އިންތިހާބުތަކަށް ސަރުކާރުން ނުފޫޒު ފޯރުވަމުންދާ ކަމަށާއި، އިންތިހާބުތައް އިންސާފުވެރިކުރުމަށް ވެފައިވާ ވައުދު ފުއްދުމަށް ސަރުކާރަށް ގޮވާލާ، ރައްޔިތުންގެ މަޖިލީހަށް މިއަދު ގަރާރެއް ހުށަހަޅައިފިއެވެ.
މަޖިލީހަށް އެ ގަރާރު ހުށަހެޅުއްވީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއެވެ.
އިމްތިޔާޒް ހުށަހެޅުއްވި ގަރާރުގައި ވިދާޅުވީ، މިނިވަންކަމާއި އިންސާފުވެރިކަމާ އެކު އިންތިހާބުތައް ބޭއްވުމަކީ ގާނޫނުއަސާސީން ލާޒިމްކުރާ ކަމެއް ކަމަށާއި، އެކަން ހިމާޔަތްކޮށް ކުރިއެރުވުމަކީ ދައުލަތުގެ މައްޗަށް އޮތް ވާޖިބެއް ކަމަށެވެ.
އެ ގަރާރުގައިވާ ގޮތުން:
- ރަސްމީ ދަތުރުފުޅުތަކާއި ކެމްޕެއިން ދަތުރުފުޅުތައް އެއްކޮށްލައްވައި ރައީސް ދަތުރުފުޅުކުރައްވާ
- ބޭނުމަކީ ދައުލަތުގެ ފައިސާ އާއި ވަސީލަތްތަކާއި މުވައްޒަފުން ބޭނުންކުރުން
ހަމަ އެއާއެކު، ސަރުކާރާއި ސަރުކާރު ކުންފުނިތަކުގައި ސިޔާސީ މަގާމުތައް އިތުރުކޮށް، އިންތިހާބުތަކަށް ނުފޫޒު ފޯރުވުމަށް އެ ތަންތަނުން ވަޒީފާ ހުށަހަޅަމުންދާ ކަމަށާއި، ސަރުކާރުން ބޭނުންވާ ކެންޑިޑޭޓަކަށް ވޯޓު ނުދީފިނަމަ ވަޒީފާގައި ދެމިނުހުރެވޭނެ ކަމަށް ބުނެ އިންޒާރު ދެމުންދާ ކަމަށް، ގަރާރުގައި ބުންޏެވެ.
އެފަދަ ކަންކަމުގެ ސަބަބުން އިންތިހާބުތަކުގެ ސައްހަކަމާއި މިނިވަންކަން ގެއްލި، އިތުބާރު ކުޑަވެއްޖެ ކަމަށާއި، ރާއްޖޭގެ ޑިމޮކްރަސީ އަށް ގެއްލުންވަމުންދާ ކަމަށް ވެސް ވެއެވެ.
އެހެންކަމުން، ސަރުކާރުން އިންތިހާބުތަކަށް ނުފޫޒު ފޯރުވުން ހުއްޓާލައި، އިންތިހާބުތައް މިނިވަންކުރުމަށް ވެފައިވާ ވައުދު ފުއްދުމަށް އިމްތިޔާޒްގެ ގަރާރުގައި ގޮވާލާފައިވެއެވެ.
އިންތިހާބުތައް އިންސާފުވެރިކުރުމަށް ގޮވާލާ މަޖިލީހަށް ގަރާރެއް ހުށަހެޅިއިރު، މީގެ ދޮޅު މަސް ކުރިން ބޭއްވި އެމްޑީޕީގެ ރިޔާސީ ޕްރައިމަރީގައި ވޯޓު އޮޅުވާލައި މަކަރު ހަދާފައިވާ ކަމަށް، އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ ފެކްޝަނުން ތުހުމަތުކުރެއެވެ. އެ ތުހުމަތުތައް އެމްޑީޕީން ވަނީ ދޮގުކޮށްފައެވެ.
