ހުޅުމާލެއިން ވިޔާފާރި ބޭނުމަށް ބިން ކުއްޔަށް ދޫކުރަމުން ދަނީ އެޗްޑީސީ އިން އަބަދުވެސް އަމަލުކުރަމުން އަންނަ އެކްސްޕްރެޝަން އޮފް އިންޓްރެސްޓް (އީއޯއައި) ޕްރޮސެސްގެ ތެރެއިން ކަމަށް އެ ކޯޕަރޭޝަނުން ބުނެފިއެވެ.
އިއްޔެ ރާއްޖޭގެ ބައެއް މީޑިއާތަކުން ވަނީ ހުޅުމާލެ ހުސްކޮށް އޮތް ބިންތަކެއް ނުއަގުގައި ވިއްކަން އުޅޭ ކަމަށާއި އިއުލާނު ކުރުމެއް ނެތި، ހުޅުމާލޭން ވިޔަފާރި ބޭނުމަށް ބިމާއި ދިރިއުޅުމަށް ގޯތި ވިއްކަން މަސައްކަތް ކުރަމުން އަންނަކަމަށް ރިޕޯޓް ކޮށްފައެވެ. ރާއްޖޭގެ ބައެއް ވިޔަފާރިވެރިންނާއި ހަވާލާދީ ކަމަށް ބުނެ ފަތުރަމުންދާ މި ހަބަރުތައް ދޮގުކޮށް އެޗްޑީސީ އިން ވަނީ ބަޔާނެއް ނެރެފައެވެ.
އެގޮތުން އެ ކޯޕަރޭޝަނުން ނެރުނު ބަޔާނުގައި ބުނީ ސިނާއީ ބޭނުންތަކަށް ބިން ކުއްޔަށް ދިނުމާ ގުޅޭ ގޮތުން ބައެއް މީޑިއާތަކުން ހަބަރު ގެނެސްދީފައި ވަނީ އާންމުންނަށް ކަމުގެ ހަގީގަތް އޮޅޭ ގޮތަށް ކަމަށެވެ. އަދި އެ ކޯޕަރޭޝަނުން އަބަދުވެސް އަމަލުކުރަމުން ދާ އީއޯއައި ޕްރޮސެސްގެ ތެރެއިން ހުރިހާ ވިޔަފާރިތަކަށް ފުރުސަތު ދިނުމުގެ ގޮތުން އެކަމަށް ޝައުގުވެރިކަން ފާޅުކުރާ ތަރުތީބުން ހުރިހާ ފަރާތްތަކަށްވެސް ބިން ކުއްޔަށް ދޫކުރަމުން އަންނަކަމަށެވެ.
މީގެ އިތުރުން އެޗްޑީސީ އިން ބުނީ ބިން ކުއްޔަށް ދިނުމުގައި ކަނޑައަޅާފައިވާ އަގުތަކަކީ އެ ކުންފުނީގެ ބޯޑުން ނިންމާފައިވާ އަގުތައް ކަމަށެވެ. އެހެންކަމުން ކުރިއަށް އޮތް ތަނުގައި އެޗްޑީސީގެ ހަބަރާއި މައުލޫމާތު ގެނެސްދޭއިރު އެ ކޯޕަރޭޝަނުން މައުލޫމާތު ސާފުކުރުމަށް ވަނީ އެދިފައެވެ. އަދި އެޗްޑީސީ އާއި ކަސްޓަމަރުންނާ ދެމެެދުގައި ހިނގާ ވިޔަފާރި މުއާމަލާތުގެ ތެދު މައުލޫމާތު ގެނެސްދިނުމަށް އެޗްޑީސީއިން ވަނީ އިލްތިމާސް ކޮށްފައެވެ.
