ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިން ކުށް ސާބިތުވެ ކުރީގެ ރައީސް އަބްދުﷲ ޔާމީން ޖަލަށް ލުމަށް ކޮށްފައިވާ ހުކުމުގެ އިސްތިއުނާފުގެ މައްސަލައިގެ މިއަދަށް ތާވަލް ކޮށްފައިވާ ޝަރީއަތުގެ އަޑުއެހުން ކެންސަލް ކޮށްފިއެވެ.
މިއަދު މެންދުރުފަހު 2 ޖަހާއިރަށް އެ އަޑުއެހުން ތާވަލްކޮށްފައިވާއިރު އަޑުއެހުން ކެންސަލްކޮށްފައިވަނީ ޕީޖީއިން އެދިގެން ކަމަށް ހައިކޯޓުން ވަނީ ބުނެފައެވެ.
މީގެ ކުރިންވެސް ޕީޖީގެ އެދުމުގެ މަތިން ރައީސް ޔާމީންގެ އިސްތިއުނާފްގެ ޝަރީއަަތުގެ އަޑުއެހުން ކެންސަލްކޮށްފައިވެއެވެ. އެކަމާ ގުޅިގެން ރައީސް ޔާމީންގެ ވަކީލުން ވަނީ ކަންބޮޑުވުންވެސް ފާޅުކުރައްވާފައެވެ.
ރައީސް ޔާމީންގެ އިސްތިއުނާފްގެ އަޑުއެހުމެއް އެންމެ ފަހުން ހައިކޯޓުގައި އަޑުއެހުމެއް ބާއްވާފައި ވަނީ މިދިޔަ މަހުގެ 26 ވަނަ ދުވަހުއެވެ. އެ ދުވަހުގެ އަޑުއެހުމުގައި ޕްރޮސެކިއުޓާ ޖެނެރަލްގެ ފަރާތުން ވަކީލުން ބައިވެރިވީ އޮންލައިން ކޮށެވެ. އަދި އޮންލައިންކޮށް އަޑުއެހުމުގައި ބައިވެރުވުމުގެ ސަބަބުން ބައެއް ޓެކްނިކަލް މައްސަލަތައް ދިމާވުމުން އެކަން ޕީޖީގެ ވަކީލުން އެ އަޑުއެހުމުގައި ވަނީ ހިއްސާ ކޮށްފައެވެ.
އެކަމާ ގުޅިގެން މައްސަލަ ބައްލަވާ ފަނޑިޔާރުންގެ ބެންޗުން ވިދާޅުވީ ދެން އޮންނަ އަޑުއެހުމެއްގައި ޕީޖީގެ ވަކީލުން ކޯޓަށް ހާޒިރުވެވަޑައިގަނެގެން ކުރިއަށް ގެންދިއުމަށާއި ދެން އަޑުއެހުމެއް ތާވަލް ކުރާނީ އެގޮތަށް ބަލައިގެން ކަމަށެވެ.
އެންމެ ފަހުން ބޭއްވި މި މައްސަލައިގެ އަޑު އެހުމުގައި ވަނީ މަނީ ލޯންޑާ ކުރަން ބޭނުންފުޅުވެ ވަަޑައިގެންނެވި ނަމަ ރާއްޖޭގެ ބޭންކެއްގައި އޮތް އަމިއްލަ އެކައުންޓަކަށް އެ ފައިސާ ޖަމާ ނުކުރައްވާނެ ކަމަށް ޔާމީން ވިދާޅުވި ނުކުތާއަށް ރައްދު ދިނުމުގެ ފުރުސަތު ދީފައެވެ. އެ ނުކުތާއަށް ރައްދު ދިނުމަށް ޕީޖީން ދޮޅު ގަޑިިރު ނަގާފައިވާ އިރު، މަނީ ލޯންޑަރިންގެ މަފުހޫމާ ގުޅޭ ގޮތުން ހުރި ބައިނަލްއަގުވާމީ ބައެއް ލިޔެކިޔުންތަކަށް ހަވާލާދެއްވަމުން ދައުލަތުގެ ވަކީލު އަހުމަދު ޝަފީއު ވިދާޅުވެފައި ވަނީ، އަމިއްލަ އެކައުންޓަކަށް ފައިސާ ޖަމާކޮށް އޭގެ ތެރެއަށް އެހެން ފައިސާ ވެސް ވެއްދުމުން އޭގެ އަސްލު އޮޅޭ ކަމަށެވެ.
ދައުލަތުން ޔާމީނުގެ މައްޗަށް ކޮށްފައިވާ ދައުވާގައި ވެސް ކްރިމިނަލް ކޯޓުން ޔާމީނަށް އިއްވި ހުކުމުގެ ރިޕޯޓުގައި ވެސް މަނީ ލޯންޑަރިންގެ އެ އުކުޅު ކިޔައިދީފައި ވެއެވެ. އެއީ ދެ ފަހަރު މަތިން ވަކިވަކިން އެ ފައިސާގެ ބައިބައި ޖަމާކޮށް، ކޮންމެ ފަހަރަކު އެ ފައިސާގެ ތެރެއަށް އިތުރު ފައިސާ ހިމަނައިގެން ޖަމާ ކުރުމެވެ
ދައުލަތުން ދެއްކި ވާހަކަތަކަށް ރައްދު ދޭން ޔާމީނަށް އަލުން ދިން ފުރުސަތުގައި. ޔާމީނު ރައްދު ދެއްވަމުން ވަނީ ކުރިން ދެއްކި ވާހަކަ ތަކުރާރު ކުރައްވާފައެވެ. އެމަނިކުފާނުގެ ނުކުތާއަކީ ބޭންކު އެކައުންޓަކަށް 200،000 ރުފިޔާއަށް ވުރެ މަތީ އަދަދެއް ޖަމާވެއްޖެ ނަމަ އެ ކަން އެމްއެމްއޭއަށް އެނގިގެން ބަލާނެ ކަމެވެ. އެހެންކަމުން ރާއްޖޭގައި އަމިއްލަ އެކައުންޓަކަށް ފައިސާ ދައުރުކޮށްގެން މަނީ ލޯންޑަ ކުރެވޭނެ އެއްވެސް ފުރުސަތެއް ނެތް ކަމަށް ޔާމީން ތަކުރާރުކޮށް ވިދާޅުވިއެވެ.
ޖަލު ހުކުމް ތަންފީޒް ކުރަމުން ދިޔަ ރައީސް ޔާމީން މިހާރު ހުންނެވި ގެކޮޅަށް ބަދަލު ކޮށްފައެވެ. އެމަނިކުފާނު ގެކޮޅަށް ބަދަލުކޮށްފައި ވަނީ ނިމި ދިޔަ ރިޔާސީ އިންތިހާބުން ކާމިޔާބުވެވަޑައިގެން ޑރ. މުހައްމަދު މުއިއްޒު އެކަމަށް އެދިވަޑައިގެން ގޮވާލެއްވުމުން މިދިޔަ އާދިއްތަ ދުވަހުގައެވެ.
