ޕްލޭނިން މިނިސްޓްރީގެ ބަދަލުގައި، ބިން ދޫކުރާ ފަރާތުން ބިން ދޫކުރާ މުއްދަތު އިހްތިޔާރު ކުރުމުގެ ފުރުސަތު ދީ، ދިރިއުޅުމުގެ ބޭނުމަށް ނޫން އެހެނިހެން ބޭނުންތަކަށް ދޫކުރާ ބިން ކުއްޔަށް ދޫކުރުމުގެ ގަވައިދު އިސްލާހު ކޮށްފިއެވެ.
ޖުލައި 2018 ގައި ގެޒެޓްކުރި އެ ގަވައިދުގެ 11 ވަނަ މާއްދާގެ (ހ) އާއި (ށ) ގައިވާ ގޮތުން:
- އެ ގަވައިދުގެ ދަށުން ދޫކުރާ ބިމުގެ މުއްދަތު އިތުރުކުރުމަށް، ބިން ދޫކޮށްފައިވާ މުއްދަތު ހަމަވުމުގެ ކުރިން ބިމާ ހަވާލުވި ފަރާތުން ހުށަހަޅައިފިނަމަ، އެ މުއްދަތުގެ 50 ޕަސެންޓަށް އިތުރު ނުވާނެ ހެން ބިމުގެ މުއްދަތު އިތުރުކޮށްދިނުމުގެ އިހްތިޔާރު ޕްލޭނިން މިނިސްޓްރީ އަށް ލިބިގެންވޭ
- ބިމުގެ މުއްދަތު މިނިސްޓްރީން އެގޮތަށް އިތުރުކޮށްދޭނީ މުއްދަތު އިތުރުކުރުމަށް ހުށަހެޅި ސަބަބުތަކަށް ރިއާޔަތްކޮށް، އެސެސްމަންޓެއް ވެސް ހެދުމަށް ފަހު
- ބިމުގެ މުއްދަތު އިތުރުކުރެވޭނީ އެންމެ ފަހަރަކު
ޕްލޭނިން މިނިސްޓްރީން ވަނީ އެ އަކުރުތަކަށް ގެނައި އިސްލާހު ގެޒެޓުގައި ޝާއިއުކޮށްފައެވެ. އެގޮތުން، ބިމުގެ މުއްދަތު އިތުރުކުރުމުގެ އިހްތިޔާރު ޕްލޭނިން މިނިސްޓްރީގައި އޮތް އޮތުން ވަނީ ބިން ދޫކުރާ ފަރާތުގެ އަތް މައްޗަށް ބަދަލުކޮށްފައެވެ.
އޭގެ އިތުރުން، އެ ގަވައިދުގެ ފަސްވަނަ މާއްދާގެ ދަށުން ބިން ދޫކުރާނަމަ، ބީލަމުގެ އުސޫލުން ބިން ކުއްޔަށް ދޫކުރުމަށް ކުރާ އިއުލާނުގައި އެ މާއްދާގެ ދަށުން މުއްދަތު އިތުރުކުރެވޭނެ އެންމެ ގިނަ މިންވަރު ބަޔާންކުރަން ޖެހޭ ގޮތަށް ވެސް ވަނީ އެ ގަވައިދު އިސްލާހުކޮށްފައެވެ.
އެހެންކަމުން އެ ގަވައިދު މިއަދު ގެޒެޓުކުރުމުން، މިއަދުން ފެށިގެން އެ ގަވައިދަށް އަމަލުކުރަން ޖެހޭނެ ކަމަށް ވެސް، ގެނައި އިސްލާހުގައި ވެއެވެ.
