މިއަދު ރައްޔިތުން މަޖިލީހުގައި ބޭއްވި ޖަލްސާގައި މި ސަރުކާރުގެ ކެބިނެޓުގައި ތިއްބެވި ވަޒީރުންގެ ތެރެއިން 3 ވަޒީރުންނަށް ރުހުން ނުދިނީ ވަކި ބަޔަކު އަންގައިގެން ކަމަށާއި އެއީ މެންބަރުން އަމަލު ކުރަންޖެހޭ އުސޫލު ނޫން ކަމަށް ވިދާޅުވެ، ޕީޕީއެމްގެ ޕީޖީ ލީޑަރު، އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) ހޫނު ރައްދެއް ދެއްވައިފިއެވެ.
މިއަދު މަޖިލީހުގެ ޖަލްސާގައި އިދިކޮޅު އެމްޑީޕީ އާއި ޑިމޮކްރެޓްސްގެ ކޮންޓްރޯލް އޮންނަ ރައްޔިތުންގެ މަޖިލީހުން ރުހުން ނުދޭން ފާސްކުރި ވަޒީރުންނަކީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އެޓާނީ ޖެނަރަލް އަހުމަދު އުޝާމް އަދި ހައުސިން މިނިސްޓަރު ޑރ. އަލީ ހައިދަރެވެ.
މިކަމާ ގުޅިގެން މިއަދު ހަވީރު ޕީޕީއެމް އާއި ޕީއެންސީ ކޯލިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސަލީމް ވިދާޅުވީ، މަޖިލީހުން ރުހުން ނުދިން ބޭފުޅުންނަކީ އެ ދާއިރާތަކުން އެކަމަށް އެންމެ ގާބިލު ބޭފުޅުން ކަމަށެވެ. ރުހުން ނުދޭން ނިންމި ސަބަބު ވެސް އިދިކޮޅު ހާމަކޮށްފައި ނުވާ ކަން ފާހަގަ ކުރައްވަމުން ސަލީމް ވިދާޅުވީ، އޭނާ ތަކުރާރުކޮށް އިދިކޮޅުގެ މެންބަރުންނާ ވާހަކަ ދެއްކި ކަމަށެވެ.
އެގޮތުން އިދިކޮޅު މެންބަރުން ވިދާޅުވި ވާހަކަތައް ހިއްސާ ކުރައްވަމުން ސަލީމް ވިދާޅުވީ، ވަކި ސަބަބެއް ނެތް ކަމަށާއި ހަމަ ވަކި ފަރާތަކުން އެންގީތީ އެގޮތަށް ވޯޓު ދިނީ ކަމަށެވެ. ވަކި ބަޔަކު އަންގައިގެން ވަޒީރުންނަށް ރުހުން ނުދިނުމަކީ ރައްޔިތުންގެ މަޖިލީހުގެ މެންބަރުން އަމަލުކުރަން ޖެހޭ އުސޫލެއް ނޫން ކަމަށާއި މެންބަރުންނަކީ ވަކި ބައެއްގެ އެންގުމަށް އަމަލުކުރަން ޖެހޭ ބައެއް ނޫން ކަމަށް އޭނާ ވިދާޅުވިއެވެ.
މިއާއެކު ސަލީމް ވަނީ އެމްޑީޕީގެ ޕާލިމެންޓްރީ ގްރޫޕުގެ މެންބަރުންނަށް ފޯނު ކުރައްވައި އަމަލުކުރަންވާ ގޮތުގެ އިރުޝާދު ދެއްވަނީ ކުރީގެ ރައީސް އިބްރާހިމް މުހައްމަދު ސޯލިހު ކަމަށް ވިދާޅުވެފައެވެ. ވަޒީރުންނަށް ރުހުން ދޭން އެމްޑީޕީގެ ހުރިހާ މެންބަރުން ބޭނުން ވިޔަސް އެކަން އެގޮތަށް ނުކުރެއްވުނީ ރުހުން ނުދޭން އެމަނިކުފާނު އެންގެވުމުން ކަމަށް ވެސް ސަލީމް ވިދާޅުވިއެވެ.
މީގެ އިތުރުން އެމްޑީޕީގެ މެންބަރުންތަކެއް ޑިމޮކްރެޓްސްއަށް ބަދަލުވުމާ އެކު ހުރިހާ ކޮމިޓީތަކެއް އަލުން އެކުލަވާލި ކަން ފާހަގަ ކުރައްވަމުން ސަލީމް ވިދާޅުވީ، އެކަމުގެ މަޝްވަރާއަށް އެދުމުން ވެސް މަޖިލީހުގެ ރައީސް މުހައްމަދު އަސްލަމްގެ ފަރާތުން އެއްބާރުލުން ދެއްވާފައިނުވާ ކަމަށެވެ. އަދި މިދޔަ ދެ ދުވަހު ކަންތައް ވީ ގޮތުން އަސްލަމްއާ މަޝްވަރާ ކުރަން މަސައްކަތް ކުރި ކަމަށާއި އެ ފުރުސަތު ނުދިނުމުން މަޖިލިސް ހުއްޓުވަން މަޖުބޫރުވީ ކަމަށް އަސްލަމް ވިދާޅުވިއެވެ.
ވަޒީރުންނަށް ރުހުން ދިނުމަށް ތާވަލުކޮށް މަޖިލީހުގެ ދައުރުން ބޭރުން ޖަލްސާ އެއް ބާއްވަން އެންމެ ފުރަތަމަ ނިންމީ އިއްޔެ ހެނދުނެވެ. އެކަމަކު މެންދުރުފަހު 1:30 ގައި ވަޒީރުންނަށް ރުހުން ދިނުމަށް ވޯޓަށް އަހަން އޮތް ވަގުތު ސަރުކާރު މެންބަރުން ހުރަސް އެޅުމުން، ޖަލްސާ ކުރިއަށްދާ ގޮތެއް ނުވިއެވެ. އެހެންވެ ރޭ 8 ޖަހާއިރު ޖަލްސާ އަލުން ފެށި ނަމަވެސް ކުރިއަށް ނުދިޔައެވެ.
އެންމެ ފަހުން ވަޒީރުންނަށް ރުހުންދިނުން މިއަދު 1 ޖަހާއިރަށް ތާވަލުކޮށް ކުރިއަށް ގެންދިޔަ ޖަލްސާގައި ވޯޓަށް އަހައި އެ ކަން ނިންމުނީ މިއަދުއެވެ.
