ވޮލީ ކުޅެން ޝައުގުވެރިކަން ހުންނަ ކުދިންނަށް އަމާޒުކޮށްގެން އާބަންކޯއިން ކޮންމެ އަހަރަކުވެސް ހުޅުމާލޭގައި ބާއްވަމުން އަންނަ ވޮލީ ކޭމްޕް މިއަހަރު މ.މުލަކުގައި ބާއްވަން އެ ކޯޕަރޭޝަނުން ނިންމައިފިއެވެ.
ބިޔޯންޑް ހުޅުމާލޭގެ ދަށުން އެ ކޯޕަރޭޝަނުން އަންނަނީ ހުޅުމާލެއިން ބޭރުގައި ތަފާތު ގިނަ ޕްރޮޖެކްޓްތައް ހިންގުމަށް މަސައްކަތް ކުރަމުންނެވެ.
އިޖްތިމާއީގޮތުން ކައުންސިލްތަކާ ގުޅިގެން ގިނަ ހަރަކާތްތަކެއް ހިންގުމަށް ވެސް އެ ކޯޕަރޭޝަނުން ވަނީ ރާވައިފައެވެ. އެގޮތުން މުލަކުގައި ބޭއްވުމަށް ހަމަޖެހިފައިވާ ވޮލީ ކޭމްޕް "ބިޔޯންޑް ހުޅުމާލެ އާބަންކޯ ވޮލީ ބޯލް ކޭމްޕް 2023" އަކީ އެ ރަށުގެ ދެޖިންސް ކުދިންނަށް އަމާޒުކޮށްގެން ވޮލީ ބޯލް ބޭސިކް ސްކިލްސް އަދި އެޑްވާންސް ސްކިލްސް ދަސްކޮށްދިނުމާއި ކުދިންގެ މެދުގައި ވޮލީއަށް އޮންނަ ޝައުގުވެރިކަން އިތުރު ކުރުމަށްޓަކައި ހިންގާ ކޭމްޕެކެވެ.
ޖުމްލަ 50އަށްވުރެ ގިނަ ކުދިން ހިމަނައިގެން ކުރިއަށްގެންދާ މި ކޭމްޕް ކުރިއަށް ގެންދިއުމަށް ހަމަޖެހިފައިވަނީ ގްރޭޑް 7އިން ފެށިގެން 9އަކާ ދެމެދުގެ އުމުރުފުރައިގެ ކުދިންނަށެވެ. އަދި މި ކޭމްޕް ކުރިއަށް ގެންދިއުމަށް ހަމަޖެހިފައިވަނީ ފެސްޓިވަލެއްގެ ގޮތުގައި މިއަދުން ފެށިގެން ހަފްތާއެއްގެ މުއްދަތަށެވެ. މި ކޭމްޕްއަކީ އެ ރަށުގެ ކޮމިއުނިޓީ އެމްޕަވާމެންޓް ލިންކޭޖް އެންޖީއޯ، މުލަކު ސްކޫލް އަދި ކައުންސިލާ ގުޅިގެން ކުރިއަށްގެންދާ ހަރަކާތެކެވެ.
މާލެ ސަރަހައްދަށް އަމާޒުކޮށްގެން އާބަންކޯގެ ފަރާތުން ވޮލީ ކޭމްޕް ބާއްވާފައިވީ ނަމަވެސް މާލެ ސަރަހައްދުން ބޭރުގައި ވޮލީ ކޭމްޕް ބާއްވާ މިއީ ފުރަތަމަ ފަހަރެވެ. އެ ކޯޕަރޭޝަންގެ ފަރާތުން މުސްތަގުބަލުގައި ވެސް މިފަދަ ކުޅިވަރުތައް ހަރަކާތްތައް ބޭއްވުމަށް ރާވާފައިވާކަމަށް އެ ކޯޕަރޭޝަނުން ބުނެއެވެ.
