ޕީއެންސީގެ ޕާލަމެންޓްރީ ގްރޫޕްގެ ޑެޕިއުޓީ ލީޑަރު ކަމުން އިސްތިއުފާދެއްވީ އަމިއްލަ ކަންކަން ހުރިގޮތުން އެ މަސްއޫލިއްޔަތު އަދާކުރުމަށް ވަގުތުދެވެން ނެތުމުގެ ސަބަބުން ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހްމަދު ތޯރިގު (ޓޮމް) ވިދާޅުވެއްޖެއެވެ.
ޕީއެންސީގެ ޑެޕިއުޓީ ޕީޖީ ލީޑަރުގެ މަގާމުން ތޯރިގު އިސްތިއުފާދެއްވާފައި ވަނީ މިއަދުއެވެ.
ޕީއެންސީގެ ޑެޕިއުޓީ ޕީޖީ ލީޑަރުގެ މަގާމަށް ތޯރިގު އައްޔަންކޮށްފައިވަނީ އީސް ޑރ. މުހައްމަދު މުއިއްޒު، މެއި 22، ގައި އެ ޕާޓީގެ ޕީޖީ ގްރޫޕާއެކު ބޭއްވި ބައްދަލުވުމެއްގައި އެމަނިކުފާނެވެ. ޕީއެންސީގެ ޑެޕިއުޓީ ޕީޖީ ލީޑަރުންގެ ގޮތުގައި ތާރިގުގެ އިތުރުން ތިން މެންބަރުން ތިއްބަވައެެވެ.
ރައްޔިތުންގެ މަޖިލީހުގައި މެންބަރުންކަން ކުރައްވާތާ ގިނަ ދުވަސްވި މެންބަރުންގެ ތެރޭގައި ހިމެނިވަޑައިގަންނަވާ ތާރިގު މަޖިލީހުގެ މެންބަރުކަން ކުރައްވާތާ މިއީ ތިންވަނަ ދައުރެވެ. މަޖިލީހުގެ ރިޔާސަތު ބަލަހައްޓަވާ 5 މެންބަރުންގެ ތެރޭގައި ވެސް ތާރިގް ހިމެނިވަޑައިގަންނަވައެވެ.
ތޯރިގް ފިޔަވާ ދެން ޕީއެންސީ ޕީޖީގެ ޑެޕިއުޓީ ލީޑަރުންގެ ގޮތުގައި ތިއްބަވަނީ ސީނިއާ ޑެޕިއުޓީ ލީޑަރު ބާރަށު ދާއިރާގެ މެންބަރު އިބްރާހިމް ޝުޖާއު، ޑެޕިއުޓީ ލީޑަރު ހުޅުދޫ ދާއިރާގެ މެންބަރު މުހައްމަދު ޝާހިދު އަދި ޑެޕިއުޓީ ލީޑަރު ވިލިމާލެ ދާއިރާގެ މެންބަރު މުހައްމަދު އިސްމާއީލްއެވެ.
