ރައްޔިތުންގެ މަޖިލީހުގެ ޖަލްސާގެ ރިޔާސަތު ބެލެހެއްޓުމަށް މަޖިލިހުގެ ރައީސާއި ނައިބު ރައީސް އުޒުރުވެރިވެ ވަޑައިގަންނަވާ ހާލަތުގައި ރިޔާސަތު ބަލަހައްޓަވާނެ ފަސް މެންބަރުން ތެރޭގައި މަހިބަދޫ ދާއިރާގެ މެންބަރު އަހުމަދު ތޯރިގު ހިމެނިވަޑައިގަންނަވައިފިއެވެ.
އެ ފަސް މެންބަރުން ހަމަޖައްސަވާފައިވަނީ ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގެ (ހ) ގައި ވާ ގޮތުގެ މަތިންނެވެ. އެގޮތަށް ކަނޑައަޅާފައިވަނީ މަޖިލީހުގައި މެދުނުކެނޑި އެންމެ ގިނަ ދުވަހު ހިދުމަތްކޮށްދެއްވާފައިވާ ފަސް މެންބަރުންނެވެ. އަދި އެ މެންބަރުންގެ ތަރުތީބު ކަނޑައަޅާފައިވަނީ އެ ފަސް މެންބަރުންގެ ތެރެއިން މެންބަރު ކަމުގެ މުއްދަތަށް އިސްކަން ދީގެންނެވެ.
އޭގެ އިތުރުން ދެ މެންބަރެއްގެ ދޭތެރޭގައި ހަމަ ހަމަ ވެއްޖެ ނަމަ އެ ފަދަ މެންބަރެއް ތަރުތީބު ކޮށްފައިވަނީ މެންބަރުންގެ އުމުރުގެ ދޮށި ކަމަށް އިސްކަން ދީގެންނެވެ.
އެ ފަސް މެންބަރުންނަކީ:
- މީދޫ ދާއިރާގެ މެންބަރު އަހުމަދު ސިޔާމް މުހައްމަދު -19 އަހަރަށްވުރެ ގިނަ ދުވަހު މަޖިލީހަށް ހިދުމަތްކޮށްފައިވޭ
- މާމިގިލި ދާއިރާގެ މެންބަރު ގާސިމް އިބްރާހިމް - 15 އަހަރު މަޖިލީހަށް ހިދުމަތްކޮށްފައިވޭ
- އޭދަފުށީ ދާއިރާގެ މެންބަރު އަހުމަދު ސަލީމް - 15 އަހަރު މަޖިލީހަށް ހިދުމަތްކޮށްފައިވޭ
- ހަނިމާދޫ ދާއިރާގެ މެންބަރު އަބްދުލް ގަފޫރު މޫސާ - 15 އަހަރު މަޖިލީހަށް ހިދުމަތްކޮށްފައިވޭ
- މަހިބަދޫ ދާއިރާގެ މެންބަރު އަހުމަދު ތޯރިގު - 10 އަހަރު މަޖިލީހަށް ހިދުމަތްކޮށްފައިވޭ
ގަވައިދު ބުނާ ގޮތުން މި ފަސް މެންބަރުންނަށް ވެސް ރިޔާސަތު ބެލެހެއްޓޭނީ ވިދިވިދިގެން ތިިން ޖަލްސާގެ މުއްދަތަކަށެވެ. ނަމަވެސް މަޖިލީހުގެ ރައީސާއި ނައިބުގެ އިތުރުން މި ފަސް މެންބަރުންނަށް ވެސް ރިޔާސަތު ބެލެހެއްޓުމަށް ނުކުޅެދިއްޖެ ނަމަ، ދެން ރިޔާސަތު ބަލަހައްޓާނީ މަޖިލީހުގައި އެންމެ ގިނަ ދުވަސްވީ މެންބަރުންގެ ތެރެއިން އިސްކަން ދެވޭ މެންބަރެކެވެ.
