ރައްޔިތުންގެ މަޖިލީހުގެ ކުރެންދޫ ދާއިރާގެ މެންބަރު އަބްދުލްޣަނީ އަބްދުލްހަކީމް އެމްޑީޕީން އިސްތިއުފާ ދެއްވައިފިއެވެ.
"ދަ ޕްރެސް" އަށް ޔަގީން ކުރެވިފައިވާ ގޮތުގައި ޣަނީ އިސްތިއުފާ ދެއްވާފައި ވަނީ ސަރުކާރު ހިންގާ މައި ޕާޓީ، ޕީއެންސީއާ ގުޅިވަޑައިގަތުމަށެވެ. އެގޮތުން މިރޭ ދަރުބާރުގޭގައި ބޭއްވުމަށް ހަމަޖެހިފައިވާ ޕީއެންސީގެ ޖަލްސާގައި އޭނާ ސޮއި ކުރައްވާކަންވެސް ވަނީ އެނގިފައެވެ.
ޣަނީގެ އިތުރުން ކޮމަންޑޫ ދާއިރާގެ މެންބަރު މުހައްމަދު ރާޝިދު (ރާޑޯ) ވެސް މިރޭ ޕީއެންސީ އަށް ސޮއި ކުރައްވާ ކަމަށް މައުލޫމާތު ލިބެއެވެ. މި ދެ ބޭފުޅުން ވެސް މަޖިލީހަށް ހޮވިވަޑައިގަތީ އެމްޑީޕީގެ ޓިކެޓުގައެވެ.
މިރޭ 8:15ގައި ބޭއްވުމަށް ހަމަޖެހިފައިވާ ޕީއެންސީގެ ޖަލްސާގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގަންނަވާނެއެވެ. މައުލޫމާތު ލިބިފައިވާ ގޮތުގައި ޕީއެންސީއަށް ގުޅިވަޑައިގަންނަވާ މެންބަރުން، ޕާޓީ މެންބާޝިޕް ފޯމް އެ ޖަލްސާގައި ރައީސް މުއިއްޒުއާ ހަވާލުކުރައްވާނެވެ.
އަދި އިތުރު އެމްޑީޕީ މެންބަރުންތަކެއްވެސް ސަރުކާރު ހިންގާ މައި ޕާޓީ، ޕީއެންސީއާ ގުޅޭނެ ކަމުގެ އަޑުވަނީ ފެތުރިފައެވެ. އޭގެ ތެރޭގައި މުލަކު ދާއިރާގެ މެންބަރު އިބްރާހިމް ނަސީރު އާއި ނިލަންދޫ ދާއިރާގެ މެންބަރު އަބްދުލްމުހުސިން ހަމީދު އާއި ފޭދޫ ދާއިރާގެ މެންބަރު މުހައްމަދު ނިހާދުގެ އިތުރުން މާފަންނު ދެކުނު ދާއިރާގެ މެންބަރު އާދަމް އަލީވެސް ހިމެނިވަޑައިގަންނަވައެވެ.
ފެތުރެމުންދާ އަޑުތަކާ ގުޅިގެން ވާހަކަ ދައްކަވަމުން މަޖިލީހުގެ މިއަދުގެ ޖަލްސާގައި އެމްޑީޕީގެ ޑެޕިއުޓީ ޕީޖީ ލީޑަރު ހުސެއިން ޝަހީމް ވަނީ ސަރުކާރުން ރިޝްވަތު ދީގެން އެ ޕާޓީގެ ބައެއް މެންބަރުން ގެންދާ ކަމަށް ތުހުމަތު ކުރައްވާފައެވެ. އަދި އެކަމާ ގުޅިގެން އެމްޑީޕީއިން ފަހަތަށް ނުޖެހޭނެ ކަމަށް ވެސް އޭނާ ވިދާޅުވެއެވެ.
ރައްޔިތުންގެ މަޖިލީހުގެ ސުޕާ މެޖޯރިޓީ އޮތް ޕާޓީ، އެމްޑީޕީގެ 56 މެންބަރުން މިވަގުތު މަޖިލީހުގައި ތިއްބިވެއިރު ސަރުކާރު ހިންގާ ޕާޓީ، ޕީޕީއެމް އާއި ޕީއެންސީ ކޯލިޝަން އަށް ނިސްބަތްވާ ތިއްބެވީ 4 މެންބަރުންނެވެ.
