ދެވަނަ އަށް އެންމެ ބޮޑު ސިޔާސީ ޕާޓީ، އަދި މިހާރު ވެރިކަމުގައި ޕީއެންސީ އާ އެކީ ކޯލިޝަނެއްގައި އޮތް ޕީޕީއެމް އުވާލަން ނިންމައިފިއެވެ.
ޕީޕީއެމް އުވާލަން ނިންމީ ޕީއެންސީގެ އޮފީހުގައި މިއަދު ބޭއްވި ސެެނެޓު ބައްދަލުވުމުގައި ބައިވެރިވި 42 ސެނެޓަރުންގެ އިއްތިފާގުންނެވެ.
ޕީޕީއެމް އުވާލުމަށް ބޭއްވި ސެނެޓު ބައްދަލުވުމުގެ ރިޔާސަތު ބެލެހެއްޓެވީ އެ ޕާޓީގެ ދެ ނައިބު ރައީސުން ކަމަށްވާ ފިޝަރީޒް މިނިސްޓަރު އަހްމަދު ޝިޔާމާއި ޑިފެންސް މިނިސްޓަރު މުހައްމަދު ޣައްސާން މައުމޫނެވެ.
ޕީޕީއެމް އުވާލަން އުޅޭ ކަމުގެ ވާހަކަތައް މީސްމީޑިއާގައި މީގެ ކުރިން ދެކެވިފައިވެއެވެ. އަދި އެ ޕާޓީ އުވާލުމާ ގުޅޭގޮތުން ނޫސްވެރިން ވެސް އެތައް ފަހަރެއް މަތިން ސުވާލުކޮށްފައިވެއެވެ.
މީގެ ކުރިން 2013 އިން 2018 އަށް ވެރިކަންކުރި ޕީޕީއެމް އުފެދުނީ އޭރުގެ ދެވަނައަށް އެންމެ ބޮޑު ޕާޓީ ޑީއާރުޕީގައި އުފެދުނު ދެބަސްވުންތަކުގައި ކުރީގެ ރައީސް މައުމޫން އަބްދުލްގައްޔޫމާއި އެމަނިކުފާނުގެ ސަޕޯޓަރުން ޑީއާރުޕީ ދޫކޮށް ދިއުމުންނެވެ. ޕީޕީއެމް ރަޖިސްޓްރީކުރީ އޮކްޓޯބަރު 27، 2011 ގައެވެ.
އެ ޕާޓީ އުފެއްދުމަށް ފަހު ބޭއްވި ޕްރައިމަރީގައި ވާދަކުރައްވައި ޕްރައިމަރީ ކާމިޔާބުކުރެއްވުމަށް ފަހު ކުރީގެ ރައީސް އަބްދުﷲ ޔާމީން ވެރިކަމަށް ވަޑައިގަތެވެ. އޭގެ ފަހުން ބޭއްވި މަޖިލީހުގެ އިންތިހާބު ވެސް ކާމިޔާބުކުރީ ޕީޕީއެމުންނެވެ.
އެކަމަކު 2016 ވަނަ އަހަރު ޔާމީނާއި މައުމޫން ދެބަސްވެ، ސިވިލް ކޯޓުގެ ތެރެއިން މައުމޫން ޕީޕީއެމުން ބޭރުކުރިއެވެ. އޭގެ ފަހުން މިދިޔަ އަހަރު ފަހަކާ ޖެހެންދެން ޕީޕީއެމްގެ ރައީސްގެ ގޮތުގައި ޔާމީން ހުންނެވުމަށް ފަހު، ރައީސް ޑރ. މުހައްމަދު މުއިއްޒު ރައީސްކަމުގެ ހުވާކުރެއްވުމުގެ ކުރިން ޕީޕީއެމުން ޔާމީން ވަކިވެވަޑައިގަތެވެ.
ޕިސް ޕިސް ޕިސް