އިޒްރޭލުގެ ސަރުކާރާ ދެކޮޅަށް މަގުމަތީގައި މުޒާހަރާކުރަމުންދާ ގުރޫޕަކުން އެ ގައުމުގެ އިކޮނޮމިކް މިނިސްޓަރު ނީރް ބަރްކަތަށް ހަމަލާދީފިއެވެ.
އިޒްރޭލުގެ ފުލުހުންނާ ހަވާލާދީ މީޑިއާތަކުން ބުނީ ނީރް ބަރްކަތަށް ހަމަލާދީފައި ވަނީ، ވެރިރަށް ތެލްއަވީވްގެ ރެސްޓޯރަންޓަކުން ނުކުމެ ކާރަށް އަރަނިކޮށެވެ.
މި ހަމަލާގައި ނީރް ބަރްކަތަށް އެއްވެސް އަނިޔާއެއް ލިބިފައި ނުވާއިރު އޭނާގެ ހަށިފާރަވެރިއެއްގެ އިތުރުން ފުލުހަކަށް އަނިޔާވެފައި ވާކަމަށް މީޑިއާ ރިޕޯޓްތައް ވަނީ ބުނެފައެވެ. މި ހަމަލާގައި އަނިޔާވި ފުލުސް މީހާއަށް ހޮސްޕިޓަލުގައި ފަރުވާދެމުން އަންނައިރު މި ހަމަލާ އާއި ގުޅިގެން މިހާތަނަށް ދެމީހަކު ވަނީ ހައްޔަރުކޮށްފައެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ސަރުކާރުން އެ ގައުމުގެ ޝަރުއީ ނިޒާމު އިސްލާހުކުރުމަށް ހުށަހަޅާފައިވާ ބިލާ ދެކޮޅަށް އެގައުމުގައި މުޒާހަރާކުރަމުން އަންނައިރު މި ބިލަށް ތާއިދުކުރާ މީހުންވެސް އަންނަނީ މަގުމައްޗަށް ނިކުމެ ސަރުކާރަށް ތާއިދުކުރާކަން ހާމަކުރަމުންނެވެ. މި ގޮތުން މިދިޔަ ހަފްތާގެ ބުރާސްފަތި ދުވަހު އެކަނިވެސް އެ ގައުމުގެ 200،000 މީހުން ވަނީ ސަރުކާރަށް ތާއިދު ކުރާކަން ހާމަކުރުމަށް މަޖިލީސް ކުރާ ގޭގެ ކުރިމައްޗަށް އެއްވެފައެވެ.
ސަރުކާރުގެ ބިލަށް ތާއިދުކުރާ މީހުންނާއި މި ބިލާ ދެކޮޅު މީހުން، އިޒްރޭލުގެ މަގުމައްޗަށް ނިކުމެ ހިންގަމުންދާ ކުރިމަތިލުންތައް ކޮންޓްރޯލް ކުރުމަށް ފުލުހުންނަށްވެސް ގިނަ ގޮންޖެހުންތަކެއް ވަނީ ކުރިމަތި ވެފައެވެ.
