ހުޅުމާލެ ދުވާރު މަތީގައި ބަހައްޓާފައި ހުރި ތަކެތި ނެގުމުގެ މަސައްކަތް ފަށާފައިވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީ އިން މިއަދު ބުނީ ހުޅުމާލެ ހިތްފަސޭހަ ތަނަކަށް ހެދުމަށް ކުރެވޭ މަސައްކަތްތަކުގެ ތެރެއިން، ދުވާރުމަތީގައި ބަހައްޓާފައިވާ ގޮނޑި އަދި މޭޒުފަދަ ތަކެތި ނެގުމުގެ މަސައްކަތް ކަމާބެހޭ އިދާރާތަކާ ގުޅިގެން ރަސްމީކޮށް ފަށާފައިވާ ކަމަށެވެ.
އެޗްޑީސީން ބުނީ ދުވާރުމަތީގަ އާއި ހެޖު ތެރޭގައި މޭޒާ، ގޮނޑި ފަދަ ތަކެތި ބަހައްޓައިގެން ވިޔަފާރި ހިދުމަތް ދެމުން ދާތީ ގިނަ ބަޔެއްގެ ޝަކުވާ އެ ކޯޕަރޭޝަނަށް ލިބެމުންދާ ކަމަށެވެ. އަދި މީގެކުރިންވެސް ދުވާރުމަތީގައި ގޮނޑިތަކާ މޭޒުތައް ބަހައްޓާފައިވާ ފަރާތްތަކަށް އެތަކެތި ނެގުމަށް އަންގާފައިވާކަމަށް އެ ކޯޕަރޭޝަނުން ވަނީ ބުނެފައެވެ. އެހެންނަމަވެސް ހުޅުމާލޭގެ އެކި ސަރަހައްދުތަކުގައި ވިޔަފާރި ކުރާ ފަރާތްތަކުން އާއްމުންނަށް ދަތިވާ ގޮތަށް ދުވާރު މަތީ ބަހައްޓާފައިވާ ތަކެތި ނެގުމަށް އެންގި ނަމަވެސް ބައެއް ފަރާތްތަކުން އެކަން ކޮށްފައެއް ނުވެއެވެ.
ދުވާރުމަތީގައި ބަހައްޓާފައިވާ ގޮނޑި އަދި މޭޒު ނެގުމުގެ މަސައްކަތް ރަސްމީކޮށް ފަށާފައިވާއިރު މި މަހުގެ 01 ވަނަ ދުވަހު އެޗްޑީސީ އިން ވަނީ ގޮނޑިތަކާއި މޭޒުތައް މި މަހުގެ 10ވާ ހޮނިހިރު ދުވަހުގެ ކުރިން ނަގަން އަންގާފައެވެ. އަދި އެ މުއްދަތުގައި ދުވާރުމައްޗާއި ހެޖުތެރޭގައި ބަހައްޓާފައިވާ ގޮނޑިއާއި މޭޒު ނަގާފައިނުވާނަމަ، އެތަކެތި ނަގައި އެ ސަރަހައްދު ސާފުކުރުމުގެ މަސައްކަތް ކަމާ ގުޅުން ހުރި އިދާރާތަކާ ގުޅިގެން ކުރާނެކަމަށްވަނީ ބުނެފައެވެ.
އެޗްޑީސީއިން އިތުރަށް ބުނީ އެ މަސައްކަތުގެ ތެރޭގައި ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށެވެ.
