އުމުރާއަށް ފުރާ މީހުން ގިނަވުމުގެ ސަބަބުން ވެލާނާ އިންޓަނޭޝަނަލް އެއާޕޯޓް (ވީއައިއޭ) ވަރަށް ބޮޑަށް ތޮއްޖެހިފައިވާ ކަމަށް އެމްއޭސީއެލްއިން ބުނެފިއެވެ.
އެކަމާ ގުޅިގެން އެމްއޭސީއެލްއިން ބުނީ އުމްރާގެ އަޅުކަން އަދާކުރާ މީހުންގެ އަދަދު ގިނަވުމުގެ ސަބަބުން ޑިޕާޗާ އޭރިއާގައި ފަސިންޖަރުންނާއި އެމީހުންގެ ގާތް ތިމާގެ މީހުން ގިނަވެ ތޮއްޖެހިފައިވާ ކަމަށެވެ.
އެމްއޭސީއެލްގެ ޓީމުން ހުރިހާ އެންމެންނަށް ވެސް ފަސޭހަކަމާ އެކު އޮޕަރޭޝަންތައް ކުރިއަށް ގެންދިއުމަށް މަސައްކަތް ކުރަމުން އަންނަ ކަމަށް ވަނީ ބުނެފައެވެ. އަދި އެފަދަ ދަނޑިވަޅުގައި ދިމާވެދާނެ ގޮންޖެހުމަކަށް ކެތްތެރިވެ އެއްބާރުލުން ދިނުމަށްވެސްވެސް އެމްއޭސީއެލްއިން އެދިފައިވެއެވެ.
ރޯދަ މަހުގެ ފަހު ދިހައާ ދިމާކޮށް ރާއްޖެއިން ގިނަ އަދަދެއްގެ ބަޔަކު އަންނަނީ އުމުރާއަށް ފުރަމުންނެވެ. އަދި ގިނަ އަދަދެއްގެ ގުރޫޕްތަކުން ގިނަ އަދަދެއްގެ ބަޔަކު އުމްރާއަށް ފުރަމުންދާ މި ދަނޑިވަޅުގައި ސަފާ ހައްޖު އެންޑް އުމުރާ ގުރޫޕުން މިއަހަރުގެ ރަމަޟާން މަހުގެ އުމްރާ ދަތުރު، އެންމެ ފަހު ވަގުތު ވަނީ ކެންސަލްކޮށްފައެވެ.
އެ ގުރޫޕުން އުމުރާ ދަތުރު ކެންސަލްކޮށްފައިވަނީ ސައުދީން ވިސާ ހަމަ ނުޖެހޭ ކަމަށް ބުނެއެވެ. މިއަދު ހެނދުނު އުމްރާއަށް ފުރަން ހުރިހާ ކަމެއް ހަމަޖެހިފައިވީ ނަމަވެސް އަދި ވެސް ސައުދީން ވިސާ ދޫކޮށްފައި ނުވާ ކަމަށް ބުނެ ސަފާ ގުރޫޕުން ވަނީ ވައިބާ މެދުވެރިކޮށް ދަތުރުގެ ބައިވެރިންނަށް މެސެޖެއް ފޮނުވާފައެވެ.
