ހުޅުމާލޭގެ ދެވަނަ ފިޔަވަހިން އިތުރު 8 ބިން ވިއްކުމަށް ހައުސިން ޑިވަލޮޕްމަންޓް ކޯޕަރޭޭޝަން (އެޗްޑީސީ) އިން ހުޅުވާލައިފިއެވެ.

ހަމައެކަނި ދިވެހިންނަށް ގަނެވޭ ގޮތަށް، ބީލަމުގެ އުސޫލުން ދޫކުރާ މި 8 ބިމުގެ ތެރޭގައި ހިމެނެނީ ބީޗް ފްރަންޓުން ދޫކުރާ 2 ބިމަކާއި ބީޗް ސައިޑުން ދޫކުރާ 6 ބިމެކެވެ.

އެގޮތުން، ބީޗް ފްރަންޓުން ވިއްކުމަށް ހުޅުވާލާފައި ވަނީ 1708 އަކަފޫޓޫގެ ބިމަކާއި 1737 އަކަފޫޓޫގެ ބިމަކަށް ވާއިރު ބީޗް ސައިޑުން ދޫކުރަނީ 1513 އަކަފޫޓާއި 1534 އަކަފޫޓާ ދެމެދުގެ ބިންތަކެއް ކަމަށް އެޗްޑީސީން މައުލޫމާތު ދެއެވެ.

ހަމައެކަނި ދިވެހިންނަށް ކުރިމަތިލެވޭ ގޮތަށް ވިއްކަން ހުޅުވާލި މި ބިންތަކަށް، އުމުރުން 18 އަހަރުވެފައިވާ ކޮންމެ ދިވެހި ރައްޔިތަކަށް ވެސް ބީލަން ހުށަހެޅޭނެ ކަމަށް ވެއެވެ. އަދި ބީލަން ހުށަހަޅަނީ ކުންފުންޏަކުން ނަމަ، އެ ކުންފުންޏަކީ ރާއްޖޭގައި ރަޖިސްޓްރީކޮށްފައިވާ 100 ޕަސެންޓު ދިވެހިންގެ ހިއްސާ އޮންނަ ކުންފުންޏެއް ކަމުގައިވާންވާނެ ކަމަށް އެ ކޯޕަރޭޝަނުން ބުންޏެވެ.

ބީޗް ފްރަންޓް ބިންތަކުގެ ބީލަން ފެށޭ އަގަކީ 4،500 ރުފިޔާ އެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4،000 ރުފިޔާ ކަމަށް އެޗްޑީސީން ބުނެއެވެ.

ކޮންމެ ފަރާތަކަށްވެސް އެއް ބިމަށްވުރެ ގިނަ ބިން ގަތުމަށް އެދި އީއޯއައި ހުށަހެޅިދާނެކަން ފާހަގަކޮށް އެޗްޑީސީން އިތުރަށް ބުނީ، މިހާރު ވިއްކުމަށް ހުޅުވާލެވިފައިވާ ބިންތަކުގެ މައުލޫމާތު މި ކޯޕަރޭޝަންގެ އޮންލައިން ބިޑް ޕޯޓަލް މެދުވެރިކޮށް ބެލޭނެ ކަމަށެވެ. އަދި މިކަމާ ގުޅޭ އިތުރު މައުލޫމާތު ސާފުކުރުމަށް އެ ކޯޕަރޭޝަންގެ ހޮޓްލައިން ނަންބަރު 1516 އަށް ގުޅުމަށް އެޗްޑީސީން ވަނީ އެދިފައެވެ.

ހުސްވި އޮކްޓޯބަރު މަހުވެސް ހުޅުމެލެ އިން ވަނީ 16 ބިން ވިއްކަން އެޗްޑީސީން އިއުލާންކޮށްފައެވެ. ސިނާއީ (ލައިޓް އިންޑަސްޓްރިއަލް) ބޭނުމަށް ހުޅުމާލޭ ފޭސް 2އިން ބީލަމުގެ އުސޫލުން 16 ބިމެއް ވިއްކުމަށް އޭރު ހުޅުވާލާފައި ވަނީ 1515 އަކަފޫޓާއި 1538 އަކަފޫޓާ ދެމެދުގެ ބިންތަކެކެވެ. އެފަަހރުވެސް ބިންތައް ދޫކޮށްލާފައި ވަނީ ހަަމައެކަނި ދިވެހިންނަށް ގަނެވޭ ގޮތަށެވެ.

ހަބަރު ހުޅުމާލެ އެޗްޑީސީ