އިދިކޮޅު އެމްޑީޕީގެ މަޖިލިސް މެންބަރުންގެ ގްރޫޕުގެ ޑެޕިއުޓީ ލީޑަރުކަމަށް ކެލާ ދާއިރާގެ މެންބަރު އިބްރާހީމް ޝަރީފް ހޮވިއްޖެއެވެ.
ހުސްވެފައިވާ އެމްޑީޕީގެ މަޖިލިސް މެންބަރުންގެ ގްރޫޕުގެ ޑެޕިއުޓީ ލީޑަރުކަމަށް ޝަރީފްގެ އިތުރުން ދެ ބޭފުޅަކު ކުރިމަތިލެއްވިއެވެ. އެއީ:
- މުހައްމަދު ނިހާދު - ފޭދޫ ދާއިރާގެ މެންބަރު
- ހުސައިން މުހައްމަދު ދީދީ - ފުވައްމުލަކު މެދު ދާއިރާގެ މެންބަރު
މި ދެ ބޭފުޅުންގެ ތެރެއިން ހުސައިންގެ ނަން އަނބުރާ ގެންދަވާފައި ވާތީ، އެމްޑީޕީގެ މަޖިލިސް މެންބަރުންގެ ގްރޫޕުގެ ޑެޕިއުޓީ ލީޑަރުކަމަށް ވާދަކުރެއްވީ ޝަރީފާއި ނިހާދެވެ. އެމްޑީޕީން އާންމުކުރި ނަތީޖާ އިން ދައްކާ ގޮތުން:
- ޝަރީފަށް ލިބިވަޑައިގަތީ 27 ވޯޓު
- ނިހާދަށް ލިބިވަޑައިގަތީ 23 ވޯޓު
އެމްޑީޕީގެ މަޖިލިސް ގްރޫޕްގެ ޑެޕިއުޓީ ލީޑަރުގެ މަގާމު ހުސްވީ އެ މަގާމު ފުރުއްވަމުން ގެންދެވި އަލިފުށި ދާއިރާގެ މެންބަރު މުހައްމަދު ރަޝީދު ހުސައިން، މިދިޔަ މަހުގެ 22 ވަނަ ދުވަހު އެ ގްރޫޕުގެ ލީޑަރުކަމަށް އިންތިހާބުވެވަޑައިގަތުމާ ގުޅިގެންނެވެ.
