ޗައިނާގެ އެންމެ ބޮޑު އަދި އެންމެ މަގުބޫލު ހަބަރު ސީސީޓީވީގެ "ޝިންވެން ލިއަންބޯ" ޕްރައިމް-ޓައިމް ބްރޯޑްކާސްޓުގައި، ދިވެހިރާއްޖޭގައި ހުންނަ ޗައިނާ އެމްބަސީން ބޭއްވި ޗައިނާގެ ގައުމީ ދުވަހާއި މިޑް-އޯޓަމް ފެސްޓިވަލް ފާހަގަކުރުމުގެ ރަސްމިއްޔާތު ހާއްސަ އިސްކަމެއް ދީގެން ދައްކައިފިއެވެ.
ރާއްޖޭގައި ހުންނަވާ ޗައިނާގެ ސަފީރު ކޮންގްޝިއަންހުއާ ވިދާޅުވީ، 1.4 ބިލިއަނަށްވުރެ ގިނަ މީހުން ބެލި މި ބްރޯޑްކާސްޓުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާގެ ރައީސް ޝީ ޖިންޕިންއަށާއި ޗައިނާގެ ރައްޔިތުންނަށް ފޮނުއްވި ތަހުނިޔާ ހިމެނިގެން ދިއުމަކީ ދެ ގައުމުގެ މެދުގައި އޮތް ބަދަހި ގުޅުން ރަމްޒުކޮށްދިން ކަމެއް ކަމަށެވެ.
އަދި މިއީ ޗައިނާގެ ފަތުރުވެރިންގެ މެދުގައި މަގުބޫލު މަންޒިލެއްގެ ގޮތުގައި ރާއްޖެ އިޝްތިހާރުވުމަށް ލިބުނު ވަރަށް ބޮޑު ފުރުސަތެއް ކަމަށް ވެސް ސަފީރު ފާހަގަކުރެއްވިއެވެ.
ރައީސް މުއިއްޒުގެ މެސެޖުގައި، ޗައިނާއަކީ ރާއްޖޭގެ އުމްރާނީ ތަރައްގީއާއި އިގުތިސާދީ ކުރިއެރުމުގައި މުހިންމު ދައުރެއް އަދާކުރާ ގައުމެއްކަން ފާހަގަކުރައްވައި، އެކަމަށް ޝުކުރު އަދާކުރައްވާފައިވެއެވެ.
މި ހާއްސަ ހަފްލާ ބާއްވާފައިވަނީ ޗައިނާގެ 77 ވަނަ ގައުމީ ދުވަހާއި މިޑް-އޯޓަމް ފެސްޓިވަލް ފާހަގަކުރުމުގެ ގޮތުންނެވެ. މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދާއި، ދައުލަތުގެ ވަޒީރުންނާއި އިސްވެރިން ބައިވެރިވެވަޑައިގެންނެވިއެވެ.
ސަފީރު ކޮންގްޝިއަންހުއާ ހާމަކުރެއްވި ގޮތުގައި، މި އަހަރުގެ ސެޕްޓެމްބަރު 15 އާ ހަމައަށް 280،000 އަށްވުރެ ގިނަ ޗައިނާ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. އަދި ޗައިނާގެ ގައުމީ ދުވަހުގެ ބަންދާ ދިމާކޮށް ގިނަ އަދަދެއްގެ ޗައިނާ ފަތުރުވެރިން ރާއްޖޭގައި ޗުއްޓީ ހޭދަކުރަމުންދެއެވެ.
ދެ ގައުމުގެ ސަރުކާރާއި ރައްޔިތުން ގުޅިގެން ކުރާ މަސައްކަތުން، ޗައިނާއާއި ރާއްޖޭގެ "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް" އިތުރަށް ބަދަހިވެގެންދާނެ ކަމުގެ ޔަގީންކަން އޮތް ކަމަށް ސަފީރު ވިދާޅުވިއެވެ.
މި ޕާޓްނަރޝިޕަކީ މިއަހަރުގެ ޖެނުއަރީ މަހު ރައީސް މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅުގައި ދެ ގައުމުގެ ދެމެދުގައި ގާއިމުކުރި އެއްބަސްވުމެކެވެ. ރައީސް މުއިއްޒު ވެސް ވަނީ ދެ ގައުމުގެ ދެމެދުގައި އޮތް ގުޅުން އިތުރު ހަރުފަތަކަށް ގެންދިއުމަށް ދިވެހި ސަރުކާރުން މަސައްކަތްކުރާނެ ކަމަށް ވިދާޅުވެފައެވެ.
