިން ކުރި ފަރާތައް އެކަން ނޭންގުމުން އަތަށް ގޮވާފައިވާ ކަމަށެވެ.
ޝިޔާމްގެ އިތުރުން ތޯރިގުވެސް ވަނީ އެކަން ދޮގުކުރައްވާފައި އެގޮތުން ތޯރިގުވަނީ ޕީޕީއެމް، ޕީއެންސީ ސެނެޓްގެ ޗެޓްލޮގެއްކަމަށް ދައްކަން ފޭކު ޗެޓް ލޮގެއް ހަދައިގެން ފަތުރަނީ ގޮތްހުސްވެ، މާޔޫސްވެގެން ކަމަށާއި ރައްޔިތުން ތިބީގޮތް ނިންމައިގެން ކަމަށެވެ.
އެ ޗެޓުލޮގުގައި ވާގޮތުން އެ ވާހަކަތައް ދައްކާފައިވަނީ މިއަދު ހަވީރު 4:52 އިން ފެށިގެންނެވެ. އެހެންކަމަށްވާއިރު މެޑަމް ފާތުން އެ ވަގުތު ހުންނެވީ ޑރ. މުއިއްޒުގެ ކެމްޕެއިން ނިންމަވާލެއްވި ހަރަކާތުގައެވެ. އަދި އެ ޗެޓްލޮގުގައި ގްރޫޕްގައި ތިބި މީހުންގެ ނަންތައް ފެންނައިރު ފުރަތަމަވެސް ފެންނަން އިނީ މެޑަމްގެ ނަން ކަމަށްވާއިރު ގްރޫޕްގައި ތިބޭ މީހުންގެ ތެރެއިން އަބަދުވެސް ފެންނާނީ އިނގިރޭސި އަކުރުގެ ތަރުތީބުންނެވެ. އެހެންކަމުން އެއީ ހަދައިގެން ދައުރުކުރަމުންދާ ޗެޓްލޮގެއްކަން ހާމަވެއެވެ.
