ހުޅުލޭގެ އިރުއުތުރު ފަރާތުގައި އަޅާފައިވާ ކަނޑު އުޅަނދުތައް އަންނަ ބުރާސްފަތި ދުވަހުގެ ކުރިން ނެގުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އަންގައިފިއެވެ.
އެމްއޭސީއެލުން ބުނީ ހުޅުލޭގެ އިރުއުތުރު ފަރާތުގައި ހުޅުލެއާއި ހުޅުމާލޭގެ ފަޅު ވަކި ކުރުމަށްޓަކައި، ވޯޓާ ފެންސް ޖެހުމަށް ހަރުކޮށްފައިވާ އޮރެންޖު ބޮއި ސަރަހައްދުގައި އަޅައިފައިވާ ކަނޑު އުޅަދުތައް ނެގުމަށް އަންގާފައިވަނީ އެ ސަރަހައްދުގައި ޕައިލިން މަސައްކަތް ކުރުމަށް ކަމަށެވެ.
މީގެ އިތުރުން އެމްއޭސީއެލުން އަންގާފައިވަނީ އެ ސަރަހައްދުގައި އަޅާފައިވާ އޮރެންޖު ބޮއި އިން ފެށިގެން އުތުރަށް (ހުޅުމާލެ ފަޅިއަށް) 20 މީޓަރު ނުވަތަ 65 ފޫޓުގެ ދުރުމިނުގައި ކަނޑު އުޅަނދު ފަހަރުތައް ބެހެއްޓުމަށެވެ. މިގޮތަށް އެ ކުންފުނިން އަންގާފައިވަނީ ކަނޑު އުޅަދު ފަހަރުގެ ރައްކާތެރިކަމަށްޓަކައެވެ.
އެ ސަރަހައްދަށް ވަންނަ އެއްވެސް ކަނޑު އުޅަނދު ފަހަރުތަކަށް ލިބޭ ގެއްލުމުގެ ޒިންމާ ނުނަގާނެ ކަމަށްވެސް އެ ކުންފުނިން ވަނީ ބުނެފައެވެ. އަދި މި މަހުގެ 10 ވާ ހުކުރު ދުވަހުން ފެށިގެން އެ ސަރަހައްދުގައި އަޅާފައިވާ ކަނޑު އުޅަނދުތައް ފުލުހުން ނަގާނެއެވެ.
