ރޯދަ މަސް ނިމި، ލަސްތަކެއް ނުވެ، އިދިކޮޅު ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ ކެމްޕެއިން ދަތުރުތައް ފަށާނެ ކަމަށް، އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިއަދު ހާމަކޮށްފިއެވެ.
އެ ކޯލިޝަންގެ ފަރާތުން ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން، އެ ކޯލިޝަން ހިންގެވުމާ ވަގުތީ ގޮތުން ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، ޔާމީނަށް ކެމްޕެއިން ކުރުމުގެ މަސައްކަތްތައް މިހާރު ވެސް ކުރިއަށްދާ ކަމަށެވެ.
މިހާރު ކުރިއަށް ދަނީ ޔާމީންގެ ކެމްޕެއިންގެ އިދާރީ މަސައްކަތްތައް ކަމަށާއި، އެއާއެކު، މެނިފެސްޓޯ އެކުލަވާލުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.
އަބްދުއްރަހީމް ވިދާޅުވި ގޮތުގައި، ޕާޓީގެ ކަންކަމުގައި ޔާމީނާ އެކު މަޝްވަރާކުރެވެމުން އެބަ ދެއެވެ. ރޯދަ މަސް ނިމުމުން މާލެ އާއި އެކި ރަށްރަށުގައި ކެމްޕެއިން ހަރަކާތްތައް ފެށޭނެ ކަމަށް ވިދާޅުވި ނަމަވެސް، ސީދާ ތާރީހެއް އޭނާ ނުދެއްވައެވެ.
"އެމަނިކުފާނު (ޔާމީން) އިރާދަކުރެއްވިއްޔާ މިނިވަންވެވަޑައިގަންނަވާއިރު އޮންނާނީ މި ގޮނޑި (ވެރިކަން) ކަށަވަރުވާ ވަރަށް ކެމްޕެއިންގެ ކަންކަން ކުރިއަށް ގެންގޮސްފަ،" އަބްދުއްރަހީމް ވިދާޅުވިއެވެ.
"ޔާމީންގެ ކެންޑިޑަސީ އަށް ހުރަހެއް އޮތް ކަމަކަށް ގަބޫލެއް ނުކުރަން"
އިލެކްޝަންސް ކޮމިޝަނާ ހަވާލާދީ އަބްދުއްރަހީމް ވިދާޅުވީ، ޔާމީންގެ ކެންޑިޑަސީ ބަލައިގަތުމުގައި އެއްވެސް ހުރަހެއް ނެތް ކަމަށެވެ. އޭނާ ވަނީ ޔާމީންގެ ނަންފުޅު ކުރިއަށް އޮތް ރިޔާސީ އިންތިހާބުގައި އޮންނާނެ ކަމަށް ވިދާޅުވާ ވިދާޅުވުން ތަކުރާރު ކުރައްވައިފައެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް ވިދާޅުވީ، އިލެކްޝަންސް ކޮމިޝަންގެ އިދާރާ އަށް ގޮސް، އިދިކޮޅު ކޯލިޝަންގެ މެދުގައި ހުރި ކަންބޮޑުވުންތައް މިއަދު ހިއްސާކޮށްފައި ވާނެ ކަމަށެވެ.
އިދިކޮޅު ކޯލިޝަނާއި އީސީގެ ބައެއް އިސްބޭފުޅުން ބައިވެރިވެވަޑައިގަތް އެ ބައްދަލުވުމާ ބެހޭ ގޮތުން ޝިޔާމް ވިދާޅުވި ގޮތުގައި، މައިގަނޑު ގޮތެއްގައި އިދިކޮޅުން ފާހަގަކޮށްފައި ވަނީ ޔާމީނަށް ކުރާ އަނިޔާ އާއި، ކޯޓުގައި ޔާމީންގެ މައްސަލަ ލަސްވުން ފަދަ މައްސަލަތަކެވެ. އިލެކްޝަންސް ކޮމިޝަންގެ ރައީސް ފުވާދު ތައުފީގް، ޔާމީންގެ ކެންޑިޑަސީ އަށް ހުރަހެއް ނެތް ކަމަށް ވިދާޅުވެފައިވާ ކަން ފާހަގަކުރައްވާފައިވީ ނަމަވެސް، އެމަނިކުފާނުގެ ކެންޑިޑަސީ އަށް ސަރުކާރުން ހުރަސް އަޅަން މަސައްކަތްކުރާ ކަމަށް ޝިޔާމް ތުހުމަތު ކުރެއްވިއެވެ.
"ރައީސް ޔާމީންގެ މައްސަލައިގައި ޕީޖީން ނެރުއްވި ބަޔާނުގައި މައްސަލަ އަވަސްކޮށްދޭން އެދިފަ، އެއީ ވެސް މިނިވަން މުއައްސަސާ އެއް، އީސީ އަކީ ވެސް މިނިވަން މުއައްސަސާ އެއް، ވަކިން ހާއްސަކޮށް ސިޔާސީ ޕާޓީތަކުގެ ބެލެނިވެރި ފަރާތް، އެހެންވެއްޖެ ކަމަށް ވަންޏާ އަޅުގަނޑު ދެކޭ ގޮތުގައި މިކަހަލަ ހުރިހާ ކަމެއްގައި އީސީން ސިޔާސީ ޕާޓީތަކުގެ ހައްގުގައި ފުރަތަމަ ތެދުވާން ޖެހޭ،" ޝިޔާމް ވިދާޅުވިއެވެ.
