އައްޑޫ އެކުއެޓޯރިއަލް ހޮސްޕިޓަލް (އޭއީއެޗް) އިން މާކެޓް އަގަށްވުރެ އެތައް ގުނައެއް ބޮޑު އަގުގައި ތަކެތި ގަތުމާއި މާލީ ގަވާއިދުތަކާ ހިލާފަށް ހިންގާފައިވާ ބޮޑެތި މައްސަލަތަކެއް އޮޑިޓް ރިޕޯޓުން ހާމަވެއްޖެއެވެ.
އޮޑިޓާ ޖެނެރަލްގެ އޮފީހުން ނެރުނު އޭއީއެޗްގެ 2022، 2023 އަދި 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، އެންމެ 34،000 ރުފިޔާއަށް ގަނެވެން އޮތް ލެބޯޓަރީ ކޮންޒިއުމަބަލް (Micropipette tips) އައިޓަމެއް ވަނީ 1.76 މިލިއަން (1,765,800) ރުފިޔާއަށް ގަނެފައެވެ.
މިއީ މާކެޓް އަގަށްވުރެ 1.75 މިލިއަން ރުފިޔާ ބޮޑު އަދަދެއް ކަމަށްވާއިރު، މި މައްސަލަ މިހާރު އަންނަނީ އެންޓި-ކޮރަޕްޝަން ކޮމިޝަން (އޭސީސީ) އިން ބަލަމުންނެވެ.
މީގެއިތުރުން، ޖެނެރަލް ކޮންޒިއުމަބަލްސް ހޯދުމުގައި މާކެޓް އަގަށްވުރެ 2.08 މިލިއަން (2,083,966) ރުފިޔާ ބޮޑު އަގުގައި ތަކެތި ގަނެފައިވާކަން ވެސް ރިޕޯޓުގައި ވަނީ ފާހަގަކޮށްފައެވެ. އަދި މި މުއާމަލާތްތަކުގައި ވަކި ފަރާތަކަށް ނާޖާއިޒު ފައިދާވާ ގޮތަށް އަމަލުކޮށްފައިވާތީ، އެ މައްސަލަ ވެސް އޭސީސީއަށް ހުށަހެޅުމަށް އޮޑިޓް އޮފީހުން ވަނީ ލަފާދީފައެވެ.
ރިޕޯޓުގައި އިތުރަށް ފާހަގަކޮށްފައިވާ ގޮތުގައި، ޑައިއޯޑް ލޭޒާ ސިސްޓަމް ހޯދުމާއި ވޭން ގަތުމުގައި ފުރަތަމަ ހަވާލުކުރި ފަރާތަށް ތަކެތި ސަޕްލައި ނުކުރެވުމުން، އަލުން އިއުލާން ކުރުމެއް ނެތި 583,000 ރުފިޔާ ބޮޑުކޮށް ދެވަނަ ފަރާތަކާ ވަނީ ހަވާލުކޮށްފައެވެ. އަދި އޭސީ މަރާމާތު ކުރުމާއި ޑަޔަލިސިސް މެޝިން ހޯދުމުގެ މަސައްކަތް ކުރިއަށް ގެންގޮސްފައިވަނީ ނޭޝަނަލް ޓެންޑަރ ބޯޑުގެ ހުއްދަ ހޯދުމަކާ ނުލައެވެ.
އޭއީއެޗްގެ ކޮމްޕްލަޔަންސް އޮޑިޓް ރިޕޯޓުގައި ފާހަގަކޮށްފައިވާ މުހިންމު އިތުރު ނުކުތާތައް:
- ބޭނުން ނުކުރާ 3 ކޮޓަރިއަކަށް 165,000 ރުފިޔާ ދެއްކުން: "ހިނާއީ" ސިސްޓަމް ތަމްރީނު ދޭ ޓީމަށް ކުއްޔަށް ހިފި 3 ކޮޓަރީގެ ތެރެއިން އެއްވެސް ކޮޓަރިއެއް 3 މަސް ދުވަހު ބޭނުން ނުކުރާއިރުވެސް ކުލި ވަނީ ދައްކާފައެވެ.
- ޑިޒައިނަށް 8.2 ލައްކަ ރުފިޔާ ހަރަދުކޮށް، މަސައްކަތް ނުފެށުން: އެކްސްޓެންޝަން އިމާރާތާއި ވޭސްޓް މެނޭޖްމަންޓް ސެންޓަރުގެ ޑިޒައިން ތައްޔާރުކުރުމަށް 827,860 ރުފިޔާ ހަރަދުކުރި ނަމަވެސް އެއްވެސް އަމަލީ މަސައްކަތެއް ކުރިއަށް ނުގެންދެއެވެ.
- މުވައްޒަފެއްގެ އަމިއްލަ އެކައުންޓަށް ފައިސާ ޖަމާކޮށްގެން ހިންގުން: ރަސްމީ ރެކްރިއޭޝަން ކްލަބުގެ ބޭރުން ނަރުހުންގެ ނަމުގައި ފަންޑެއް ހަދައި، އެކި ފަރާތްތަކުން ހޯދި ފައިސާ މުވައްޒަފެއްގެ އަމިއްލަ ބޭންކް އެކައުންޓަކަށް ޖަމާކުރުން.
މީގެ އިތުރުންވެސް އޮޑިޓް ރިޕޯޓުން ހާމަވި އެހެން ކަންކަމުގެ ތެރޭގައި، ހޮސްޕިޓަލަށް ހިދުމަތް ފޯރުކޮށްދޭ ފަރާތްތަކުން ޑޮނޭޝަން ހޯދުމާއި ނަރުހުންނަށް ވަކި ފަންޑެއް ހަދައި އަމިއްލަ އެކައުންޓްތަކަށް ފައިސާ ޖަމާކޮށްގެން ހިންގާފައިވުން ހިމެނެއެވެ. އަދި ހޮސްޕިޓަލް އެކްސްޓެންޝަން އަދި ވޭސްޓް މެނޭޖްމަންޓް ޑިޒައިން ތައްޔާރުކުރުމަށް 827,860 ރުފިޔާ ހަރަދުކޮށް އަމަލީ މަސައްކަތް ނުފެށިވާއިރު، ބޭނުންނުކުރާ ކޮޓަރިތަކަށް ކުލީގެ ގޮތުގައި 165,000 ރުފިޔާ ދައްކާފައިވާކަން ވެސް ރިޕޯޓުގައި ފާހަގަކޮށްފައިވެއެވެ.
