ބޮޑު އީދު ބަންދަށް ފަހު، ކުރީގެ ރައީސް އަދި އިދިކޮޅު ކެންޑިޑޭޓު އަބްދުﷲ ޔާމީންގެ ރިޔާސީ ކެމްޕެއިން ފަށާނެ ކަމަށް، އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިއަދު ބުނެފިއެވެ.
ޕީޕީއެމްގެ އޮފީހުގައި ނޫސްވެރިންނަށް މައުލޫމާތު ދެއްވަމުން ޔާމީންގެ ކެމްޕެއިން މެނޭޖަރު މުހައްމަދު އަމީން ވިދާޅުވީ، ކެމްޕެއިންގެ ހަރަކާތްތައް ފެށުމަށްޓަކައި ކުރަން ޖެހޭ އިދާރީ މަސައްކަތްތައް ނިމިފައިވާ ކަމަށެވެ. އޭނާ ވިދާޅުވި ގޮތުގައި ޔާމީންގެ ކެމްޕެއިން ހަރަކާތްތައް ކުރިއަށް ދާނީ ލާމަރުކަޒުކޮށް، ދާއިރާތަކުގެ ލެވަލްގައެވެ.
މީގެ ކުރިން ޔާމީންގެ ކެމްޕެއިންގެ ހަރަކާތްތައް ރަމަޟާން މަސް ނިމުމަށް ފަހު ޝައްވާލް މަހުގެ ހަ ރޯދަ ނިމުމުން ފަށާނެ ކަމަށް އިދިކޮޅުން ބުނި ނަމަވެސް، އިދިކޮޅުން އެކަން އިއުލާނުކުރިތާ ދެ މަސްދުވަސް ވީއެވެ. ކުރިއަށް އޮތް ރިޔާސީ އިންތިހާބުގައި ވާދަކުރައްވާ ކެންޑިޑޭޓުން ކެމްޕެއިނާގެން ފޯރީގައި އުޅުއްވި ނަމަވެސް، އެންމެ ބޮޑު އިދިކޮޅު ޕާޓީގެ ފަރާތުން ފެންނަނީ ހަމަހިމޭންކަމެވެ.
އެކަމާ ގުޅިގެން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އަމީން ވިދާޅުވީ، 2018 ގައި ވެސް ކަންތައްތައް ދިޔައީ މި އުސޫލުން ކަމަށާއި، ބޮޑު އިންތިހާބަކަށް ވަރުގަދަ ކެމްޕެއިނެއް ކުރުމަށްޓަކައި ދެ މަސްދުވަހަކީ ކުޑަ މުއްދަތެއް ކަމަށެވެ. ކެމްޕެއިން ހަރަކާތެއް ފެށުމުގެ ކުރިން އިދާރީ މަސައްކަތްތައް ނިންމަން ޖެހޭ ކަން ފާހަގަކުރައްވައި އިދިކޮޅުން ކެމްޕެއިން ހަރަކާތްތައް ފެށުން ލަސް ކަމަކަށް އޭނާ ގަބޫލެއް ނުކުރައްވައެވެ.
ބަޖެޓު ވެސް ހުންނާނެ، އަޅުގަނޑުމެން މި ކެމްޕެއިން ރަން ކުރަންވާ މިންގަނޑަށް އެކަންތައްތައް ކުރުމުގެ ހުރިހާ ވަސީލަތްތައް ވެސް ހުންނާނެ،"
ޔާމީންގެ ޑެޕިއުޓީ ކެމްޕެއިން މެނޭޖަރު އަދި ކުރީގެ ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވީ، ޔާމީންގެ ކެމްޕެެއިނަށް އާންމުން ތިބީ ކެތްމަދުވެފައިވާ ކަމަށާއި، އެކަން އުފަލާ އެކު ބަލައިގަންނަ ކަމަށެވެ. އޭގެން ދޭހަވަނީ އާންމުން އެ ތިބީ ޔާމީންގެ ވެރިކަމެއް ގާއިމްކުރުމަށްޓަކައި ލަސްވެފައި ކަމަށާއި އެކަން އިދިކޮޅުން ޕޮޒިޓިވްކޮށް ނަގާ ކަމަށެވެ.
މީގެ ކުރިން އިދިކޮޅު ކޯލިޝަނުން ބޭއްވި ޕްރެސް ކޮންފަރެންސެއްގައި އެ ކޯލިޝަން ވަގުތީގޮތުން ހިންގުމާ ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، މެނިފެސްޓޯ އެކުލަވާލުމުގެ މަސައްކަތް ވެސް ކުރިއަށްދާ ކަމަށާއި، ރަމަޟާން މަސް ނިމި، ހަ ރޯދަ އަށް ފަހު ކެމްޕެއިން ހަރަކާތްތައް ފަށާނެ ކަމަށެވެ. އެކަމަކު ޔާމީންގެ ކެމްޕެއިން ހަރަކާތްތައް ފަށާނެ ސީދާ ތާރީހެއް އޭނާ އޭރު ނުދެއްވިއެވެ.
