ހަފްތާ ބަންދު ދެ ދުވަސް ފިޔަވައި ކޮންމެ ދުވަހަކު، ރ. ފުއްގިރި ކުއްޔަށް ދިން މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ކުރާ ދައުވާގެ މައްސަލައިގައި ހެކިބަސް ނެގުމުގެ އަޑުއެހުންތައް ބާއްވަން ނިންމުމުން، ޔާމީންގެ ވަކީލުން ކަންބޮޑުވުން ފާޅުކުރައްވައިފިއެވެ.
އެމްއެމްޕީއާރުސީ މެދުވެރިކޮށް ފުއްގިރި ކުއްޔަށް ދިން މައްސަލައިގައި ޔާމީންގެ މައްޗަށް މަނީ ލޯންޑަރިންނާއި ރިޝްވަތު ގަބޫލުކުރުމުގެ ދައުވާ އުފުލާފައި ވަނީ އެމަނިކުފާނު ރިޝްވަތުގެ ގޮތުގައި 1.1 މިލިއަން ރުފިޔާ ހޯދައި، އެ ފައިސާ ލޯންޑާކުރި ކަމަށް ބުނެއެވެ. ޔާމީންގެ އިތުރުން އެ މައްސަލައިގައި ދެން ދައުވާ އުފުލާފައިވަނީ:
- ސަންގެ ދެ ކުންފުންޏަށް (މަނީ ލޯންޑަރިންގެ ދައުވާ)
- އަހްމަދު ކްރިކް ރިޒާ، މ. ކުރިކީލަހިޔާ (ރިޝްވަތު ހިފުމުގައި މެދުވެރިއަކަށް ވުމުގެ ދައުވާ)
މިއަދު ބޭއްވި އަޑުއެހުމުގައި މައްސަލަ ބައްލަވާ ގާޒީ އަލީ ނަދީމް ވަނީ ކުރީގެ ހުށަހެޅުންތަކާ މެދު ގޮތް ނިންމަވައި، އިބްތިދާއީ މަރުހަލާ ނިންމަވާލައްވާފައެވެ. ގާޒީ ވިދާޅުވީ އަންނަ މަހުގެ ނުވަވަނަ ދުވަހު ޝަރީއަތް ފަށައި، ހެކިބަސް ނެގުމުގެ އަޑުއެހުންތައް ޖިނާއީ އިޖުރާއަތުގެ ގާނޫނު ތަސައްވަރުކުރާ ގޮތަށް ބާއްވަން ގަސްދުކުރައްވާ ކަމަށެވެ.
ގާޒީ ނަދީމް ވިދާޅުވީ:
- ހަފްތާ ބަންދު ފިޔަވައި ހުރިހާ ދުވަހެއްގައި ހެކިބަސް ނެގުމުގެ އަޑުއެހުންތައް ބާއްވަން ގަސްދުކުރައްވާ ކަމަށް
- އަންނަ މަހު 9 ގައި އިފްތިތާހީ ބަޔާން ވަކިވަކިން އިއްވުމަށް އަޑުއެހުން ބާއްވާނެ ކަމަށް
- ހެކިބަސް ނެގުމުގެ މަރުހަލާ ކުރިއަށް ދާނީ 12 ވަނަ ދުވަހުން ފެށިގެން 30 ގެ ނިޔަލަށް ކަމަށް
އެންމެ ވަކީލަކަށް ވެސް އަޑުއެހުމުގައި ބައިވެރިވެވޭ ނަމަ، ބާއްވަން ގަސްދުކުރައްވާ ކަމަށް ނަދީމް ވިދާޅުވިއެވެ.
އަވަސްކޮށްގެން ޝަރީއަތް ކުރިއަށް ގެންދަންޏާ ހައްގުތަކެއް ގެއްލޭނެ
ގާޒީގެ ނިންމެވުންތަކާ ގުޅިގެން ކަންބޮޑުވުން ފާޅުކުރައްވައި ޔާމީންގެ ވަކީލު ޑރ. މުހައްމަދު ޖަމީލް އަހްމަދު ވިދާޅުވީ، ޔާމީންގެ ފަރާތުން ހައިކޯޓުގައި އިސްތިއުނާފުކުރާ އާރަށުގެ މައްސަލަ އޮތް އިރު، ކޮންމެ ދުވަހަކު އަޑުއެހުންތައް ބޭއްވުމުގެ ސަބަބުން ވަކީލުންނަށް އުނދަގޫވާނެ ކަމަށެވެ. ޖަމީލް ވިދާޅުވި ގޮތުގައި:
- މައްސަލަ ތާވަލުކުރަން އެދެނީ ތައްޔާރުވާން އެކަށީގެންވާ ވަގުތު ލިބޭ ގޮތަށް
- ނޫނީ އަވަސްކޮށްގެން ކުރިއަށް ގެންދާއިރު ހައްގުތަކެއް ގެއްލިގެން ދާނެ
ކްރިކް ރިޒާގެ ވަކީލު ހަމްޒާ ލަތީފް ވިދާޅުވި ގޮތުގައި، ގާޒީ ނަދީމްގެ ސެކްޝަންގައި މައްސަލަތަކެއް ނުނިމި ހުއްޓާ ފުއްގިރީގެ މައްސަލަ ވަކިން ހާއްސަކޮށް އަވަހަށް ގެންދާ ނަމަ، އާންމުންގެ މެދުގައި ސުވާލުތައް އުފެދޭނެއެވެ. އޭނާ އެދިވަޑައިގަތީ އެހެން މައްސަލަތަކެކޭ އެއްގޮތަށް އެއް އިންތިޒާމަކުން ފުއްގިރީގެ މައްސަލަ ކުރިއަށް ގެންދިއުމަށެވެ.
