އެޗްޑީސީގެ ކުރީގެ އެމްޑީ އިބްރާހިމް ފަޒުލް ރަޝީދު އެ މަގާމުގައި ހުންނަވައިގެން ކުރަން ނުޖެހޭ ކަންތައްތަކެއް ކުރައްވާފައިވާ ކަމަށް ހިތަދޫ މެދު ދާއިރާގެ މެންބަރު އަހުމަދު އަޒާން ވިދާޅުވެއްޖެއެވެ.
އެޗްޑީސީގެ އެމްޑީގެ މަގާމުން ފަޒުލް އިސްތިއުފާ ދެއްވުމާ ގުޅިގެން އަޒާން އެކްސްގައި ކުރެއްވި ޕޯސްޓެއްގައި ވިދާޅުވީ، އެ މަގާމުގައި ހުންނަވައިގެން ކުރަން ނުޖެހޭނެ ފަދަ ގިނަ ކަންކަން ފަޒުލް ކުރައްވާފައިވާ ކަމަށެވެ. ސަރުކާރު ހިއްސާވާ އެހެން ކުންފުނިތަކުގެ އިސްވެރިން ވެސް ކޮރަޕްޝަނަށް މަގުފަހިވާ ކަންކަމުން ދުރުހެލިވާން ޖެހޭނެ ކަމަށާއި ރައީސް ޑރ. މުހައްމަދު މުއިއްޒުގެ ސަރުކާރުން ކޮރަޕްޝަނަށް ފުރުސަތު ނުދެއްވާނެ ކަަމަށް އަޒާން ވިދާޅުވިއެވެ.
ފަޒުލްގެ މައްޗަށް ކުރެވޭ ތުހުމަތުތައް ފުލުހުން އަދި ކަމާ ގުޅޭ އެހެން އިދާރާތަކުން ބަލަން ޖެހޭ ކަމަށް ވެސް އޭނާ ވިދާޅުވިއެވެ.
އިއްޔެ ފަޒުލް އިސްތިއުފާ ދެއްވާފައި ވަނީ މާލެ ރައްޔިތުންނަށް ގޯތި ދޫކުރުމަށް މިދިޔަ ސަރުކާރުން ފެއްޓި ބިންވެރިޔާ ސްކީމަށް ޝަރުތު ހަމަނުވާ ފަރާތަކަށް ހުޅުމާލެއިން ގޯތި ދިން މައްސަލައާ ގުޅިގެން އޭނާގެ މައްޗަށް ތުހުމަތުކޮށް ގިނަ ބަޔަކު ފާޑުކިޔަމުން ދިޔަ ދަނޑިވަޅެއްގައެވެ. ނަމަވެސް ގޯތި ލިބިފައިވާ މީހުންގެ ތެރޭގައި، ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ސޯޝަލް މީޑިއާގައި އާންމުވެފައި ވަނިކޮށް ފުލުހުން ވަނީ ފަޒުލް ރަޝީދަށް އަދި އެއްވެސް ތުހުމަތެއް މިހާތަނަށް ނުކުރެވޭ ކަމަށް ބުނެފައެވެ.
ފަޒުލްގެ ބޭބއަށް ލިބުނު ކަމަށް ބުނާ ގޯތީގެ އިން ފާރު މިހާރު ރާނާފައިވާ އިރު، އެ ލިޔުން ދީފައި ވަނީ ކުރީ ސަރުކާރުން ކަމަށް ފުލުހުން ބުނެފައި ވެއެވެ. އަދި މިހާތަނަށް މި މައްސަލައިގައި ކުރާ ތަހުގީގުގައި 6 މީހަކާ ސުވާލުކޮށްފައިވާ ކަަމަށާއި އެމީހުންގެ ތެރޭގައި އެޗްޑީސީގެ އެއްވެސް މުވައްޒަފެއް ނުހިމެނޭ ކަމަށް ވެސް ފުލުހުން ވަނީ ބުނެފައެވެ.
މި މައްސަލަ އާ ގުޅިގެން ފަޒުލް ރަޝީދު ސަސްޕެންޑްކޮށް އަދި ބޯޑުން ވެސް، އޭނާ ވަނީ ވަކިކޮށްފައެވެ. އިއްޔެ ފަޒުލް އިސްތިއުފާ ދެއްވި އިރު އޭނާ ވަނީ އޭނާގެ މައްޗަށް ކުރާ ތުހުމަތުތަކަށް އިންކާރުކޮށްފައެވެ.
އަދި ބިންވެރިޔާ ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫން ކަމަށާއި، އެ ތުހުމަތުތަކުގެ ހަގީގަތް ވީ އެންމެ އަވަހަކަށް ރައްޔިތުންނަށް ހާމަވުމަށް އެދިވަޑައިގަންނަވާ ކަމަށް ފަޒުލް ވަނީ ވިދާޅުވެފައެވެ.
