ރާއްޖެ އާއި މޮރިޝަސްގެ ކަނޑުގެ ސަރަހައްދުން ފުށުއަރާ ބައި ކަނޑައަޅައި ބަހާލުމުގައި ރާއްޖޭގެ ކަނޑުގެ ސަރަހައްދުގެ ބައެއް ސަރުކާރުން ދޫކޮށްލި ކަމަށް ބުނާ މައްސަލާގައި އެކުލަވައިލި އިއްތިހާދުން ކުރިއަށް ގެންދާ ޕެޓިޝަނުގައި ސޮއިކުރާ ހަރަކާތް މިއަދު ހަވީރު ފެށިއްޖެއެވެ.
ޕީޕީއެމްއިން ބުނީ ރައީސުލްޖުމްހޫރިއްޔާގެ ސިއްރު ސިޓީއަކުން ރާއްޖޭގެ ކަނޑުން ބައެއް ވިއްކާލި މައްސަލައިގައި އެކަމާއި ދެކޮޅު ހެދުމުގެ ގޮތުން ދިވެހި ރައްޔިތުންގެ ފަރާތުން ކަމާ ބެހޭ ފަރާތްތަކަށް ހުށަހެޅުމަށް ތައްޔާރުކޮށްފައިވާ ޕެޓިޝަންގައި ސޮއި ކުރުމުގެ ހަރަކާތްތަކެއް މިއަދު ހަވީރު 4 އިން ފެށިގެން ދަތުރުވެރިންގެ މާރުކޭޓު ކުރިމަތިން ފެށިފައިވާ ކަމަށެވެ.
އެކަމާ ގުޅިގެން ދާދިދެންމެއަކު "ދަ ޕްރެސް" އަށް މައުލޫމާތު ދެއްވަމުން ސިޓީ ކައުންސިލްގެ ހުޅުމާލެ ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ އެ ޕެޓިޝަނަށް ވަރަށް ބޮޑު ތަރުހީބެއް ލިބިފައިވާ ކަމަށާއި އޮންލައިންކޮށް އެ ހަރަކާތް ކުރިއަށްދެމުން ގެންދާއިރުވެސް ވަރަށް ބޮޑު ތަރުހީބެއް ލިބެމުންދާ ކަމަށެވެ. އަދި މިއަދު ގިނަ އަދަދެއްގެ ރައްޔިތުންނެއް އެތަނަށް ގޮސް ސޮއިކޮށްފައިވާ ކަމަށާއި މާދަމާގެ ވަގުތެއްގައި އެކަމަށް އެކުލަވައިލި އިއްތިހާދުން ތަފްސީލް ހާމަކުރައްވާނެ ކަމަށްވެސް ޝުޖާއު ވިދާޅުވިއެވެ.
މި ޕެޓިޝަންގެ އިތުރުން މި މައްސަލައާ ގުޅިގެން މި އިއްތިހާދުން މި އަންނަ މަހުގެ 2 ވަނަ ދުވަހު ބޮޑު އެއްވުމެއްވެސް ބާއްވަން ވަނީ ނިންމާފައެވެ.
އިޓްލޮސްގައި ނިމިދިޔަ މައްސަލައަކީ މޮރިޝަސް އަށް ޗާގޯސް ލިބުނު ފަހުން ޗާގޯސް އިން 200 މޭލު އަދި ރާއްޖެއިން 200 މޭލު ކުރަހައިފި ނަމަ އެ ދެމެދު ފުށޫ އަރާ އީއީޒެޑް ދެބަޔަށް އެއްވަރުވާނޭ ހަމައަކުން ބެހުމުގެ މައްސަލައެވެ. އެ މައްސަލަ ނިމިގެން ދިޔަ ގޮތުން ރާއްޖެ އަށް ލިބުނީ 47،232 އަކަ ކިލޯމީޓަރެވެ. އަދި މޮރިޝަސް އަށް ލިބުނީ 45،331 އަކަ ކިލޯމީޓަރެވެ.
މިކަމާ ގުޅިގެން އެ އިއްތިހާދުން ބުނީ ރާއްޖެއަށް ގެއްލިގެން ދިޔައީ ރާއްޖޭގެ މަސްވެރިން ނަފާ ހޯދަމުން ދިޔަ ކަނޑުގެ ސަރަަހައްދެއް ކަމުން އެއީ ލިބުނު ވަރަށް ބޮޑު ގެއްލުމެއް ކަމަށެވެ. އަދި ރައީސް ސޯލިހް ގައުމަށް ހިޔާނާތްތެރިވެއްޖެ ކަމަށް ވެސް އެ އިއްތިހާދުން ބުނެއެވެ.
