ރައީސުލްޖުމްހޫރިއްޔާގެ މަގާމުގައި މިހާރު ހުންނެވީ ކޮން ބޭފުޅެއްކަން ކަށަވަރު ކުރުމަށް އިދިކޮޅު ޕީޕީއެމް ގެ ފަރާތުން ސުޕްރީމް ކޯޓަށް މައްސަލައެއް ހުށަހެޅި މައްސަލަ ބޭރުކޮށްލައިފިއެވެ.

ރައީސް އިބްރާހީމް މުހައްމަދު ސޯލިހު ސިންގަޕޫރުގައި ކުރެއްވި ތައިރޮއިޑް އޮޕަރޭޝަނަކަށް އެމަނިކުފާނު ހޭފުޅުނައްތަން ޖެހުމާ ގުޅިގެން ވަގުތީ ގޮތުން ރައީސުލްޖުމްހޫރިއްޔާގެ މަގާމާ ނައިބުރައީސް ފައިސަލް ނަސީމް ވަނީ ހަވާލުވެވަޑައިގަންފައެވެ.

ފެބްރުއަރީ 25، 2022 ހެނދުނު 6:00 ގައި ނައިބު ރައީސްއާ ޒިންމާތައް ހަވާލުކުރެއްވުމަށް ފަހު ރައީސް އަލުން ޒިންމާތަކާ ހަވާލުވެވަޑައިގަތީ އެ ދުވަހުގެ ހެނދުނު 9:30 ގައެވެ.

އެ މައްސަލަ ދުސްތޫރީ މައްސަލައެއްގެ ގޮތުގައި ކޯޓަށް ހުށަހެޅީ ފައިސަލް ރައީސްކަމުގެ ހުވާކުރެއްވި ހިސާބުން ރައީސަކީ ފައިސަލް ކަމަށާއި ރައީސްކަމުގެ މަގާމުން ރައީސް ސޯލިހް ވަނީ ވަކިވެފައި ކަމަށް ބުނެއެވެ.

އިދިކޮޅުގެ ގާނޫނީ ވަކީލުންގެ ޓީމަކުން މައްސަލަ ހުށަހެޅުމަށް ފަހު ނޫސްވެރިންނަށް ވިދާޅުވެފައިވަނީ ރައީސުލްޖުމްހޫރިއްޔާއަށް ޒިންމާތައް އަދާނުކުރެއްވޭ ހާލަތެއް މެދުވެރިގެން އެކަން ރައްޔިތުންގެ މަޖިލީހުގެ ރައީސަށް އެންގެވުމުން ފައިސަލް ރައީސް ކަމުގެ ހުވާ ކުރެއްވުމުން ރައީސް ސޯލިހަށް މަގާމުގައި މިހާރު ހުންނެވޭނެ ގާނޫނީ އެއްވެސް ހުއްޖަތެއް ނެތް ކަމަށެވެ.

ވަކީލުން އިތުރަށް ވިދާޅުވީ މި މައްސަލައަކީ ރާއްޖޭގެ އާންމު މަސްލަހަތާ ގުޅިފައިވާ މައްސަލައެއް ކަމަށާއި، ދިވެހިންނަށް ރައީސުލްޖުމްހޫރިއްޔާ އަކީ ކޮންބޭފުޅެއްކަން އޮޅިފައިވާ ކަމަށެވެ. އަސްލަކީ އެންމެ ފަހުން ހުވާކުރެއްވި ބޭފުޅަކީ ރައީސްކަމަށް ބެލުންކަމަށްވެސް ވަކީލުން ވިދާޅުވިއެވެ.

މީގެ ކުރިން ވެސް މި މައްސަލަ ސުޕްރީމް ކޯޓަށް ހުށަހަޅާފައިވާއިރު އެ ކޯޓުން މި މައްސަލަ ބަލައިގެންފައެއް ނުވެއެވެ.

ހަބަރު ސްޕްރީމް ކޯޓް ޕީޕީއެމް