ހދ. މަކުނުދޫގައި ގޭސް ސިލިންޑަރެއް ގޮވައި ހިނގި ހާދިސާގައި މަރުވި މީހުންގެ ހަށިގަނޑު އިންޑިއާ އަށް ފޮނުވާލައިފިއެވެ.
މިހާދިސާގައި މަރުވެފައި ވަނީ އެ ރަށުގެ އެއާޕޯޓް އެޅުމުގެ މަސައްކަތަށް ބިން ހިއްކުމުގެ މަޝްރޫއަށް ގޮސް ތިބި އިންޑިއާ ދެމީހުންނެވެ. އެއީ މުހައްމަދު ރާޖާ އަންސާރީ, 27އ، އަދި ސުދީރާ ސެތީ, 25އ، އެވެ.
ފުލުހުން ބުނީ، ދެ މީހުންގެ ހަށިގަނޑު އާއިލާއާ ހަވާލުކުރުމަށް އިންޑިއާއަށް ފޮނުވާފައި ވަނީ އިއްޔެ ކަމަށެވެ.
އެ ހާދިސާ ހިނގާފައި ވަނީ އެ ރަށުގެ އެއާޕޯޓްގެ ބިން ހިއްކުމުގެ މަސައްކަތް ކުރަން ބޭނުންވާ ސާމާނާއި އެ ރަށުގެ ނަރުދަމާ މަސައްކަތަށް ބޭނުންވާ ސާމާނު ހުންނަން ސައިޓު ސަރަހައްދުގައެވެ.
އެ ރަށު ކައުންސިލުން ބުނި ގޮތުގައި، މި ހާދިސާގައި މަރުވި މީހުންގެ ހަށިގަނޑުގެ ބައިތައް ބުރައިގެން ގޮސް، ދެ މީހުންގެ ހަށިގަނޑު އޮތީ ޗިސްޗިސް ވެފައެވެ. ކައުންސިލުން ބުނީ، ގާތްގަނޑަކަށް ހާހެއްހާ ފޫޓު ދުރުން ވެސް އެ މީހުންގެ ހަށިގަނޑުގެ ބައިތައް ފެނުނު ކަމަށެވެ.
ފުލުހުން ވަނީ މި ހާދިސާ ތަހުގީގު ކުރުމަށް ކުޅުދުއްފުށީ ފުލުހުންގެ ފޮރެންސިކް ޓީމަކާއި ތަހްގީގު ޓީމެއް މަކުނުދޫގައި ހަރަކާތްތެރި ވެފައިވާ ކަމަށް މީގެ ކުރިން ބުނެފައެވެ. ނަމަވެސް އޭގެ އިތުރު ތަފްސީލު ފުލުހުން ނުދެއެވެ.
