މޯލްޑިވްސް ރިޓަޔަމަންޓް ޕެންޝަން އެޑްމިނިސްޓްރޭޝަން އޮފީސް (ޕެންޝަން އޮފީސް) އިން ސިލްސިލާކޮށް ބާއްވަމުން އަންނަ "ތްރީ ޖެނެރޭޝަން ވޯކް" (3ޖެން ވޯކް) ގެ ހަތަރުވަނަ އެޑިޝަން 17 އޮކްޓޫބަރު 2026 ވާ ހޮނިހިރު ދުވަހު ހދ. ހަނިމާދޫގައި ބޭއްވުމަށް ހަމަޖެހިއްޖެއެވެ.
މިއީ ކުޑަކުދިންނާއި، ޒުވާނުން އަދި ދޮށީ އުމުރުގެ މީހުން ހިމެނޭހެން މުޅި އާއިލާއަށް ހާއްސަކޮށްގެން ބާއްވާ ހިނގާލުމެކެވެ. މި ހަރަކާތަކީ ދުޅަހެޔޮކަމާއި މާލީ ރައްކާތެރިކަން އިތުރުކުރުމާއެކު، ފަހަށް ފައިސާ ރައްކާކުރުމާއި، އިންވެސްޓްކުރުން އަދި ރިޓަޔަމަންޓަށް ތައްޔާރުވުމުގެ މުހިންމުކަމާމެދު އާއިލާގެ ހުރިހާ މެންބަރުންގެ މެދުގައި ހޭލުންތެރިކަން އުފައްދައި، ރަނގަޅު މާލީ އާދަތަކަށް ބާރުއެޅުމުގެ މަގްސަދުގައި އަހަރަކު އެއްފަހަރު ޕެންޝަން އޮފީހުން ކުރިއަށްގެންދާ ހަރަކާތެކެވެ.
ޕެންޝަން އޮފީހުން ބުނީ "3ޖެން ވޯކް" ގެ އެންމެ ހާއްސަ އެއް ބަޔަކީ އެއް އާއިލާއެއްގެ ތިން ޖީލުގެ މެންބަރުން އެކުއެކީގައި ކުރިއަށްގެންދާ 1 ކިލޯމީޓަރުގެ ރަމްޒީ ހިނގާލުންކަމަށެވެ. މި ހިނގާލުމަކީ ހަމައެކަނި ހަށިހެޔޮކަމަށް ހާއްސަ ހަރަކާތެއް ނޫނެވެ. މިއީ މާލީ ގޮތުން ރައްކާތެރި އަދި ތަނަވަސް މުސްތަޤުބަލެއް ބިނާކުރުމަކީ ދިރިއުޅުމުގެ ވަކި މަރުޙަލާއަކަށް އެކަނި ހާއްސަ ކަމެއް ނޫންކަމާއި، އެއީ ޅައުމުރުން ފެށިގެން ދޮށީއުމުރާ ހަމައަށް ދެމިގެންދާ ދަތުރެއްކަން ރަމްޒުކޮށްދޭ ހަރަކާތެކެވެ. އަދި މުސްތަގުބަލުގެ މާލީ ރައްކާތެރިކަން ކަށަވަރުކުރުމަކީ އާއިލާގެ ކޮންމެ ޖީލެއްގެވެސް ޒިންމާއެއްކަން މި ހިނގާލުމުގެ ތެރެއިން ހަނދާންކޮށްދޭނެކަމަށް ޕެންޝަން އޮފީހުން ހާމަކޮށްފައިވެއެވެ.
މި ހިނގާލުމަށްފަހު، ހުރިހާ އުމުރުފުރައެއްގެ މީހުންނަށްވެސް ބައިވެރިވެވޭނެ ފަދަ އުފާވެރި އަދި ފޯރިގަދަ އާއިލީ ހަވީރެއް އޮންނާނެއެވެ. ޕެންޝަން އޮފީހުން ބުނީ މި ހަވީރުގެ ތެރޭގައި ކުޑަކުދިންނާއި ބޮޑެތިމީހުން ޝައުޤުވެރިވާނެ ތަފާތު ކުޅިވަރުތަކާއި، ދިވެހިންގެ ސަގާފަތާއި އާދަކާދަ ދައްކުވައިދޭ ހާއްސަ ހަރަކާތްތައް ހިމެނޭނެކަމަށެވެ. މީގެ އިތުރުން، އާންމުންނަށް މުހިންމު މައުލޫމާތުތައް ފޯރުކޮށްދޭ ސްޓޯލްތަކާއި، ފުޑް ކޯޓުގެ ހިދުމަތްވެސް ލިބެން ހުންނާނެއެވެ.
ޕެންޝަން އޮފީހުން މައުލޫމާތު ދޭ ގޮތުގައި މި ހަރަކާތުގެ މައިގަނޑު މަގްސަދަކީ އާއިލާގެ އެކި ޖީލުތަކުގެ މެދުގައި އޮންނަ ގުޅުން އިތުރަށް ބަދަހިކޮށް، އުފާވެރި މާހައުލެއްގައި އާއިލާތަކަށް އަގުހުރި ވަގުތުތަކެއް ހޭދަކުރުމުގެ ފުރުސަތު ފަހިކޮށްދިނުމެވެ. އަދި ދިރިއުޅުމުގެ ކުރިމަގަށް ވިސްނައި، ރިޓަޔަމަންޓަށް ފުރިހަމައަށް ތައްޔާރުވުމާއި ފަހަށް ރައްކާކުރުމުގެ މުހިންމު އާދަ މުޖުތަމައުގައި އަށަގެންނެވުމެވެ.
