މިއަހަރުގެ ރަމަޟާންމަސް ނިމޭއިރު ބޯހިޔާވަހިކަމުގެ ބައެއް މަޝްރޫއުތައް ފެށޭނެކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
'ޕީއެސްއެމް' އަށް މައުލޫމާތު ދެމުން މިނިސްޓްރު ވިދާޅުވީ ބޯހިޔާވަހިކަމުގެ މައްސަލައަށް ހައްލެއް ގެނައުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާއްސަ އިސްކަމެއް ދެއްވާކަމެއް ކަމަށެވެ.
ޑިޒައިން އެންޑް ބިލްޑް އުސޫލުން ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިން ޔުނިޓު ތަރައްގީކޮށްދޭނެ ބަޔަކު ހޯދުމަށް ސަރުކާރުން މިދިޔަ މަހު އިއުލާންކޮށްފައިވާއިރު މިނިސްޓަރު ވިދާޅުވީ ބޯހިޔާވަހިކަމުގެ މަޝްރޫއުތައް ކުރިއަށް ގެންދިއުމަށް އަމިއްލަ ކުންފުނިތަކުންވެސް ޝައުގުވެރިކަން ފާޅުކޮށްފައި ވާ ކަމަށެވެ.
މިހާރު އިއުލާންކޮށްފައިވާ ބޯހިޔާވަހިކަމުގެ މަޝްރޫއުތަކުގެ ތެރެއިން ބައެއް މަޝްރޫއުތައް ރަމަޟާންމަސް ނިމޭއިރު ފެށޭނެކަން ހާމަކޮށް މިނިސްޓަރު ވިދާޅުވީ މިހާރު ރާއްޖޭގެ އިގްތިސާދީ ހާލަތުވެސް ރަނގަޅުވަމުން އަންނަކަމަށެވެ.
ރާއްޖޭގެ އުތުރުގައި 20،000 ހައުސިން ޔުނިޓް އަދި ދެކުނުގައި 20،000 ހައުސިން ޔުނިޓްގެ މަޝްރޫއެއް ހިންގެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވައުދުފުޅެކެވެ. ބޯހިޔާވަހިކަމާ ގުޅޭ މަސައްކަތްތަކަށް 2.5 ބިލިއަން ރުފިޔާ މިއަހަރުގެ ބަޖެޓުގައިވަނީ ހިމަނާފައިވާއިރު މީގެތެރެއިން 1 ބިލިޔަން ރުފިޔާ ހިމަނާފައި ވަނީ އުމްރާނީ މަސައްކަތްތަކަށެވެ.
