'ބިންވެރިޔާ' ސްކީމްގެ ދަށުން އުސޫލާ ހިލާފަށް އެޗްޑީސީން ގޯތި ދޫކުރި މައްސަލަ ބަލަމުންދާ ދަނޑިވަޅެއްގައި މީގެ ތިން ދުވަސްކުރިން އެޗްޑީސީން ވަގަށް ގެންދިޔަ ލެޕްޓޮޕްތަކެއް ހޯދައި މީހަކު ހައްޔަރުކޮށްފިއެވެ.
މީޑިއާ އަށް ދިން މައުލޫމާތުގައި ފުލުހުން ބުނީ، އެޗްޑީސީން ފަސް ލެޕްޓޮޕް ވަގަށް ނެގި ކަމުގެ ރިޕޯޓެއް މިއަދު ލިބުނު ކަމަށާއި މައްސަލައިގެ ތަހްގީގު ކުރިއަށްދާ ކަމަށެވެ.
އޭގެ ފަހުން ފުލުހުން ތަފްސީލު ހާމަކޮށް ބުނީ، އެޗްޑީސީން މައްސަލަ ހުށަހެޅީ ފަރުކޮޅުގައި ހުރި އެ ކުންފުނީގެ އިދާރާއިން ފަސް ލެޕްޓޮޕް މީގެ ތިން ދުވަސް ކުރިން ވަގަށް ނެގި މައްސަލައިގައި ކަމަށާއި، އެ މައްސަލައިގައި ތުހުމަތުވާ މީހާ ހުރީ މަސްތުވާތަކެތީގެ މައްސަލައެއްގައި ހައްޔަރުގައި ކަމަށެވެ.
އަދި ގެއްލުނު ލެޕްޓޮޕްތައް ހޯދާފައިވާ ކަމަށް ފުލުހުން ބުންޏެވެ.
ބިންވެރިޔާ ސްކީމްގެ ދަށުން ގޯތިލިބޭ މީހުންގެ ލިސްޓުގައި ނެތް ބަޔަކަށް ގޯތި ދޫކުރި މައްސަލައެއް ފެންމަތިވެފައި ވަނީ މިދިޔަ ބުދަ ދުވަހުގައެވެ. ފުލުހުންނާއި އޭސީސީން ވަނީ މި މައްސަލައިގެ ޖިނާއީ ތަހްގީގެއް ފަށައިފައެވެ. މައްސަލައާ ގުޅިގެން އެޗްޑީސީގެ ޗެއާމަން އަހްމަދު ނާސިފް ފިޔަވައި އެ ކުންފުނީގެ ބޯޑު މެންބަރުންނާއި ހައުސިން މިނިސްޓްރީގެ ބައެއް އޮފިޝަލުންނާއި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ވަނީ ސަސްޕެންޑުކޮށްފައެވެ.
މި މައްސަލައިގެ ތަހްގީގު ކުރިއަށް ދާ ދަނޑިވަޅުގައި ފަޒީލްގެ ކޮއްކޮ އިބްރާހީމް ފަޒުލް ރަޝީދު ވަނީ އެޗްޑީސީގެ މެނޭޖިން ޑިރެކްޓަރުގެ މަގާމުން އިސްތިއުފާ ދެއްވައިފައެވެ.
