ށަވިޔަނި އަތޮޅު ނަރުދޫ ސިއްހީ މަރުކަޒުގައި އަލަށް ގާއިމުކުރި ލެބޯޓަރީގެ ހިދުމަތް ރަސްމީކޮށް މިއަދު ފަށައިފިއެވެ. ނަރުދޫގައި މި ހިދުމަތް ރަސްމީކޮށް ފައްޓަވައިދެއްވީ، ސިއްހަތާއި ޢާއިލާއާއި އިޖްތިމާއީ އެހީއާއި ބެހޭ މިނިސްޓަރު ގީލާ އަލީ އެވެ.
ނަރުދޫ ސިއްހީ މަރުކަޒުގައި ލެބޯޓަރީގެ ހިދުމަތް ފެށުމަށްޓަކައި އެރަށުގައި މިއަދު ބޭއްވި ހާއްސަ ރަސްމިއްޔާތުގައި، ހެލްތު މިނިސްޓަރުގެ އިތުރުން އެ ވުޒާރާގެ އިސްވެރިންނާއި، ނަރުދޫ ކައުންސިލްގެ މެންބަރުންނާއި، ސިއްހީ މަރުކަޒުގެ އިސްވެރިންނާއި މުވައްޒަފުން ބައިވެރިވެވަޑައިގެންނެވިއެވެ.
މި ހިދުމަތް ރަސްމީކޮށް އިފްތިތާޙު ކޮށްދެއްވުމަށްފަހު، މިނިސްޓަރު ވަނީ އަލަށް ގާއިމުކުރެވުނު ލެބޯޓަރީގެ މަސައްކަތްތައް ބައްލަވާލައްވައި، ސިއްހީ މަރުކަޒުގެ ވެރިންނާއި މުވައްޒަފުންނާ ބައްދަލުކުރައްވައި އެފަރާތްތަކުގެ މަސައްކަތްތަކާ ގުޅޭގޮތުން މަޝްވަރާ ކުރައްވާފައެވެ.
ރާއްޖޭގެ މީހުން ދިރިއުޅޭ ކޮންމެ ރަށެއްގައިވެސް ލެބޯޓަރީގެ ހިދުމަތް ފޯރުކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އެގޮތުން، މިހާތަނަށް ލެބޯޓަރީގެ ހިދުމަތް ލިބެން ނެތް 76 ރަށެއްގައި މި ހިދުމަތް ގާއިމުކުރުމުގެ މަސައްކަތް ސަރުކާރުން ބާރު ސްޕީޑުގައި ކުރިއަށްގެންދާއިރު، ނަރުދޫގައި ހުޅުވި މި ލެބޯޓަރީއަކީ މި ސަރުކާރުން އަތޮޅުތަކުގައި ހިދުމަތް ދޭންފެށި 21 ވަނަ ލެބޯޓަރީއެވެ.
އާބާދީގެ ގޮތުން ކުޑަ ނަމަވެސް، ސިއްހީ އަސާސީ ހިދުމަތްތަކަކީ ކޮންމެ ރަށެއްގެ ރައްޔިތުންނަށްވެސް ކޮންމެހެން މުހިންމު ހިދުމަތެކެވެ.
