ފުއްގިރި ކުއްޔަށް ދިނުމުގައި ހިންގާފައިވާ ކަމަށް ތުހުމަތު ކުރެވޭ ހިޔާނާތުގެ މައްސަލައިގެ ފުލުހުންގެ ތަހުގީގު ފައިލްތައް އެ މައްސަލާގައި ދައުވާކޮށްފައިވާ ފަރާތްތަކަށް ދޫކޮށްދިނުމަށް ކްރިމިނަލް ކޯޓުން އަމުރުކޮށްފިއެވެ.
ފުއްގިރި މައްސަލައިގައި ޔާމީންގެ މައްޗަށް ދައުލަތުން ކޮށްފައި ވަނީ މަނީ ލޯންޑަރިންނާއި ރިޝްވަތު ހިފުމުގެ ދައުވާއެވެ. އަދި މި މައްސަލައިގައި ދައުލަތުން ވަނީ މަގާމުގެ ނުފޫޒު ބޭނުން ކުރައްވައިގެން މއ. ކުރިކީލަހިޔާ އަހްމަދު ރިޒާ "ކްރިކް ރިޒާ" މެދުވެރިކޮށް ރިޝްވަތުގެ ގޮތުގައި 1.12 މިލިއަން ޑޮލަރު ހޯއްދަވައި، އެ ފައިސާ ސަން ސިޔާމްގެ ދެ ކުންފުނި މެދުވެރިކޮށް ލޯންޑާ ކުރެއްވި ކަމުގެ ތުހުމަތު ޔާމީންގެ މައްޗަށް ކޮށްފައެވެ.
އެ މައްސަލާގައި މިއަދު ބޭއްވި އަޑުއެހުމުގައި ޔާމީނުގެ ވަކީލު ވިދާޅުވީ، ޔާމީނުގެ ފަރާތުން ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ސުޕްރީމް ކޯޓަށް ހުށައެޅުއްވި މައްސަލައިގެ ނިންމުމުގައި މައްސަލައާ ގުޅޭ ތަހުގީގުގެ ފައިލްތައް ލިބިދޭންޖެހޭ ކަމަށް ބަޔާންކޮށްފައިވާ ކަމަށާއި، ހެކިބަސް ނެގުމުގެ މަރުޙަލާގެ ކުރިން އެ ފައިލްގައިވާ ލިއުންތައް ދިފާއުން ބަލަން ބޭނުންވާ ކަމަށެވެ.
މީގެ އިތުރުން ގުޅުންހުރި ހެކިތަކާ ގުޅޭގޮތުން ސުޕްރީމް ކޯޓުން ފާހަގަކޮށްފައިވާ ކަންކަން ވަޒަން ކުރަން ދިފާއަށް އެނގޭނީވެސް އެ ލިއުންތައް ލިބިގެން ކަމަށާއި، ފައިލް ލިބުމުން، ހެކިތަކާ ގުޅޭގޮތުން ދިފާއުން އިތުރު ކަންކަން ބޭނުންވާ ކަމަށް ޔާމީނުގެ ވަކީލު ވިދާޅުވިއެވެ.
އެ މައްސަލަ ބައްލަވާ ގާޒީ އަލީ ނަދީމް ނިންމެވީ ޝަރީއަތުގެ މަރުހަލާ ފެށުމަށްފަހު ވެސް އެ ލިޔުންތައް ބެލުމުގެ ފުރުސަތު ދެވިދާނެ ކަމަށެވެ. އަދި ފަސް ދުވަސް ތެރޭގައި އެ ފައިލްތައް ދައުލަތުން ހޯދުމަށްފަހު ފައިލްތަކުގެ އަސްލު ހިފައިގެން ކޯޓަށް ހާޒިރުވާން ގާޒީ އެންގެވިއެވެ.
