ރާއްޖޭގެ ސިޔާސީ މައިދާނުގައި އަދިވެސް "ބޮޑު ނަމަކީ" ކުރީގެ ރައީސް މުހައްމަދު ނަޝީދު ކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

އިންތި ކުރެއްވި ޓްވީޓެއްގައި ވިދާޅުވީ މި ވެރިކަން ވެސް ހިމެނޭ ގޮތުން ދައުލަތުގެ ބާރުތަކާއި ވަސީލަތްތައް ބޭނުން ކޮށްގެން ނަޝީދު ނައްތާލުމަށް މަސައްކަތް ނުކުރާ ވެރިކަމެއް ނެތް ކަމަށެވެ.

ނަޝީދުގެ ފުރާނަ ދުއްވާލުމަށް ބޮން ގޮއްވާލުމަށް ފުރުސަތު ވެސް ދީފައިވާ ކަން ފާހަގަ ކުރައްވާ އިންތި ވިދާޅުވީ ނަޝީދުގެ ނަމަކީ އަދިވެސް ސިޔާސީ މައިދާނުގެ "ބޮޑު ނަން" ކަމަށެވެ.

މިދިޔަ ޖެނުއަރީ މަހު ބޭއްވި އެމްޑީޕީ ރިޔާސީ ޕްރައިމަރީއަށް ފަހު ރައްޔިތުން މަޖިލީހުގެ ރައީސް މުހައްމަދު ނަޝީދު "ފިކުރެއްގެ ދިރުން" ގެ ނަމުގައި އެމްޑީޕީގެ ތެރެއިން އެހެން ގޮތްޕެއް ހެދުމުގެ މަސައްކަތް ދަނީ ކުރައްވަމުންނެވެ. އެކަމާ ގުޅިގެން ރައީސް ސޯލިހު ވިދާޅުވީ ރައީސް ނަޝީދަށް އެމްޑީޕީގެ ތެރެއިން ވަކި ފެކްޝަނެއް ނުހެދޭނެ ކަމަށެވެ.

ރައީސް ސޯލިހް ވިދާޅުވި ގޮތުގައި ކުރިއަށް އޮތް ރިޔާސީ އިންތިހާބަށް އެމްޑީޕީގެ ތެރެއިން ރިޔާސީ ކެންޑިޑޭޓަކު މިހާރު ކަނޑައެޅިފައި ވާއިރު ޕާޓީ އޮންނަން ވާނީ އެ ނިންމުމާ އެކީގައި ކަމަށާއި މިހާރު ކުރަން ޖެހޭނެ މަސައްކަތަކީ އެމްޑީޕީ އަށް އިލެކްޝަންސް ކާމިޔާބު ކުރުމަށްޓަކައި ކުރަން ޖެހޭ ހުރިހާ މަސައްކަތް ޕާޓީގެ ހުރިހާ މެންބަރުން ކުރުން ކަމަށެވެ.

އަންނަ ރިޔާސީ އިންތިހާބުގައި ރައީސް ނަޝީދު ތާއީދު ކުރައްވާނެ ކެންޑިޑޭޓަކު އަދި ރަސްމީކޮށް އިއުލާން ކުރައްވާފައި ނުވި ނަމަވެސް މި ފަހަކަށް އައިސް ޖުމްހޫރީ ޕާޓީގެ ލީޑަރަށް ނަޝީދުގެ ތާއީދު އޮތްކަން އަންނަނީ ފެންނަމުންނެވެ.

ހަބަރު އިމްތިޔާޒް ފަހުމީ މުހައްމަދު ނަޝީދު