ރ. ފުއްގިރި ކުއްޔަށް ދިނުމުގެ މުއާމަލާތުގައި ކުރީގެ ރައީސް އަބްދުﷲ ޔާމީން މަނީ ލޯންޑާ ކުރައްވާފައިވާ މައްސަލައިގައި ދައުލަތުން ހުށަހަޅާފައިވާ ހެކިތަކާ ގުޅޭ ގޮތުން ކްރިމިނަލް ކޯޓުން ކަނޑައަޅާފައިވާ ނިންމުންތަކުގެ އިސްތިއުނާފުގެ ހުކުމް ކުރުމަށް މިއަދު ތާވަލުކުރާ ގޮތަށް އޮތް ނަމަވެސް ހުކުމް ކުރުން އެހެން ދުވަހަކަށް ފަސްވެއްޖެއެވެ.
ސްޕްރީމް ކޯޓުން ސަބަބު ހާމަކޮށްފައެއް ނުވެއެވެ.
ފުއްގިރި މައްސަލައިގައި ޔާމީންގެ މައްޗަށް ދައުލަތުން ކޮށްފައި ވަނީ މަނީ ލޯންޑަރިންނާއި ރިޝްވަތު ހިފުމުގެ ދައުވާއެވެ. އަދި މި މައްސަލައިގައި ދައުލަތުން ވަނީ މަގާމުގެ ނުފޫޒު ބޭނުން ކުރައްވައިގެން މއ. ކުރިކީލަހިޔާ އަހްމަދު ރިޒާ "ކްރިކް ރިޒާ" މެދުވެރިކޮށް ރިޝްވަތުގެ ގޮތުގައި 1.12 މިލިއަން ޑޮލަރު ހޯއްދަވައި، އެ ފައިސާ ސަން ސިޔާމްގެ ދެ ކުންފުނި މެދުވެރިކޮށް ލޯންޑާ ކުރެއްވި ކަމުގެ ތުހުމަތު ޔާމީންގެ މައްޗަށް ކޮށްފައެވެ.
މިމައްސަލައިގެ މިމަހު 8 ވަނަ ދުވަހު ސުޕްރީމް ކޯޓުގައި ކުރިއަށް ގެންދިޔަ އަޑުއެހުން ނިންމާލަމުން ޝަރީއަތުގެ މަޖިލީހުގެ ރިޔާސަތު ބެއްލެހެއްޓެވި ފަނޑިޔާރު ހުސްނުއް ސުއޫދު ވިދާޅުވީ އިސްތިއުނާފީ މައްސަލައިގެ އަޑުއެހުންތައް ނިމުނީ ކަމަށެވެ. އަދި މިއަދު މައްސަލައިގެ ހުކުމް ކުރެވޭނެ ކަމަށް އުންމީދު ކުރައްވާ ކަމުގައެވެ. ނަމަވެސް, ސުޕްރީމް ކޯޓުގެ މިއަދުގެ އެ މައްސަލަ ތާވަލުކޮށްފައެއް ނުވެއެވެ.
ސުޕްރީމް ކޯޓަށް ހުކުމް ކުރުމަށް ގާނޫނުން ލިބޭ މުއްދަތު ބުރާސްފަތި ދުވަހު ހަމަވާނެއެވެ.
އެންމެ ފަހުން ސުޕްރީމް ކޯޓުގައި އަޑުއެހުން ކުރިއަށް ގެންގޮސްފައި ވަނީ މި މައްސަލައިގެ ހެކިބަސް ނެގުމުގެ މަރުހަލާއެވެ. މިމަހު 7 ވަނަ ދުވަހު ސުޕްރީމް ކޯޓުގައި ކުރިއަށް ގެންދިޔަ އަޑުއެހުމުގައި ރ. ފުއްގިރި ކުއްޔަށް ދިން މައްސަލައިގައި ރައީސް ޔާމީންގެ މައްޗަށް ކޮށްފައިވާ ދައުވާތަކުގެ މައްސަލައިގެ ޝަރީއަތް ކްރިމިނަލް ކޯޓުން މަޑުޖައްސާލަން ސުޕްރީމް ކޯޓުން ވަނީ އަމުރެއް ނެރެފައެވެ. އަދި މިމަހު 8 ވަނަ ދުވަހުން ފެށިގެން މިއަދުގެ ނިޔަލަށް އެ މައްސަލަ މަޑުޖައްސާލަން ސުޕްރީމް ކޯޓުން އަމުރުކުރީ، އެ މައްސަލައިގެ ޝަރީއަތުގެ ބައެއް ނިންމުންތައް ސުޕްރީމް ކޯޓުގައި ޔާމީން އިސްތިއުނާފު ކުރައްވާފައި ވާތީ އެ މައްސަލަ ނިމެންދެންނެވެ.
ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވުމާ ގުޅިގެން ޔާމީނަށް ވަނީ އެ ދެ މައްސަލައިގައި 11 އަހަރުގެ ޖަލު ހުކުމެއް މިދިޔަ ޑިސެމްބަރު މަހުގެ 25 ގައި އިއްވާފައެވެ. އޭގެ ދެ މަސް ފަހުން ކުއްލި ގޮތަކަށް ކުރިމިނަލް ކޯޓުން ވަނީ 52.6 މިލިއަން ރުފިޔާ ހަ މަސް ދުވަހުގެ ތެރޭގައި ދައުލަތަށް ދެއްކުމަށް ޔާމީންގެ މައްޗަށް އަމުރު ކުރި ނަމަވެސް އެ އަމުރު ހައި ކޯޓުގައި އިސްތިއުނާފު ކުރުމުން ހައިކޯޓުން ވަނީ ބާތިލު ކޮށްފައެވެ.
މީގެ އިތުރުން ކްރިމިނަލް ކޯޓުން އިއްވި 11 އަހަރުގެ ޖަލު ހުކުމުގެ އިސްތިއުނާފް މައްސަލަ ވެސް މިހާރު ވަނީ ހައިކޯޓަށް ބަލައިގެންފައެވެ.
