މީގެ ދެ އަހަރު ކުރިން، ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލައާ ގުޅިގެން ލިބުނު ނުރައްކާތެރި ޒަހަމްތަކާ އެކު، އެމަނިކުފާނު އަވަހާރަނުވީ ހަމަ ކިރިޔާއެވެ. ރާއްޖޭގައި އެމަނިކުފާނަށް ފަރުވާ ދިނުމަށް ފަހު، އަދި ބޭރަށް ވަޑައިގެން ފަރުވާ ހޯއްދެވުމަށް އެމަނިކުފާނަށް ވަނީ އެ ދުވަހު މަޖުބޫރުވެވަޑައިގެންފައެވެ.
ނަޝީދަށް އަމާޒުކޮށް ދިން ހަމަލައާ ގުޅިގެން، އެމަނިކުފާނުގެ ސެކިއުރިޓީ ފެއިލްވި ކަމަށް ބުނެ، ސިފައިންނަށް އަދި ސިފައިންގެ ކަންކަމާ ހަވާލުވެ ހުންނެވި ޑިފެންސް މިނިސްޓަރު މާރިޔާ އަހްމަދު ދީދީ އަށް ބޮޑެތި ފާޑުކިއުންތައް އަމާޒުވެގެން ދިޔައެވެ. އެ ހަމަލައަކީ ޓެރަރިސްޓު ހަމަލައެއްގެ ގޮތުގައި ގިނަ މީހުން ސިފަކުރެއެވެ. އަދި އެމަނިކުފާނަށް އިންސާފު ހޯދައިދިނުމަށްޓަކައި ވެސް ގިނަ ބަޔަކު ދިޔައީ ގޮވާލަމުންނެވެ. އެއަށްފަހު ނަޝީދުގެ ސެކިއުރިޓީ ވަނީ ވަރުގަދަކޮށްފައެވެ.
ރޭގެ ވަގުތެއްގައި އެވޯޑު ހަފްލާއެއް ނިންމަވާލައްވައި ރައީސް އިބްރާހީމް މުހައްމަދު ސޯލިހު ހުޅުމާލޭން މާލެ އަށް ވަޑައިގަންނަވައި، މުލީއާގެ އަށް ވަޑައިގަންނަވަން އެމަނިކުފާނުގެ މޮޓޯކޭޑް މިސްރާބު ޖެހީ ބޮޑުތަކުރުފާނު މަގުން ދިއުމަށެވެ. ކަން ދިމާކުރި ގޮތުން އެމަނިކުފާނުގެ މޮޓޯކޭޑަށް ވަދެވުނީ އިދިކޮޅު ޕްރޮގްރެސިވް ކޮންގްރެސް ކޯލިޝަނުން އެ ކޯލިޝަންގެ އިދާރާގެ ކުރިމަތީގައި އަޑުއުފުލަމުން ދިޔަ ދަނޑިވަޅުގައެވެ.
އިދިކޮޅުން ކުރަމުން އައި އިހްތިޖާޖުގެ ތެރެއަށް މޮޓޯކޭޑަށް ވަދެވުމާ އެކު، އިހްތިޖާޖުގެ ބައިވެރިން ވަނީ ރައީސްގެ މޮޓޯކޭޑާ ދިމާލަށް މިސްރާބު ޖަހައި، ރައީސްގެ ކާރުކޮޅު ވަށާލައިފައެވެ. ރައީސްގެ ކާރުކޮޅު ވަށާލައި ބައެއް ބައިވެރިން އަޑުއުފުލަމުން ދިޔަ މަންޒަރު ހިމެނޭ ވީޑިއޯ އެއް ސޯޝަލް މީޑިއާގައި މިހާރު ދަނީ ދައުރުވަމުންނެވެ. ބައެއް މީޑިއާތަކާ ހަވާލާދީ އިދިކޮޅު ކޯލިޝަންގައި ހިމެނޭ ޕީޕީއެމްގެ ކައުންސިލް މެންބަރަކު ބުނި ގޮތުގައި، އެ ސަރަހައްދުގައި 15 މިނެޓު ވަންދެން ރައީސްގެ މޮޓޯކޭޑް ތާށިވެފައި އޮތެވެ.
ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި މޮޓޯކޭޑު އެ ސަރަހައްދުގައި 15 ވަރަކަށް މިނެޓު ތާށިވި އިރު ކާރުކޮޅަށް ކުރިއަށް ދެވޭ ގޮތް ނުވުމުން އަނބުރާލުމަށް ފަހު ވަޑައިގަތީ ބޮޑުތަކުރުފާނުގެ މަގުގެ ދެކުނަށެވެ. އޭރުވެސް މުޒާހަރާގެ ބައިވެރިން ޕީޕީއެމްގެ ދިދަތަކާއެކު މަގު މައްޗަށް ފެތުރިގެން ދިޔައީ ހުރަސް އަޅަމުންނެވެ.
މުޒާހަރާގެ ބައިވެރިން ރައީސް ސޯލިހް އިންނެވި ކާރުކޮޅު ކައިރިއަށް ގޮސް ޕީޕީއެމްގެ ދިދަ ވިހުރުވާ ހަދާފައިވެއެވެ. އަދި އެމީހުން ފަހަތައް ޖެއްސުމަށް ރައީސްގެ ސެކިއުރިޓީން ހަރަކާތްތެރި ވެފައި ވާއިރު ރައީސްގެ އިސްތިއުފާ އަށް ގޮވާ ހަދާފައިވެސް ވެއެވެ.
