މާލެ އަދި އައްޑޫގައި މިއަދު ހިންގި މާރާމާރީގައި ޕީޕީއެމް، ޕީއެންސީގެ މެންބަރަށް އަދި ސަޕޯޓަރެއްގެ އެއްވެސް ބައިވެރިވުމެއް ނެތް ކަމަށް ޕީޕީއެމްއިން ބުނެފިއެވެ.
ޕީޕީއެމް އިން މިހެން ބުނެފައިވަނީ ރައްޔިތުން މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފަށް އަދި ރައްޔިތުންގެ މަޖިލީހުގެ ފޭދޫ ދާއިރާގެ މަޖިލިސް މެންބަރު މުހައްމަދު ނިހާދަށް ބަޔަކު ހަމަލާދީފައިވާ ދަނޑިވަޅެއްގައެވެ.
ޕީޕީއެމް އިން ބުނީ، މިއަދު މާލެ އަދި އައްޑޫގައި ހިންގައިގެން އުޅޭ މާރާމާރީއާ ހަމަނުޖެހުމުގައި ޕީޕީއެމް، ޕީއެންސީގެ މެންބަރަށް އަދި ސަޕޯޓަރެއްގެ އެއްވެސް ބައިވެރިވުމެއް އޮތް ކަމަށް ބުނާ ވާހަކަ ދޮގު ކުރާ ކަމަށެވެ.
މީގެ އިތުރުން ޕީޕީއެމް، ޕީއެންސީ މެންބަރުން އަދި ސަޕޯޓަރެއްގެ އެފަދަ ކަމެއްގެ ބައިވެރިވެފައި ނުވާ ކަމުގެ ޔަގީންކަން ދޭ ކަމަށާއި އަދި އެފަދަ ކަމެއްގެ ބައިވެރި ނުވުމަށް އަންނަނީ ތަކުރާރުކޮށް، ނަސޭހަތްތެރިވާ ކަމަށް ޕީޕީއެމް އިން ބުނެއެވެ.
މައުލޫމާތު ލިބޭ ގޮތުގައި ޝަރީފަށް ހަމަލާދީފައި ވަނީ މެންހެޓަން ބިޒްނަސް ހޮޓަލުގެ ތެރޭގައެވެ. ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަ ގޮތުގައި ޝަރީފްގެ އެއް ލޯ މަތި ވަނީ ވަރަށް ބޮޑަށް ދުޅަވެފައެވެ. އަދި ނޭފަތްމަތިން ވަނީ ހަލާކުވެ، ލޭ ވެސް އައިސްފައެވެ. މައުލޫމާތު ލިބިފައިވާ ގޮތުން ނިހާދަށް ހަމަލާ ދީފައިވަނީ ވޯޓުލުމުގެ މަސައްކަތުގައި އޭނާ ހަރަކާތްތެރި ވަމުން ދަނިކޮށެވެ.
ނިހާދަށް ގުރޫޕަކުން ހަމަލާދީފައި ވަނީ ހިނގި ޒުވާބެއްގެ ތެރެއިންކަމަށް މައުލޫމާތު ލިބިފއިވާއިރު އެ ހަމަލާއާ ގުޅިގެން ލިބުނު އަނިޔާތަކަށް ފަރުވާދެމުން އަންނައިރު އޭނާއަށް ލިބުނު އަނިޔާގެ ތަފްސީލު އަދި ސާފުވެފައެއް ނުވެއެވެ.
