ހިއުމަން ރައިޓްސް ކޮމިޝަން (އެޗްއާރްސީއެމް)ގައި އޮތީ ސިޔާސީ ނުފޫޒު ކަމަށާއި ކޮމިޝަންގެ މެންބަރުން ވަކިކުރަން ރައްޔިތުންގެ މަޖިލީހަށް ހުށަހަޅާނެ ކަމަށް އިދިކޮޅުން ބުނެފިއެވެ.
އިދިކޮޅުން އެޗްއާރްސީއެމް އަށް ގޮސްފައި ވަނީ ރ. ފުއްގިރި ކުއްޔަށް ދިނުމާ ގުޅޭ މުއާމަލާތާ ގުޅޭގޮތުން ރައީސް ޔާމީންގެ މައްޗަށް ކޮށްފައިވާ ދައުވާތަކާ ގުޅިގެން ކުރިމިނަލް ކޯޓުގައި މިހާރު ކުރިއަގެންދާ ޝަރީއަތްތައް ކޮންމެ ދުވަހަކު ބާއްވާތީއާއި ގިނައިރުތަކެއް ވަންދެން ޝަރީއަތްތައް ކުރިއަށް ގެންދާތީ އެކަމާ ކަންބޮޑުވުން ފާޅުކުރެއްވުމަށެވެ.
ދެ ދުވަހުގެ މަތިން އެޗްއާރުސީއެމްގެ މެމްބަރުންނާ ބައްދަލުކުރަން މަސައްކަތްކޮށް މިއަދު ހެނދުނު ވަނީ އެ ބައްދަލުވުން ބާއްވައިފައެވެ. އެ ބައްދަލުވުމަށް ފަހު ނޫސްވެރިންނަށް ދިން އިންޓަވިއުގައި ޕީއެންސީގެ ނައިބު ރައީސް އަދި މާވަށު ދާއިރާގެ މެމްބަރު މުހައްމަދު ސައީދު ވިދާޅުވީ، މިދިޔަ ހޯމަ ދުވަހު އޮތް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ޝަރީއަތުގެ އަޑުއެހުމުގައި ކަންކަން ކޮށްފައިވަނީ އެމަނިކުފާނުގެ ހައްގުތަކެއް ނިގުޅައިގަނެވޭގޮތަށް ކަމަށް އެޗްއާރްސީއެމްއިންވެސް ގަބޫލު ކުރާ ކަމަށެވެ.
ޕީއެންސީގެ ނައިބު ރައީސް އަދި ހުޅުމާލޭ ކައުންސިލަރު އިބްރާހިމް ޝުޖާއު ވިދާޅުވީ، މިކަމުން އެނގިގެން ދަނީ ހުރިހާ މުއައްސަސާތަކެއްގައި ސަރުކާރުން ތަޅުއަޅުވާފައިވާ ކަމަށާއި މުއައްސަސާތަކުގެ ބާރު މި ސަރުކާރުން ކަނޑުވާލާފައިވާ ކަމަށެވެ.
އެޗްއާރުސީއެމްގައި އޮތީ ސިޔާސީ ނުފޫޒު ކަމަށާއި ކޮމިޝަންގެ މެންބަރުން ވަކިކުރަން ރައްޔިތުންގެ މަޖިލީހަށް ހުށަހަޅާނެ ކަމަށް އިދިކޮޅުން މިއަދު ވަނީ ބުނެފައެވެ.
އެޗްއާރްސީއެމްގެ މެންބަރުން އިދިކޮޅު ބޭފުޅުންނާ ބައްދަލުކުރައްވާފައި މިވަނީ ޕީޕީއެމް އާއި ޕީއެންސީގެ މަޖިލިސް މެންބަރުން އިއްޔެ އެޗްއާރްސީއެމަށް ވަޑައިގެންނެވުމުން އެޗްއާރްސީއެމްގެ މެންބަރުން އެ ބޭފުޅުންނާ ބައްދަލުނުކުރެއްވި ކަމަށް އިދިކޮޅު މަޖިލިސް މެންބަރުން ވިދާޅުވެފައި ވަނިކޮށެވެ.
އިދިކޮޅު މަޖިލިސް މެންބަރުން އިއްޔެ އެޗްއާރްސީއެމްއަށް ވަޑައިގެންނެވި ގޮތަށް އެތަނުގައި ފަސް ގަޑިއިރު މަޑުކުރެއްވި އެވެ. އެކަމަކު އެޗްއާރްސީއެމްގެ މެންބަރުން ބައްދަލުނުކުރެއްވުމުން އެ މެންބަރުންގެ އިސްތިއުފާއަށް ވެސް އިދިކޮޅު ކޯލިޝަނުން ގޮވާލި އެވެ.
އެޗްއާރްސީއެމް އިން އިއްޔެ ނެރުނު ބަޔާނެއްގައި ބުނެފައިވަނީ އިދިކޮޅު ކޯލިޝަންގެ މަޖިލިސް މެންބަރުންނާ އިއްޔެ ބައްދަލުނުވީ އެބޭފުޅުންނާ ބައްދަލުކުރަން ހަމަޖައްސައިދިން އެޕޮއިންޓްމަންޓްގައިވާ ގަޑިއަށް ވަޑައިނުގަތުމުން ކަމަށެވެ.
ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވުމާ ގުޅިގެން ޔާމީނަށް ވަނީ އެ ދެ މައްސަލައިގައި 11 އަހަރުގެ ޖަލު ހުކުމެއް މިދިޔަ ޑިސެމްބަރު މަހުގެ 25 ގައި އިއްވާފައެވެ. އޭގެ ދެ މަސް ފަހުން ކުއްލި ގޮތަކަށް ކުރިމިނަލް ކޯޓުން ވަނީ 52.6 މިލިއަން ރުފިޔާ ހަ މަސް ދުވަހުގެ ތެރޭގައި ދައުލަތަށް ދެއްކުމަށް ޔާމީންގެ މައްޗަށް އަމުރު ކުރި ނަމަވެސް އެ އަމުރު ހައި ކޯޓުގައި އިސްތިއުނާފު ކުރުމުން ހައިކޯޓުން ވަނީ ބާތިލު ކޮށްފައެވެ.
މީގެ އިތުރުން ކްރިމިނަލް ކޯޓުން އިއްވި 11 އަހަރުގެ ޖަލު ހުކުމުގެ އިސްތިއުނާފް މައްސަލަ ވެސް މިހާރު ވަނީ ހައިކޯޓަށް ބަލައިގެންފައެވެ.