ރޭ އާންމުވި ވީޑިއޯއަކުން ފެންނަ ގޮތުން، އިހްތިޖާޖުކުރަމުން ދިޔަ އިދިކޮޅުގެ ސަޕޯޓަރުން ރައީސްގެ ކާރުކޮޅު ވަށާލައި، ހިޔާލު ފާޅުކުރަމުން ދިޔައެވެ. އަދި ވަކި ހިސާބަކުން ފުލުހުން އެ ސަރަހައްދަށް އައިސް އިހްތިޖާޖުގެ ބައިވެރިން ދުރަށް ޖައްސާ މަންޒަރު ވެސް ފެނެއެވެ. ނަމަވެސް އެކަން ކާމިޔާބުވާ ގޮތެއް ނުވިއެވެ. އެކަމަކު ވީޑިއޯ އަށް ބަލާލާއިރު، އިހްތިޖާޖުގެ ބައިވެރިން ހުއްޓުވުމަށް ފުލުހުން މާ ބޮޑު މަސައްކަތެއް ކުރި މަންޒަރެއް ނުފެނެއެވެ.
ރައީސްގެ މޮޓޯކޭޑަށް ހުރަސްއެޅި މައްސަލައިގައި އެމްޑީޕީގެ ބައެއް ސަޕޯޓަރުން ވަނީ މިއީ ޓެރަރިޒަމްގެ އަމަލެއްގެ ގޮތުގައި ސިފަކޮށްފައެވެ. އެ މައްސަލަ ބަލައި ފިޔަވަޅު އެޅުމަށް ސޯޝަލް މީޑިއާގައި އެ މީހުން ދިޔައީ ގޮވާލަމުންނެވެ. އޭގެ ތެރެއިން ވެސް ޓްވިޓާގައި ހިޔާލު ފާޅުކުރި އިތުރު މީހަކު ވަނީ ފުލުހުންނާއި ސިފައިންގެ ހިދުމަތްތަކާ ހަވާލުވެ ތިއްބެވި ދެ މިނިސްޓަރުންނާއި އެ ދެ މުއައްސަސާގެ އިސްވެރިން އިސްތިއުފާ ދިނުމަށް ގޮވާލައިފައެވެ.
ބައެއް މީހުންނަށް މައްސަލައަކަށްވީ އިހްތިޖާޖު ކުރިއަށް ދިޔަ ވަގުތު ރައީސްގެ މޮޓޯކޭޑް އެ ސަރަހައްދުން ދާން މަސައްކަތްކުރުމުންނެވެ. އިދިކޮޅު ޕީޕީއެމުން ތުހުމަތުކުރާ ގޮތުގައި މިކަން ކޮށްފައި ވަނީ ރޭވުމެއްގެ ދަށުންނެވެ. އެ މައްސަލައިގައި ނައިފަރު ދާއިރާގެ މެންބަރު އަހްމަދު ޝިޔާމް ހައްޔަރުކުރިއިރު އޭނާ އެ އިހްތިޖާޖު ލީޑުކުރި ކަމަށް ތުހުމަތުކޮށް ހައްޔަރުކުރީ ޝިޔާމް އެ ސަރަހައްދުގައި ވެސް ނެތް ވަގުތެއްގައި ކަމަށާއި، އެކަން ކުރީ ރައީސްގެ ސެކިއުރިޓީ ފެއިލްވުމުން، އެކަމުގެ ޒިންމާ އިން ރެކެން ބަހަނާ އެއް ދެއްކުމަށް ކަމަށް ޕީޕީއެމުން ތުހުމަތުކުރެއެވެ.
ރައީސްގެ ސެކިއުރިޓީ ބްރީޗްވެފައިވާ ކަމަށާއި، އަނެއްކާ ވެސް މިފަދަ ކަމެއް ހިނގާފައިވާއިރު، މި ކަމުގައި ޒިންމާ ނަގާނީ ކޮން ފަރާތަކުންތޯ ވެސް ބައެއް ފަރާތްތަކުން ވަނީ ސުވާލު އުފައްދައިފައެވެ.
މިއީ ރާއްޖޭގެ ވެރިކަމުގައި ހުންނެވި ބޭފުޅެއްގެ މޮޓޯކޭޑަކަށް ހުރަސް އެޅި ފުރަތަމަ ފަހަރެވެ. އަދި ރައީސްގެ ސެކިއުރިޓީ މިކަހަލަ ގޮތަކަށް ބްރީޗްވެގެން ދިޔަ ފުރަތަމަ ފަހަރެވެ.
ރޭގެ އިހްތިޖާޖުން 22 މީހަކު ހައްޔަރުކުރި ނަމަވެސް، ރައީސްގެ މޮޓޯކޭޑަށް ހުރަސްއެޅި މައްސަލައިގައި ހައްޔަރުކުރީ ހަތަރު މީހުންނެވެ. އެ މައްސަލަ ބަލާނެ ކަމަށް ބުނުން ފިޔަވައި އިތުރު ތަފްސީލެއް ފުލުހުން ވެސް އަދި ސިފައިން ވެސް ނުދެއެވެ. އެ މައްސަލައިގައި ޑިފެންސް މިނިސްޓަރު މާރިޔާ އަހްމަދު ދީދީ އާއި ހޯމް މިނިސްޓަރު އިމްރާން އަބްދުﷲ، އަދި ރައީސް އޮފީހުގެ ސްޕޯކްސްޕާސަން މިއުވާން މުހައްމަދަށް ގުޅުމުން ފޯނަށް ޖަވާބު ދެއްވާފައެއް ނުވެއެވެ.
