ރިޔާސީ އިންތިހާބުގެ 2 ވަނަ ބުރުގައި ވޯޓުލީ ކަމުގެ ނިޝާން ޖަހާނީ ވާ އަތުގެ ކަށި އިނގިލީގައި ކަމަށް އިލެކްޝަންސް ކޮމިޝަނުން ބުނެފިއެވެ.
އަންނަ ހޮނިހިރު ދުވަހު ބޭއްވުމަށް ހަަމަޖެހިފައިވާ ރިޔާސީ އިންތިހާބުގެ 2 ވަނަ ބުރުގެ ވޯޓުލުން ކުރިއަށް ގެންދިއުމަށް ހަމަޖެހިފައި ވަނީ ހެނދުނު 8:00 އިން ހަވީރު 5:00އަށެވެ.
ރިޔާސީ އިންތިހާބުގެ ފުރަތަމަ ބުރުގައި އަށް ކެންޑިޑޭޓުން ވާދަކުރައްވާފައި ވާއިރު، ދެވަނަ ބުރަށް ގޮސްފައި ވަނީ އެމްޑީޕީގެ ރިޔާސީ ކެންޑިޑޭޓް ރަައީސުލްޖުމްހޫރިއްޔާ އިބްރާޙިމް މުހައްމަދު ސޯލިހާއި އިދިކޮޅު ޕީއެންސީގެ ކެންޑިޑޭޓް އަދި މާލެ ސިޓީގެ މޭޔަރު، ޑރ. މުހައްމަދު މުއިއްޒު އެވެ.
ރިޔާސީ އިންތިހާބުގެ މި ބުރުގައި ވޯޓުލުމުގެ ހައްގު ލިބިފައިވަނީ ޖުމްލަ 282،804 މީހުންނަށެވެ. އޭގެތެރޭގައި އަލަށް ވޯޓުލެވޭ 409 މީހުން ހިމެނެއެވެ. ވޯޓުލުމުގެ ހައްގު ލިބިފައިވާ ފަރާތްތަކުގެ ތެރެއިން މިދިޔަ ބުރުގައި ވޯޓު ލާފައި ވަނީ ގާތް ގަނޑަކަށް 80 ޕަސެންޓު މީހުންނެވެ.
އިންތިހާބުގެ މިބުރުގައި ޖުމްލަ 586 ވޯޓު ފޮށި ބެހެއްޓުމަށް ހަމަޖެހިފައި ވާއިރު އޭގެތެރޭގައި ހިމެނެނީ މާލެ ސަރަހައްދުގައި ބަހައްޓާ 187 ފޮށި، އަތޮޅުތެރޭގައި 319 ފޮށި، ރިސޯޓުތަކުގައި 65 ފޮށި، ރާއްޖޭ ބޭރުގައި 6 ފޮށި ޖަލުތަކުގައި 5 ފޮށީގެ އިތުރުން ސިނާއީ ސަރަހައްދުގައި ބަހައްޓުމަށް ހަމަޖެހިފައިވާ ވޯޓުފޮށްޓެކެވެ.
