ކ. ތިލަފުށީ ފަޅު ތެރޭގައި ގަވާއިދާ ހިލާފަށް އަޅާފައި ހުރި އުޅަނދުތައް ނަގުމަށް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން އަންގައިފިއެވެ.
އެޗްޑީސީން މިއަދު ކުރި އިއުލާނެއްގައި ބުނީ، ތިލަފުށި ފަޅު ތެރޭ ސަރަހައްދުގައި ގަވާއިދާ ހިލާފަށް އަޅާފައިވާ އުޅަނދުތައް ނަގާ އެ ސަރަހައްދު ސާފު ކުރުމުގެ މަސައްކަތް އެ ކޯޕަރޭޝަނުން ކުރަމުންދާ ކަމަށެވެ.
އެހެން ކަމުން ޗާޓުގައި ފާހަގަކޮށްފައިވާ ސަރަހައްދުގައި އަޅާފައިވާ އުޅަނދުތަކުގެ ތެރެއިން އެއްވެސް އުޅަނދެއްގެ ވެރިފަރާތް ވާނަމަ އެ ކޯޕަރޭޝަންގެ ތިލަފުށީ ޑިޕާޓްމެންޓާ ނަންބަރު (9398888) ގުޅާ މައުލޫމާތު ސާފުކޮށް، މިއަދުން ފެށިގެން 15 ދުވަހުގެ ތެރޭގައި އުޅަނދުތައް ނެގުމަށްވެސް އެޗްޑީސީން ވަނީ އެދިފައެވެ.
އަދި މި މުއްދަތުގެ ތެރޭގައި އުޅަނދު ނުނަގާނަމަ އެއީ ވެރިފަރާތުން ބޭނުން ނެތިގެން ދޫކޮށްލާފައިވާ އުޅަނދެއް ކަމުގައި ބަލާ އެ ކޯޕަޝަނުން ކަނޑައަޅާ ގޮތެއްގެ މަތިން އެ އުޅަނދުތަކާ މެދު އަމަލު ކުރާނެ ކަމަށްވެސް އެޗްޑީސީން ވަނީ ބުނެފައެވެ.