ކްރިކް ރިޒާގެ ވަކީލުވެސް ވިދާޅުވީ، މައްސަލައިގެ ފައިލް ބަލަން ބޭނުންވާކަމަށް ބަޔާންކޮށް އެ ފަރާތުންވެސް ޕީޖީ އޮފީހަށް ސިޓީ ހުށައަޅާފައިވާ ކަމަށެވެ. ނަމަވެސް އަދި އެ ސިޓީއަށް ޖަވާބެއް ލިބިފައިނުވާ ކަމަށް އޭނާ ވިދާޅުވިއެވެ
އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، ސުޕްރީމް ކޯޓުގެ ގަޒިއްޔާއަށް ބަލާއިރު، ހެކި ހާމަ ކުރަން އެދޭ ހާލަތުގައި ދައުލަތަށް އެ ޒިންމާ އޮންނާނީ ޝަރީއަތުގެ ކުރީގެ ހުށައެޅުމެއް ގޮތުގައި ހުށައެޅުމުންކަމަށް އެ ނުކުތާއާއި ގުޅިގެން އަންނަ ނުކުތާތައް އެއްކޮށް ކިއުމުން އެނގޭ ކަމަށެވެ. މިހާރު ޝަރީއަތުގެ ކުރީގެ މަރުޙަލާގައި ހިނގަން ޖެހޭ ކަމަކަށް ޝަރީއަތުގެ މަރުޙަލާގައި އަލުން ރުޖޫއަވެވެން ނޯންނާނެކަމަށް ދައުލަތުގެ ވަކީލު ވިދާޅުވިއެވެ.
މިއަދު ހެކިބަސް ނެގުމަށް ތާވަލުކޮށް، ބައެއް ހެކިންނަށް ނޯޓިސްދީ ކޯޓަށް ހާޒިރުކޮށްފައިވީ ނަމަވެސް ހެކިތަކާ ގުޅޭ ގޮތުން އިއުތިރާޒުގެ ހުށަހެޅުންތައް ވެސް ހުރުމުންނާއި މައްސަލައިގެ ތަހުގީގު ފައިލްތައް ދޭން ދިފާއުން އެދިފައިވާތީ ހެކިބަސް ކުރިއަށް ގެންދާނީ އެ މަރުހަލާތަކަށް ފަހު ކަމަށް ގާޒީ ވިދާޅުވިއެވެ.
ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވުމާ ގުޅިގެން ޔާމީނަށް ވަނީ އެ ދެ މައްސަލައިގައި 11 އަހަރުގެ ޖަލު ހުކުމެއް މިދިޔަ ޑިސެމްބަރު މަހުގެ 25 ގައި އިއްވާފައެވެ. އޭގެ ދެ މަސް ފަހުން ކުއްލި ގޮތަކަށް ކުރިމިނަލް ކޯޓުން ވަނީ 52.6 މިލިއަން ރުފިޔާ ހަ މަސް ދުވަހުގެ ތެރޭގައި ދައުލަތަށް ދެއްކުމަށް ޔާމީންގެ މައްޗަށް އަމުރު ކުރި ނަމަވެސް އެ އަމުރު ހައި ކޯޓުގައި އިސްތިއުނާފު ކުރުމުން ހައިކޯޓުން ވަނީ ބާތިލު ކޮށްފައެވެ.
މީގެ އިތުރުން ކްރިމިނަލް ކޯޓުން އިއްވި 11 އަހަރުގެ ޖަލު ހުކުމުގެ އިސްތިއުނާފް މައްސަލަ ވެސް މިހާރު ވަނީ ހައިކޯޓަށް ބަލައިގެންފައެވެ.
އަމިއްލަ އެކައުންޓުގައި ހުރި މިލިޔަން މިލޔަން ޑޮލަރަކީ ހެކި ކަމުގައި ނުފުދޭހެއްޔެވެ؟ އެއީ ޔާމީނުގެ މުސާރައެއް ނޫނީ ވިޔަފާރިކޮއްގެން ލިބިފައި ހުރި ފައިސާއެއް ނޫނެވެ. މާލޭގެ އެންމެ ބޮޑުމަގުން ގޯއްޗެއް ގަނެ ގަޑުވަރެއް އަޅަމުން އެދަނީ ހެތްކެއް ނޫން ހެއްޔެވެ؟ އެވަރުން އެއީ ދިވެހިންގެ ފައިސާކަން ސާބިތު ނުވޭ ހެއްޔެވެ؟