ހިސޯރުކޮށްފައިވާ ފަލަސްތީނުގެ ބިންތަކުގައި ގަތުލުއާންމު ހިންގަމުންދާ އިޒްރޭލުގެ ވެރިންނާއި ސިފައިންގެ ޕާސްޕޯޓު މަނާކުރަން ތާއީދުކުރައްވާ ކަމަށް، ވެލިދޫ ދާއިރާގެ މެންބަރު މުހައްމަދު އައްބާސް މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖަލްސާއެއްގައި މިދިޔަ އޮގަސްޓް މަހު އައްބާސް ވަނީ އިޒްރޭލު މީހުންގެ ޕާސްޕޯޓު މަނާކުރުމާ ދެކޮޅަށް ވާހަކަ ދައްކަވައިފައެވެ. އެހެންވެ އާންމުންގެ ފާޑުކިއުން ވެސް އޭނާ އަށް އެފަހަރު އަމާޒުވިއެވެ.
އިޒްރޭލު މީހުން އެތެރެވުން މަނާކުރުމުގެ މަސައްކަތް ލަސްވާތީ އެ މަސައްކަތް އަވަސްކުރުމަށް ގޮވާލައްވައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި ގަރާރަށް ބަހުސްކުރައްވަމުން އައްބާސް ވިދާޅުވީ، ދިވެހި އިގްތިސޯދުގެ މައިބަދައަކީ ފަތުރުވެރިކަން ކަމަށާއި، އެ ސިނާއަތަށް ގެއްލުން ލިބޭ ނިންމުމެއް ނިންމަން ގަބޫލެއް ނޫން ކަމަށެވެ.
އެއާއެކު، އައްބާސް ދެން ވަނީ އޭރުގެ އިދިކޮޅުން ހިންގި 'އިންޑިއާ އައުޓް' ހަރަކާތުގެ ސަބަބުންނާއި، މި ސަރުކާރު ވެރިކަމާ ހަވާލުވިއިރު އޭރު ތިއްބެވި ޔޫތު މިނިސްޓްރީގެ ތިން ނައިބު ވަޒީރުން އިންޑިއާއަށާއި އެ ގައުމުގެ ބޮޑުވަޒީރު ނަރެންދްރާ މޯދީ އަށް ކުޑައިމީސްކުރުމުގެ ސަބަބުން ރާއްޖެއަށް އިންޑިއާގެ މާކެޓް ގެއްލި، ދެ ބިލިއަން ޑޮލަރުގެ ގެއްލުމެއް ވެފައިކަން ފާހަގަކުރައްވައިފައެވެ.
ގަރާރުގައިވާ ކަންކަމަށް ބަހުސްކުރައްވަމުން އައްބާސް ވަނީ އޭނާ ދެކެވަޑައިގަންނަވާ ގޮތް ހާމަކުރައްވައިފައެވެ.
"އަޅުގަނޑު ވެސް ތާއީދުކުރަން، އިޒްރޭލު ސަރުކާރާއި ސަރުކާރުގަ ވަޒީފާ އަދާކޮށްފަ ތިބި ބަޔަކާއި އިޒްރޭލުގެ މިލިޓަރީގެ ޕާސްޕޯޓު މަނާކުރަން، މުޅި އިޒްރޭލު ރައްޔިތުންގެ ޕާސްޕޯޓު މަނާކުރާކަށް އަޅުގަނޑު ތާއީދެއްނުކުރަން،"
މުޅި އިޒްރޭލު ރައްޔިތުންގެ ޕާސްޕޯޓު މަނާކުރަން ދެކޮޅު ސަބަބެއް ކަމަށް އައްބާސް ވިދާޅުވީ
- އިޒްރޭލުގައި ވެސް މުސްލިމުން ދިރިއުޅެމުން ދާތީ ކަމަށް
- އަދި އެ ގައުމުގެ ސަރުކާރުގެ އަމަލުތަކާ ދެކޮޅަށް އެ ގައުމުގެ ރައްޔިތުން މުޒާހަރާކުރަމުން ދާތީ ކަމަށް
އައްބާސް ގޮވާލެއްވީ، އިޒްރޭލު ޕާސްޕޯޓް މަނާކުރުމުގެ މަސައްކަތް ވީހާ ވެސް އަވަހަކަށް ނިންމައި، އެ މަސައްކަތް ރާއްޖޭގެ އިގްތިސޯދަށް ލޮޅުން ނާރާނެ ފަދަ ގޮތަކަށް ކުރުމަށެވެ.
