ފިރިހެނަކަށް ތޫނު އެއްޗަކުން ހަމަލާދިން މައްސަލާގައި އަންހެނަކު ފުލުހުންގެ ބެލުމުގެ ދަށަށް ގެންގޮސްފިއެވެ.
އެ ހާދިސާގެ ވީޑިއޯއެއް މިހާރު ދައުރުވަމުންދާއިރު "ޑްރީމްސް މޮބައިލް" ފިހާރާއިގެ ތެރެއަށް ބުރުގައި ނާޅާ ހުރި އަންހެނަކު ވަނީ ފޯނެއް ދެއްކުމަށް އެތަނުގައި ހުރި ސޭޓުގެ ގާތުގައި އެދިފައެވެ. އަދި ކައުންޓަރުގެ އަޑިން ނެގުމަށްފަހު ފޯނެއް ދެއްކާ މަންޒަރުވެސް އެ ވީޑިއޯއިން ފެނެއެވެ.
ޖެހުނީ ކޮން މައްސަލައެއް ކަން ސާފު ނުވި ނަމަވެސް ކޮންމެވެސް ކަމަކާ ނުރުހިގެން އަންހެން މީހާ ޒުވާބު ކުރާ މަންޒަރު ފެނިގެންދާއިރު އަންހެން މީހާ ވަނީ މީހަކު އާދޭތޯ ޔަގީންކުރުމަށްފަހު ސޭޓުގެ ކަރުގައި އޭނަގެ އަތުގައި އޮތް ވަޅި ދަމާލާފައެވެ. އަދި އެ ސޭޓުގެ ކަރުން ލޭ އަންނަ މަންޒަރުވެސް އެ ވީޑިއޯއިން ފެނެއެވެ.
އެ މައްސަލާގައި ފުލުހުން ބުނީ ތޫނު އެއްޗަކުން ހަމަލާ ދީފައިވާ މީހަކަށް އޭޑީކޭގައި ފަރުވާދެމުން ދާ ކަމަށް މިއަދު ހެނދުނު 11:02 ހާއިރު ރިޕޯޓްކޮށްފައިވާ ކަމަށެވެ.
އެ މައްސަލައާ ގުޅިގެން 29 އަހަރުގެ އަންހެނަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ އެ މައްސަލަ ފުލުހުން ދަނީ ތަހުގީގުކުރަމުން ކަމަށެވެ.
