ހަނދު ގެނެސްދިނަސް ރައީސް އިބްރާހިމް މުހައްމަދު ސޯލިހަށް ވޯޓް ދޭނެ މީހަކު ދެން ނުވާނެ ކަމަށް މަހިބަދޫ ދާއިރާގެ މެންބަރު އަހްމަދު ތޯރިގު (ޓޮމް) ވިދާޅުވެއްޖެއެވެ.
ތޯރިގު މިފަދައިން ވިދާޅުވީ "ބިންވެރިޔާ" ސްކީމްގެ ދަށުން ސަރުކާރުން 5،000 ފަރާތަކަށް ގޯތި ދޭން ނިންމައި، އިއްޔެ ވަގުތީ ލިސްޓު އާންމު ކޮށްފައި ވާއިރު އެ ގޯތިތައް ދީފައި ވަނީ އަދި ނުހިއްކާ އޮތް ކަނޑުގެ ސަރަހައްދުން ކަމަށް ވާތީއެވެ.
ތޯރިގު ވިދާޅުވީ ދިވެހިން ގަމާރު ނޫން ކަމަށާއި އިއުލާން ކުރާ ގޯތިތައް ހުރީ ކަނޑުގައި ކަމަށެވެ. އަދި ހިކިފަސްތާކުން ރައީސް ސޯލިހު ދެއްވާނެ ގޯއްޗެއް ނޯންނާނެ ކަމަށާއި ހަނދު ދިނަސް ވޯޓުދޭނެ މީހަކު ދެނެއްނުވާނެ ކަމަށް ތޯރިގު ވިދާޅުވިއެވެ.
ވެރިކަމުގެ ދައުރު ހަމަވާކަމަށް އިޝާރާތް ކުރައްވާ ތޯރިގު ވަނީ މަރަށް ތެޅޭތަން ނޫންތަނެއް ނުފެނެން ކަމަށާއި ކާށިދޫ ކަނޑުވެސް އޮތީ ގޯތި ނުދީ ހުސްކޮށް ކަމަށް ވިދާޅުވެފައެވެ.
ބިންވެރިޔާ ސްކީމަށް ހުށަހަޅާފައިވާ ޖުމްލަ 15،164 ފޯމެއް ހުށަހަޅާފައިވާ އިރު، އެ ފޯމް ހުށަހަޅާފައި ވަނީ 23،088 މީހުންނެވެ. އޭގެތެރެއިން ޝަރުތު ހަމަވަނީ 12،794 ފޯމް ކަމަށާއި ޝަތުރު ހަމަނުވާ 2،370 ފޯމް ކަމަށް ގެދޮރުވެރިންގެ ކޮމިޓީން ބުނެއެވެ.
މި ފަހަރު ބިންވެރިޔާ ސްކީމްގެ ދަށުން 5،000 ފަރާތަކަށް ގޯތި ދޭން ނިންމާފައިވާ އިރު، އޭގެތެރޭގައި ހިމެނެނީ 10،314 މީހުންނެވެ. އެއީ މި ސްކީމަށް ފޯމް ހުށަހެޅި މިީހުންގެ ތެރެއިން ޝަރުތު ހަމަވާ މީހުންގެ 52 ޕަސެންޓް މީހުންނަށް މި ފަހަރު ގޯތި ދޭން ވަނީ ނިންމާފައެވެ. ގޯތި ދޭން ނިންމި ލިސްޓުގައި ނުހިމެނޭ ނަމަވެސް ޗަރުތު ހަމަވާ 9544 މީހުން ހިމެނޭ އިރު، އެ މީހުންނަށް ދެން ގޯތި ދޭ ބުރުގައި ފުރުސަތު ލިބޭނެ ކަމަށް ގެދޮރުވެރިންގެ ކޮމިޓީން ބުނެއެވެ.
މި ފަހަރު ގޯތި ނުލިބޭ މީހުންގެ ތެރޭގައި ވެސް ވަކިން ފޯމް ހުށަހަޅާފައިވާ ފަރާތްތައް ގިނަ ކަން ފާހަގަ ކުރަމުން އެ ކޮމިޓީން ބުނީ، އެމީހުންނަށް ޖޮއިންޓް ވެގެން ހުށަހެޅުމުގެ ފުރުސަތު އޮންނާނެ ކަމަށެވެ.
