ބަންދުކޮށްފައި ހުންނަ ފެނުގައި "ޑައިހައިޑްރޮޖަން މޮނޮކްސައިޑް" އާދަޔާ ހިލާފަށް ގިނަ އަދަދަކަށް ހިމެނޭތީ އެއީ ނުރައްކާތެރި މާއްދާއެއްގެ ގޮތުގައި ދައްކައިގެން މީސްމީޑިއާގައި ފަތުރަމުންދާ މައުލޫމާތަކީ ސައްހަ މައުލޫމާތެއް ނޫން ކަމަށާއި، އެއީ އާންމުކޮށް ބޯފެނަށް ކިޔާ ކެމިކަލް ނަން ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.
އެމްއެފްޑީއޭއިން ނެރުނު ބަޔާނެއްގައި ބުނެފައިވަނީ "ޑައިހައިޑްރޮޖަން މޮނޮކްސައިޑް" އަކީ ސައިންޓިފިކް ނުވަތަ ކެމިކަލް ނޭމިން އުސޫލުން ފެނަށް ކިޔާ ނަން ކަމަށެވެ. އެހެންކަމުން ބަންދުކުރި ފެނުގައި އެ މާއްދާ ހިމެނޭ ކަމަށް ބުނެ އާންމުންގެ މެދުގައި ނުބައި ތަސައްވުރެއް އުފެދޭ ގޮތަށް ވާހަކަ ދެއްކުމަކީ ހަގީގަތާ ހިލާފު ކަމެއް ކަމަށް އެ އޮތޯރިޓީން ވަނީ ބުނެފައެވެ.
އާމްދަނީއާއި ސިއްހަތާ ގުޅުންހުރި ކަންކަމަކީ ސަމާސާއަކަށް ހަދައިގެން ސޯޝަލް މީޑިއާގައި ދޮގު ހަބަރު ފެތުރުމަކީ ބަލައިގަނެވޭނެ ކަމެއް ނޫން ކަމަށްވެސް އެމްއެފްޑީއޭއިން ވަނީ ބުނެފައެވެ. އަދި މަޖަލަކަށް ނަމަވެސް، އާންމުންގެ މެދުގައި ސިއްހީ ބިރުވެރިކަން އުފެދޭފަދަ ދޮގު މައުލޫމާތު ނުފެތުރުމަށް އެ އޮތޯރިޓީން ވަނީ އިލްތިމާސްކޮށްފައެވެ.
ސޯޝަލް މީޑިއާ އާންމުކުރަމުންދާ މިފަދަ ބައެއް ޕޯސްޓުތަކުގައި ދުނިޔޭގެ ސިއްހަތު ޖަމިއްޔާ ނުވަތަ (ޑަބްލިއުއެޗްއޯ)ގެ ރިޕޯޓުތަކުން ރާއްޖޭގައި ބޭނުންކުރާ ތާޒާ އަދި ބޮނަކުއާ ފެން ތަކުގައި އާދަޔާ ހިލާފަށް ނުރައްކާތެރި މިންވަރަކަށް މި މާއްދާ ހުރި ކަމަށް ބުނެފައިވެއެވެ.
އަދި މި މާއްދާ ވިހަ ވުމުގެ ސަބަބުން ބޮލުގައި ރިއްސުން ނުވަތަ އެނބުރުން އަރާ ހޮނޑުލެވޭ ނަމަ ލަސްނުކޮށް 119 އަކަށް ގުޅުމަށް ވެސް ބުނެފައިވެއެވެ.
ނަމަވެސް އެމްއެފްޑީއޭ އިން ވަނީ މި ހުރިހާ ވާހަކަތަކެއް ދޮގުކޮށްފައެވެ.
