ރިޔާސީ އިންތިހާބާ ގުޅިގެން އިލެކްޝަންސް ކޮމިޝަން (އީސީ) އަށް 62 މައްސަލައެއް ހުށަހަޅާފައިވާ ކަމަށް އެކޮމިޝަނުން ބުނެފިއެވެ.
އީސީން ބުނީ، ރިޔާސީ އިންތިހާބާ ގުޅިގެންއެ ކޮމިޝަނަށް ހުށަހެޅި 62 މައްސަލައިގެ ތެރެއިން ހަތަރު މައްސަލައެއް ހުށަހަޅާފައި ވަނީ ސިޔާސީ ޕާޓީތަކުން ކަމަށެވެ. އަދި 28 މައްސަލަ ހުށައަޅާފައިވަނީ ކާކުކަން ނޭނގޭގޮތަށް ކަމަށް އީސީން ބުނެއެވެ.
އީސީން ބުނީ ހުށަހެޅި މައްސަލަތަކުގެ ތެރެއިން އެކޮމިޝަނުގައި ރަޖިސްޓްރީ ކޮށްފައި ވަނީ 12 މައްސަލަ ކަމަށެވެ.
ރިޔާސީ އިންތިހާބުގެ ފުރަތަމަ ބުރުގައި ވޯޓުލުމުގެ ހައްގު 282,395 މީހުންނަށް ލިބުނުއިރު ދެވަނަ ބުރުގައި އަލަށް ވޯޓުލެވޭ 408 މީހުންނާއެކު ޖުމްލަ 282,803 މީހުންނަށް ވޯޓުލުމުގެ ހައްގު ލިބިގެންވެއެވެ. ރިޔާސީ އިންތިހާބުގެ ފުރަތަމަ ބުރުގައި ގިނަ ބަޔަކު ވޯޓުލާފައި ނުވާއިރު އިންތިހާބުގެ ދެވަނަ ބުރުގައި ވޯޓުލުމަށް 50،047 މީހުން ވަނީ ރީ-ރަޖިސްޓްރީ ވުމަށް ފޯމު ހުށަހާފައެވެ.
ދެ ވަނަ ބުރުގައި ވޯޓުލުމަށް އިތުރު 12 ވޯޓު ފޮށި ބަހައްޓަން އީސީން ނިންމާފައި ވާއިރު މާލޭގެ މީހުން ވޯޓު ލާން އިތުރު 3 ވޯޓު ފޮށި ބަހައްޓާނެ ކަމަށް އީސީން ބުނެއެވެ.
ވިލިމާލޭގައި ދިރިއުޅޭ އެހެން ރަށްރަށުގެ މީހުން ވޯޓު ލާން އިތުރު ވޯޓު ފޮށްޓެއް ވަނީ ބަހައްޓާފައެވެ. އަދީ ހުޅުމާލޭގައި ދިރިއުޅޭ އެހެން ރަށްރަށުގެ މީހުން ވޯޓު ލާން އިތުރު ހަތަރު ވޯޓު ފޮށްޓެއް ބަހައްޓާފައި ވާއިރު މާލޭގައި ދިރިއުޅޭ ހއ އާއި ށ. އަދި ލ. އަތޮޅުގެ މީހުން ވޯޓު ލާން ކޮންމެ އަތޮޅަކަށް އިތުރު ވޯޓު ފޮށްޓެއް ވަނި ބަހައްޓާފައެވެ.
މީގެއިތުރުން އިންޑިއާގައި ދިރިއުޅޭ ދިވެހިން ވޯޓުލާން ޓްރިވެންޑްރަމްގައި އިތުރު ވޯޓު ފޮށްޓެއް ވަނީ ބަހައްޓާފައެވެ.
