ރާއްޖެ އާއި މޮރިޝަސްގެ ކަނޑުގެ ސަރަހައްދުން ފުށުއަރާ ބައި ކަނޑައެޅި މައްސަލައިގައި، ރައީސް އިބްރާހީމް މުހައްމަދު ސޯލިހު އަމަލުކުރެއްވީ ގާނޫނުއަސާސީ އާ ހިލާފަށް ކަމަށާއި، އެހެންކަމުން އެމަނިކުފާނު އަޒުލްކުރުމުގެ މަސައްކަތް ފަށަން ތައްޔާރުވެފައިވާ ކަމަށް، އިދިކޮޅު ޕްރޮގްރެސިވް ކޮންގްރެސް ކޯލިޝަނުން ރޭ ބުނެފިއެވެ.
އިމުގެ މައްސަލައިގައި ރާއްޖެ އާއި މޮރިޝަސްގެ ކަނޑުގެ ސަރަހައްދުން ފުށޫއަރާ ބައި ކަނޑައަޅައި އިކުއިޑިސްޓެންޓުގެ ދަށުން ބަހާލުމަށް، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން މިދިޔަ ހުކުރު ދުވަހު ވަނީ ހުކުމްކޮށްފައެވެ. އިކުއިޑިސްޓެންޓުގެ ދަށުން 200 ނޯޓިކަލް މޭލު ބަހާލުމުން، ރާއްޖެ އަށް ލިބުނީ 47،232 އަކަ ކިލޯމީޓަރެވެ. އަދި މޮރިޝަސް އަށް ލިބުނީ 45،331 އަކަ ކިލޯމީޓަރެވެ.
އެ މައްސަލައިގައި އެންމެ ބޮޑު ދައުރެއް އަދާކުރީ، އިދިކޮޅު ސިޔާސީ ފަރާތްތަކުން ބުނި ގޮތުގައި، ރައީސް އިބްރާހީމް މުހައްމަދު ސޯލިހު، މޮރިޝަސްގެ ބޮޑުވަޒީރު ޕްރަވިންދް ޔުގާނަތަށް ފޮނުއްވި ސިޓީފުޅެވެ. މިދިޔަ އަހަރު ފޮނުއްވި އެ ސިޓީފުޅުގައި ރައީސް ވަނީ، ޗާގޯސް އަކީ މޮރިޝަސްގެ ބާރުގެ ދަށުގައި އޮންނަ ތަނަކަށް ބަދަލުކުރަން އެ ގައުމާ އެއްކޮޅަށް ރާއްޖޭން ވޯޓު ދޭނެ ކަމަށް ނިންމިކަން ހާމަކުރައްވައިފައެވެ.
ނަމަވެސް، މައްސަލަ ގޯސްވީ ރައީސް އެ ނިންމުން ނިންމަވައި، ރައްޔިތުންގެ މަޖިލީހުގެ މެންބަރުންގެ ރުހުމާ ނުލާ އެ ސިޓީފުޅު ފޮނުއްވުމުންނެވެ. މި މައްސަލައިގައި ސަރުކާރާ އިދިކޮޅު ގިނަ މެންބަރުން ތަކުރާރުކޮށް ވިދާޅުވަމުން ގެންދަވަނީ ރައީސް ގާނޫނުއަސާސީ އާ ހިލާފުވެ ވަޑައިގެންފައިވާ ކަމަށެވެ. ގާނޫނުއަސާސީގެ ތިންވަނަ މާއްދާގައިވާ ގޮތުން، ރާއްޖޭގެ ސަރަހައްދަށް އެއްވެސް ބަދަލެއް ގެނެވޭނީ މަޖިލީހުގައި ތިއްބަވާ ޖުމްލަ މެންބަރުންގެ ތެރެއިން ތިންބައިކުޅަ ދެބައި މެންބަރުންގެ ވޯޓަކުން ފާސްކުރާ ގާނޫނަކުންނެވެ.
