ޑިމޮކްރެޓުން ކުރިއަށް އޮތްތަނުގައި މަސައްކަތްކުރާނީ ރާއްޖޭގެ ކިލަނބުވެފައިވާ ސިޔާސީ މަސްރަހު ސާފުކޮށް އެ ޕާޓީ ވަރުގަދަކުރުމަށް ކަމަށް، ޑިމޮކްރެޓުންގެ އާ ރައީސް އިމްތިޔާޒް ފަހުމީ ވިދާޅުވެއްޖެއެވެ.
ރޭ ޑިމޮކްރެޓުން ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމުގެ ރިޔާސަތާ ހަވާލުވެވަޑައިގަތުމަށް ފަހު ޕާޓީގެ ރައީސްގެ ހައިސިއްޔަތުން އާންމު މެންބަރުންނާ މުހާތަބުކުރައްވައި އިމްތިޔާޒް ވިދާޅުވީ، ވަގު ފޯމުގެ މައްސަލައިގައި އިލެކްޝަންސް ކޮމިޝަނާ އެކު އިއްޔެ ބޭއްވި ބައްދަލުވުމުގައި އެ ކޮމިޝަނުން ފާހަގަކުރި އެއް ކަމަކީ ޑިމޮކްރެޓުންނަކީ އުފެއްދުމުގައި އަދި އޭގެ ފަހުން ވެސް ސައްހަ މެމްބަޝިޕެއް ގެންގުޅޭ ޕާޓީއެއްގެ ގޮތުގައި ކަމަށެވެ.
އޭނާ ވިދާޅުވީ، އެ ޕާޓީ އަށް މެންބަރުން އިތުރުކުރުމަށް ކުރި މަސައްކަތުގައި ވެސް ސަމާލުކަން ދިން އެއް ކަމަކީ ޕާޓީއަށް ވައްދާ މެންބަރުންގެ ސައްހަކަން ކަށަވަރުކުރުމަށް ކަމަށާއި އެކަން ކާމިޔާބުކުރެވުނު ކަމަށެވެ.
"މިޔަދާ ހަމައަށް އެއްވެސް ރެކޯޑަކު އިލެކްޝަންސް ކޮމިޝަނުން ވިޔަސް އަދި އާންމު ފަރުދެއް ވިޔަސް މި ޕާޓީ އަށް ވެސް އިލެކްޝަންސް ކޮމިޝަނަށް ވެސް އަދި އެނޫން ތަނަކަށް ވެސް ތިމަންނާ ޑިމޮކްރެޓްސް އަށް ވަދެފައި މި ވަނީ ނޫނިއްޔާ މެމްބަޝިޕްގަ މި އޮތީ ތިމަންނާ އަށް އޮޅުވާލައިގެންނޭ ވަގަށޭ ބުނެ އެންމެ ފަރުދަކު ވެސް އަދި މިހާތަނަށް ޝަކުވާއެއް ހުށަހަޅާފަ ނުވާތީވެ އަޅުގަނޑު މި ޕާޓީ އާ މެދުގަ ހިތްހަމަޖެހުން މި އޮންނަނީ ފަހުރުވެރި ވަނީ،" އިމްތިޔާޒް ވިދާޅުވިއެވެ.
އިމްތިޔާޒް ވިދާޅުވީ މި ގޮތުގައި ދެމިތިބެ އާންމުންގެ އިތުބާރު އިތުރުކޮށް، ވަރުގަދަ އަދި ހަރުދަނާ ޕާޓީއެއްގެ ގޮތުގައި ޑިމޮކްރެޓުން ބިނާކުރުމަށް މަސައްކަތްކުރައްވާނެ ކަމަށެވެ.
ކޮރަޕްޝަންގެ ސަބަބުން ކިލަނބުވެފައިވާ ރާއްޖޭގެ ސިޔާސީ މަސްރަހަށް މި ވަގުތު އެންމެ ބޮޑަށް ބޭނުންވަނީ މީހުން އިތުބާރުކުރާ 'ސާފު' ޕާޓީ އެއް ކަމަށާއި، ރާއްޖޭގެ ސިޔާސީ މަސްރަހު ސާފުކުރެވޭނީ އެފަދަ ޕާޓީއަކަށް ކަމަށް އިމްތިޔާޒް ވިދާޅުވިއެވެ. އޭނާ ވިދާޅުވިގޮތުގައި ޑިމޮކްރެޓުންގެ މިސްރާބު ހުރީ އެ މަގަށެވެ.
އެގޮތުން ޑިމޮކްރެޓުން ތާއީދު ހޯދާނީ އާންމުންނަށް ޕާޓީގެ ސިޔާސަތުތައް ވިއްކައިގެން ކަމަށާއި، ފައިސާ ދީގެން ނުވަތަ ވެރިކަމާ ހަވާލުވެއްޖެ ނަމަ ނުހައްގުން ސަރުކާރުން ވަޒީފާތައް ދީގެން ނޫން ކަމުގައި އޭނާ ވިދާޅުވިއެވެ.
"މި ރާއްޖޭގެ ވެރިކަމުގެ ނިޒާމު ހަރުދަނާކޮށް މި ރާއްޖޭގަ މި އޮތް ކޮރަޕްޝަނާއި ފަސާދަ ނައްތާލުމުގެ މަގަށް މަސައްކަތްކުރާ އެ އިތުބާރު ރައްޔިތުންނަށް ދީގެން އަޅުގަނޑުމެން ތާއީދު ހޯދައިގެން އިރާދަކުރެއްވިއްޔާ މި ޕާޓީ ބޮޑު ޕާޓީއެއްގެ ގޮތުގައި ވެގެން ދާނެ،" އިމްތިޔާޒް ވިދާޅުވިއެވެ.
