ރާއްޖޭގެ މައި އެއާޕޯޓް ހިންގާ އެމްއޭސީއެލުން އެއާ ޓްރެފިކް ކޮންޓްރޯލް ސެންޓަރު ލައިސަންސްގެ ދެ ކޯހެއް އަންގާރަ ދުވަހު ފަށައިފިއެވެ.
އެމްއޭސީއެލުން ބުނީ، ޖުމްލަ 12 ދަރިވަރުންނާ އެކު، ގާތްގަނޑަކަށް ދެ މަސްދުވަހުގެ މުއްދަތަކަށް ކުރިއަށް ގެންދާ ގޮތަށް ދެ ކޯހެއް ފަށާފައިވާ ކަމަށެވެ. އެ ދެ ކޯހަކީ:
- އޭރިއާ ކޮންޓްރޯލް ޕްރޮސީޖަރަލް ކޯސް (އައިކާއޯ 055)
- އެޕްރޯޗް ކޮންޓްރޯލް ޕްރޮސީޖަރަލް ކޯސް (އައިކާއޯ 053)
އޭޕްރިލް 17 ގެ ނިޔަލަށް ކުރިއަށް ގެންދާ ދެ ކޯހުގެ ތެރެއިން ކޮންމެ ކޯހެއްގައި ވެސް ހަ ދަރިވަރުން ބައިވެރިވެފައިވާ ކަމަށް، އެމްއޭސީއެލުން ބުނެއެވެ.
އެ ކުންފުނިން ބުނި ގޮތުގައި، ތަމްރީނުތައް ހަރުދަނާ ގޮތެއްގައި ކުރިއަށް ގެންދިއުމުގެ ގޮތުން ބައިނަލްއަގުވާމީ ޓްރެއިނަރުންނާއި ދިވެހި ޓްރެއިނަރުންގެ ޓީމަކުން ދަރިވަރުންނަށް ތަމްރީނުތައް ދޭނެއެވެ.
އެއާ ޓްރެފިކް ކޮންޓްރޯލްގެ އެ ދެ ކޯހުގެ ސަބަބުން އެމްއޭސީއެލްގެ ހިދުމަތްތައް ހަރުދަނާވެގެން ދާނެ ކަމަށާއި، ހިދުމަތްތައް ފުޅާވެގެން ދާނެ ކަމަށް، އެ ކުންފުނިން ބުންޏެވެ.
ރާއްޖޭގެ ފުރަތަމަ އެއާ ޓްރެފިކް ކޮންޓްރޯލް ޓަވަރު ސިމިއުލޭޓަރު ހުޅުވާފައިވަނީ ވެލާނާ އެއާޕޯޓުގައި 2021 ވަނަ އަހަރުގައެވެ. އެ ސިމިއުލޭޓަރުގެ ސަބަބުން އެއާ ޓްރެފިކް ކޮންޓްރޯލަރުން ތަމްރީނުކުރެވި، ގަވައިދުން ހަދަން ޖެހޭ ރިފްރެޝާ ޓްރެއިނިން ހެދުމުގައި ބޮޑު އެހީއަކަށް އެ ސިމިއުލޭޓަރު ވެފައިވާ ކަމަށް އެމްއޭސީއެލުން މައުލޫމާތުދެއެވެ.
އެމްއޭސީއެލުން ބުނީ، މިދިޔަ އަންގާރަ ދުވަހު ފެށި ދެ ކޯހުގެ ސަބަބުން އެ ކުންފުންޏަށް ބޮޑު ކުރިއެރުމެއް ލިބިއްޖެ ކަމަށެވެ.
