ހުޅުމާލޭގައި ގާއިމް ކޮށްފައިވާ ބައެއް މެކޭނިކަލް ޕާކިންގް ސިސްޓަމްތައް ބަލަހައްޓާ، ހިންގާނެ ފަރާތެއް ހޯދުމަށް ހައުސިންގް ޑިވަލޮޕްމަންޓް ކޯޕަރޭޝަން (އެޗްޑީސީ) އިން އިއުލާން ކޮށްފިއެވެ.
އެޗްޑީސީން އިއުލާން ކޮށްފައި ވަނީ، ހުޅުމާލެ ފުރަތަމަ ފިޔަވަހީގައި ކާރު ޕާކް ކުރެވޭ ގޮތަށް ފަރުމާކޮށްފައި ހުރި 6 ޕާކިން ސިސްޓަމު ހިންގާ އަދި ބަލަހައްޓާނެ ފަރާތެއް ހޯދުމަށެވެ. އެގޮތުން އެކަމަށް ޝައުގުވެރިކަން ހުރި ފަރާތްތަކުން، އެކްސްޕްރެޝަން އޮފް އިންޓަރެސްޓް (އީއައިއޯ) ހުށަހެޅުމަށް ވަނީ ހުޅުވާލާފައެވެ.
އެގޮތުން ޕާކިންގް ސިސްޓަމްތަކުގެ މައުލޫމާތު ފޯރުކޮށްދިނުން މާދަމާ ހެނދުނު 10:30 ގައި ޒޫމް މީޓިންގް މެދުވެރިކޮށް އޮންނާނެ ކަމަށް އެޗްޑީސީން މައުލޫމާތު ދިނެވެ.
އަދި ޕާކިން ސިސްޓަމް އާ ގުޅޭ އިތުރު މައުލޫމާތެއް އޮވެއްޖެނަމަ، މި މަހުގެ 23 ވަނަދު ދުވަހުގެ 14:00ގެ ކުރިން އީމެއިލް މެދުވެރިކޮށް މައުލޫމާތު ސާފު ކުރުމުގެ ފުރުސަތު ވަނީ ހުޅުވާލާފައެވެ. އަދި ހުށަހެޅި މައުލޫމާތު، ސާފު ކޮށްދިނުން މިމަހުގެ 27 ވަނަ ދުވަހު، އޮންނާނެ ކަމަށް ކޯޕަރޭޝަނުން ބުންޏެވެ.
އެއަށްފަހު ޕްރޮޕޯސަލް ހުށަހަޅަން ބޭނުންވާ ފަރާތްތަކުން އޭޕްރީލް 3 ވަނަ ދުވަހުގެ 13:00 އާއި 14:00އާ ދެމެދު ޕްރޮޕޯސަލް ހުށަހެޅުމަށް ވަނީ އެދިފައެވެ. އަދި ޕްރޮޕޯސަލް ހުޅުވުން ހަމަ އެދުވަހުގެ 14:00 ގައި އޮންނާނެ ކަމަށް އެ ކޯޕަރޭޝަނުން މައުލޫމާތު ދިނެވެ.
ބަލަހައްޓަން ޖެހޭ ޕާކިން ސިސްޓަމްތަކުގެ ތެރޭގައި އެޗްޑީސީން އިއުލާން ކޮށްފައިވަނީ:
- ބޯގަންވިލާ މަގުގައި ހުރި ތިން ޕާކިން ސިސްޓަމް
- ނިރޮޅުމަގުގައި ހުރި ދެ ޕާކިން ސިސްޓަމް ގެ އިތުރުން
- ކަނީރުމަގުގައި ހުރި ޕާކިން ސިސްޓަމެވެ.
މި ޕާކިން ސިސްޓަމްތަކަކީ ދުއްވާ އެއްޗެހި ގިނަވެ، ޕާކްކުރާނެ ޖާގަ ނެތުމުން އެކަމަށް ހައްލެއް ގެނައުމަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ހެދި ޕާކިން ސިސްޓަމްތަކެކެވެ.
