ހިޔާ ޓަވަރުން ވެއްޓުނު ކުއްޖާ ހޮސްޕިޓަލަށް ގެންދިއުމަށް ކާރަށް އަރުވަން ދެކޮޅު ހެދި ޓެކްސީ ޑްރައިވަރުގެ މައްސަލަ ބަލަމުންދާ ކަމަށް ފުލުހުން ބުނެފިއެވެ.
ހިޔާ ޓަވަރު 6ގެ 12 ވަނަ ފަންގިފިލާ އިން ކުއްޖަކު ވެއްޓިފައިވަނީ މިމަހު 7 ވަނަ ދުވަހުގެ 12 ޖަހަން ކައިރިވެފައި ހުއްޓާއެވެ. މައުލޫމާތު ލިބިފައިވާ ގޮތުގައި އެ ކުއްޖާ ހޮސްޕިޓަލަށް ގެންދިއުމަށްޓަކައި އެހީއަށް އެދުނު ޑެކްސީ ޑްރައިވަރު ވަނީ ލޭ އުނގުޅި ކާރު ސީޓުތައް ހަޑިވާނެ ކަމަށް ބުނެ އެކުއްޖާ އަރުވަން އިންކާރުކޮށްފައެވެ.
"ދަ ޕްރެސް" އަށް މައުލޫމާތު ދެއްވަމުން ފުލުހުން މީޑިއާ އޮފިޝަލް ވިދާޅުވީ، ހިޔާ ޓަވަރުން ވެއްޓުނު ކުއްޖާ ކާރަށް އަރުވަން ދެކޮޅު ހެދި ކަމަށް ބުނާ ޓެކްސީ ޓްރައިވަރުގެ ތަހުގީގު ކުރަމުންދާ ކަމަށެވެ.
މައުލޫމާތު ލިބިފައިވާ ގޮތުގައި އެ ހާދިސާގައި އެ ކުއްޖާގެ ބޮލަށާއި ފަޔަށް ވަރަށް ބޮޑެތި ޒަހަމުތަކެއް ވަނީ ލިބިފައެވެ.
ހިޔާ ޓަވަރުގެ 12ވަނަ ބުރިން ވެއްޓުނުއެ ކުއްޖާއަށް ލިބުނު އަނިޔާތަކުގައި މަރުވިކަން ހުޅުމާލެ ހޮސްޕިޓަލުން ކަށަވަރު ކޮށްދިނީ ވެއްޓުނުތާ ގަޑިއެއްހާއިރު ފަހުން 12:45ގައެވެ.
"ދަ ޕްރެސް" އަށް އެނގިފައިވާ ގޮތުން އެއީ ހާއްސަ އެހީއަށް ބޭނުންވާ ހއ ދިއްދުއަށް ނިސްބަތްވާ ކުއްޖެކެވެ.