އިދިކޮޅު ކޯލިޝަނުން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް ވިދާޅުވީ، ރައީސްގެ އަމަލުފުޅުތަކުގެ ސަބަބުން، އެމަނިކުފާނުގެ ކެންޑިޑަސީ އާއި، ދައުރު ފުރިހަމަކުރެއްވޭނެ ކަމާ މެދު ސުވާލު އުފެދިފައިވާ ކަމަށެވެ. އޭނާ ވިދާޅުވީ، ރައީސް މަގާމުން ދުރުކުރުމުގެ މަސައްކަތްތައް އިދިކޮޅުން ފަށަން ތައްޔާރުވެފައިވާ ކަމަށެވެ.
"އެއީ ދިވެހި ރައްޔިތުން މިއަދު އެދެނީ އެމަނިކުފާނު އަޒުލްކުރަން، އެމަނިކުފާނަށް ވެރިކަމުގަ ހުންނަވައިގެން ކުރެއްވޭނެ ކަންތައްތަކެއް ނޫން މިހާރު އެ ކުރައްވަނީކީ، ދިވެހިރާއްޖޭގެ ރައްޔިތުންގެ ދިވެހި ގައުމުގެ ސަރަހައްދުން ބައެއް އެ ވިއްކާލިއިރު، މަސްވެރިންގެ ކަނޑު އެ ވިއްކާލީ ރޯމާ ދުވާލު،" ޝިޔާމް ވިދާޅުވިއެވެ.
ޝިޔާމްގެ ވާހަކަ އަށް އެއްޗެއް އިތުރުކުރައްވައި، ނޫސްވެރިންގެ ބައްދަލުވުން ނިންމާލެއްވުމުގެ ކުރިން، ޕީއެންސީގެ ރައީސް އަދި އިދިކޮޅު ކޯލިޝަން ވަގުތީގޮތުން ހިންގުމާ ހަވާލުވެ ހުންނެވި އަބްދުއްރަހީމް އަބްދުﷲ ވިދާޅުވީ، ރައީސް ގައުމަށާއި ގާނޫނުއަސާސީ އާ ހިލާފުވެވަޑައިގެންފައިވާ ކަމަށެވެ. އަބްދުއްރަހީމް ވިދާޅުވި ގޮތުގައި، ގާނޫނުއަސާސީ އާ ހިލާފުވުމަކީ ރައީސް ކަމުގައި ހުންނެވި ބޭފުޅެއްގެ ޝަރުތެއް އުނިވުމެވެ.
"އެހެންވީމަ އިބްރާހީމް މުހައްމަދު ސޯލިހު މާ ރަނގަޅު ދެވަނަ ގޮތެއް ހޯއްދަވަން އުޅުއްވިއްޔާ،" އަބްދުއްރަހީމް ވިދާޅުވިއެވެ.
ރައީސް މަގާމުން ދުރުކުރުމުގެ މަސައްކަތް ފަށަން ނިންމިކަން އިދިކޮޅުން ރޭ ހާމަކޮށްފައި މި ވަނީ، ރައީސްގެ އިތުރުން އެޓާނީ ޖެނެރަލް އިބްރާހީމް ރިފްއަތާއި ފޮރިން މިނިސްޓަރު އަބްދުﷲ ޝާހިދު މަގާމުތަކުން ދުރުކުރުމަށްޓަކައި އިމްޕީޗްމަންޓް މޯޝަނެއް މަޖިލީހަށް ހުށަހެޅުމަށްޓަކައި ވިސްނަމުންދާ ކަމަށް، އެމްއެންޕީން މިދިޔަ އާދީއްތަ ދުވަހު ބުނެފައި ވަނިކޮށެވެ.
އިމުގެ މައްސަލައިގައި މައްސަލަ ނިމުނު ގޮތުން، އަދި ރައީސްގެ ސިޓީފުޅާ ގުޅިގެން، ގިނަ މީހުން ދަނީ ސަރުކާރަށް އަދި ރައީސަށް ފާޑުކިއަމުންނެވެ.
