މާލެ ރައްޔިތުންނަށް ގޯތި ދޫކުރުމަށް މިދިޔަ ސަރުކާރުން ފެއްޓި ބިންވެރިޔާ ސްކީމަށް ޝަރުތު ހަމަނުވާ ފަރާތަކަށް ހުޅުމާލެއިން ގޯތި ދިން މައްސަލައިގައި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ 15 މުވައްޒަފަކު ވަކިކޮށްފިއެވެ.
'ދަ ޕްރެސް' އަށް މައުލޫމާތު ލިބިފައިވާ ގޮތުން ޗީފް ފައިނޭންޝަލް އޮފިސަރު އަބްދުﷲ ފާއިދުގެ އިތުރުން މީޑިއާ ޑިޕާޓްމެންޓްގެ ހެޑް އަހުމަދު ޔާމީން ވެސް ހިމެނޭހެން 15 މުވައްޒަފަކު ވަކިކޮށްފައިވާއިރު މި މައްސަލައިގެ ޖިނާއީ ތަހުގީގެއް ފުލުހުން ވަނީ ފަށާފައެވެ.
އެޗްޑީސީގެ ޗެއާމަން އަހުމަދު ނާސިފް ވިދާޅުވީ ކުންފުނީގެ މައުލޫމާތު ހިއްސާކުރުމާ، މައުލޫމާތު ބޭރަށް ގެންދިޔުމުގެ ރެސްޓްރިކްޝަންތަކެއް ކަނޑައަޅާފައިވާއިރު 48 ގަޑިއިރު ތެރޭގައި އާދަޔާހިލާފު މައުލޫމާތު ބޭރަށް ދިޔުމުން އެކަންތައް ބަލަން ޖެހޭކަމަށެވެ.
ބިންވެރިޔާ ސްކީމްގެ މައްސަލަތަކެއް މިދިޔަ ބުދަ ދުވަހު ފެންމަތިވެފައިވަނީ ސޯޝަލް މީޑިއާގައި ހަސަން ކުރުސީގެ ނަމުގައި ހިންގާ އެކައުންޓަކުން އެކަމާއި ބެހޭ ލިޔުންތައް ލީކުކޮށްލުމުންނެވެ. މި މައްސަލަ ފެންމަތިވުމާއި ގުޅިގެން އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މަގާމުން އިސްތިއުފާދީފައިވާއިރު ޕްރޮސެކިޔުޓާ ޖެނެރަލް އައްބާސް ޝަރީފްގެ އެންގެވުމަކަށް އެ މައްސަލައިގެ ޖިނާއީ ތަހުގީގެއް ފުލުހުންނާއި އޭސީސީ އިން ދަނީ ހިންގަމުންނެވެ.
