ވ. އާރަށް ކުއްޔަށް ދޫކުރުމުގައި މަނީ ލޯންޑަރިންނާއި ރިޝްވަތު ގަބޫލުކުރުމުގެ ކުށް ސާބިތުވުމާ ގުޅިގެން، ހަ މަސް ދުވަހުގެ ތެރޭގައި 53 މިލިއަން ރުފިޔާ ދެއްކުމަށް ކުރީގެ ރައީސް އަބްދުﷲ ޔާމީންގެ މައްޗަށް ކުރި ހުކުމް ހައިކޯޓުގައި އިސްތިއުނާފުކުރިތާ ދެ މަސް ވީ އިރު ވެސް އަޑުއެހުންތައް ނުފެށޭތީ އިދިކޮޅުން ކަންބޮޑުވުން ފާޅުކޮށްފިއެވެ.
އާރަށް ކުއްޔަށް ދޫކުރުމުގެ މުއާމަލާތާ ގުޅިގެން މިދިޔަ ޑިސެމްބަރު ފަހުކޮޅު ޔާމީން 11 އަހަރަށް ޖަލަށް ލައި، ހަ މަސް ދުވަހުގެ ތެރޭގައި 53 މިލިއަން ރުފިޔާ ދައުލަތަށް ދެއްކުމަށް ވަނީ ހުކުމްކޮށްފައެވެ. ފެބްރުއަރީ މަހުގެ ފަހުކޮޅު 53 މިލިއަން ރުފިޔާ ދެއްކުމަށް ޔާމީންގެ މައްޗަށް އިއްވި ހުކުމް މާޗް މަހު 16 ގައި ހައިކޯޓުގައި އިސްތިއުނާފްކުރުމުން، އެ ކޯޓުން އެ މައްސަލަ ބަލައިގެންފައި ވަނީ އެ މަހުގެ ފަހުކޮޅެވެ.
ނަމަވެސް އެ މައްސަލައިގެ އަޑުއެހުންތައް ތާވަލުކޮށްފައެއް ނެތެވެ. އެހެންވެ ޕީއެންސީގެ ރައީސް އަދި އިދިކޮޅު ކޯލިޝަން ހިންގުމާ ވަގުތީ ގޮތުން ހަވާލުވެ ހުންނެވި އަބްދުއްރަހީމް އަބްދުﷲ އާއި، އެ ޕާޓީގެ ދެ ނައިބުން ކަމަށްވާ މާވަށު ދާއިރާގެ މެންބަރު މުހައްމަދު ސައީދާއި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވަނީ މިއަދު ހައިކޯޓަށް ވަޑައިގެންފައެވެ.
ހައިކޯޓުގެ ބޭރުގައި ނޫސްވެރިންނަށް މައުލޫމާތު ދެއްވަމުން އަބްދުއްރަހީމް ވިދާޅުވީ، ކްރިމިނަލް ކޯޓުން ކުރި ހުކުމް ހައިކޯޓުގައި އިސްތިއުނާފުކުރި މައްސަލަ ތާވަލްކުރެވޭނެ ދުވަހެއް ދަންނަވަން ނޭނގޭ ކަމަށް މީޑިއާ އޮފިޝަލް ވިދާޅުވި ކަމަށެވެ. އަބްދުއްރަހީމްގެ ކަންބޮޑުވުމަކަށްވީ ޔާމީންގެ އެއްވެސް މައްސަލައަކާ ގުޅިގެން ހައިކޯޓުގެ ރަޖިސްޓްރާ އާ ބައްދަލުކުރާނެ ފުރުސަތެއް ލިބިފައި ނެތުމެވެ.
"ރައްޔިތުންގެ ޓެކްސް ފައިސާ އިން މުސާރަ ދީފަ ރައްޔިތުންނަށް ހިދުމަތްކުރައްވަން ތިއްބަވާ ބޭފުޅުން ގާނޫނުން ވަކި ކަމެއް ލާޒިމްނުކުރާތީ އޭ ކިޔާފަ އާންމު ރައްޔިތުންގެ ބަޔަކު ނުވަތަ އެބަޔެއްގެ ހައްގު އެކުލެވިގެންވާ ބަޔަކު ކަމެއް ސާފުކޮށްލަން އައީމަ ބައްދަލުނުކުރުން އެއީ އަޅުގަނޑު ގަބޫލުކުރާ ގޮތުގަ ވަރަށް ޒިންމާދާރުކަން ކުޑަ އަމަލެއް،" އޭނާ ވިދާޅުވިއެވެ.
އަބްދުއްރަހީމް ވިދާޅުވީ، ޔާމީންގެ މައްސަލަތައް ލަސްވާތީ މައިނޯރިޓީ ލީޑަރު އަދި ޕީޕީއެމްގެ ޕާލިމަންޓްރީ ގްރޫޕްގެ ލީޑަރު އަހްމަދު ސަލީމް ރައީސް އިބްރާހީމް މުހައްމަދު ސޯލިހާ ބައްދަލުކުރައްވަން އެދިވަޑައިގެން ސިޓީ އެއް ފޮނުއްވާފައިވާ ކަމަށެވެ.
ޔާމީންގެ މައްޗަށް 53 މިލިއަން ރުފިޔާ (3.41 މިލިއަން ޑޮލަރު) ދެއްކުމަށް ކުރި ހުކުމް ހައިކޯޓުގައި އިދިކޮޅުން އިސްތިއުނާފުކުރި މައްސަލަ އެ ކޯޓުން މިދިޔަ މާޗް މަހުގެ ފަހުކޮޅު ބަލައިގެންފައިވާއިރު، ދައުލަތުން މިއަދު ވަނީ އެ ފައިސާ ހޯދުމަށް ހައިކޯޓަށް މައްސަލަ ހުށަހަޅައިފައެވެ.
އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގައި އިދިކޮޅު ކޯލިޝަންގެ ފަރާތުން ވާދަކުރައްވާ ޔާމީންގެ މައްޗަށް އާރަށުގެ މައްސަލައިގައި ކުރި ހުކުމާ ގުޅިގެން އިންތިހާބުގައި އެމަނިކުފާނަށް ވާދަކުރެއްވުމުގެ ފުރުސަތު ކުޑައެވެ. ޔާމީނަށް އޮތް ހަމައެކަނި ގޮތަކީ އެ ހުކުމް އިސްތިއުނާފު ވެގެން މިނިވަންވުމެވެ. ފުއްގިރި މައްސަލަ ސާބިތުވެއްޖެ ނަމަ އެ ހުކުމް ބާތިލްކުރަން ވެސް ޖެހޭނެއެވެ.