އެކަމާ ގުޅިގެން ސުވާލު އުފައްދަވައި، ސަން އިންވެސްޓްމެންޓުގެ ވަކީލު އަލީ ޝާހު ވަނީ ޖެހިޖެހިގެން އަޑުއެހުންތައް ބާއްވަން ނިންމެވި ނިންމެވުން މުރާޖައާކޮށްދިނުމަށް ގާޒީގެ އަރިހުގައި އެދިވަޑައިގެންފައެވެ. ވަކީލުންގެ އެހެން މައްސަލަތައް ހުރިކަން ފާހަގަކުރައްވައި އޭނާ ވިދާޅުވީ، އިބްތިދާއީ މަރުހަލާގައި ނިންމި ބައެއް ނިންމުންތައް އިސްތިއުނާފްކުރަން ބޭނުންވާ ކަމަށެވެ.
މައްސަލަ އަވަސް އަރުވާލެވޭ ކަމަށް ގާޒީއަކަށް ގަބޫލެއް ނުކުރެވޭ
ވަކީލުންގެ ވާހަކަތަކާ ގުޅިގެން ގާޒީ ވިދާޅުވީ، އޭނާގެ ސެކްޝަނުން އަމަލުކުރަނީ ހުރިހާ މައްސަލަ އެއް ވެސް ޖެހިޖެހިގެން ގެންދަން ތާވަލުކުރާ ގޮތަށް ކަމަށެވެ. ނަމަވެސް އެކި ސަބަބުތަކާ ހުރެ މައްސަލަތައް މަޑުޖެހޭ ކަމަށް އޭނާ ވިދާޅުވިއެވެ. ގާޒީ ވިދާޅުވި ގޮތުގައި:
- މަސައްކަތްކުރައްވަނީ މައްސަލަތައް އަވަހަށް ކުރިއަށް ގެންދަވަން
- ތިން މަސް ފަހުން ޝަރީއަތް ފެށޭއިރު އަވަސް އަރުވާލެވޭ ކަމަކަށް ގަބޫލެއް ނުކުރެވޭ
- މި މައްސަލަ ކޯޓަށް ވައްދާފައި ވަނީ 2020 ގައި
ވަކީލުންގެ ވާހަކަތަކާ ގުޅިގެން ތާވަލަށް ބަދަލުތަކެއް ނަދީމް ގެންނެވިއެވެ. އެގޮތުން:
- އަންނަ މަހު 9 ގައި ސަންގެ ދެ ކުންފުނިން އިފްތިތާހީ ބަޔާން އިއްވާ ގޮތަށް
- 12 ވަނަ ދުވަހު ރިޒާގެ ފަރާތުން އިފްތިތާހީ ބަޔާން އިއްވާ ގޮތަށް
- 13 ވަނަ ދުވަހު ޔާމީންގެ ފަރާތުން އިފްތިތާހީ ބަޔާން އިއްވާ ގޮތަށް
އެއަށް ފަހު އެ މަހުގެ 16، 20، 22، 26، 27، 28، 29، އަދި 30 ގައި ހެކިބަސް ނެގުމުގެ އަޑުއެހުންތައް ބާއްވާނެ ކަމަށް ގާޒީ ވިދާޅުވިއެވެ. އެގޮތަށް ބަދަލު ގެނައުމުން ވެސް ޖަމީލް ކަންބޮޑުވުން ފާޅުކުރެއްވި ނަމަވެސް، ތާވަލަށް އިތުރު ބަދަލެއް ނުގެންނަވައި ގާޒީ އެދިވަޑައިގަތީ ކަންބޮޑުވުންތައް ލިޔުމުން ހުށަހެޅުއްވުމަށެވެ.
ޔާމީން ބޭނުންފުޅުނަމަ އޮންލައިންކޮށް ޝަރީއަތުގައި ބައިވެރިވެވޭނެ
ޝަރީއަތް ކުރިއަށް ގެންދާނީ ހުރިހާ ފަރާތަކުން ކޯޓަށް ހާޒިރުވާ ގޮތަށް ކަމަށް ގާޒީ ވިދާޅުވިއެވެ. އެކަމަކު ކޮންމެ ދުވަހަކު މާފުށިން މާލެ އަށް ވަޑައިގަންނަވަން ޔާމީނަށް އުނދަގޫވެވަޑައިގެންފާނެތީ، އެމަނިކުފާނު ބޭނުންފުޅު ނަމަ އޮންލައިންކޮށް ބައިވެރިވެވޭނެ ކަމަށް ވެސް ގާޒީ ވިދާޅުވިއެވެ.
ޔާމީންގެ ފަރާތުން ވަނީ ޝަރީއަތުގެ މަރުހަލާ ފެށުމުން، ޝަރީއަތް ލައިވްކުރަން އެދިވަޑައިގެންފައެވެ. އެކަމާ މެދު އަދި ވަކިގޮތެއް ނުނިންމައެވެ. ޔާމީންގެ މައްޗަށް މީގެ ކުރިން އުފުލާފައިވާ އާރަށުގެ މައްސަލަ އާއި ވޮޑަމުލާ މައްސަލައިގެ ޝަރީއަތްތައް ވަނީ ލައިވްކޮށްފައެވެ.
ޔާމީންގެ މައްޗަށް މިދިޔަ ޑިސެމްބަރު 25 ގައި ވަނީ ވ. އާރަށް ކުއްޔަށް ދިން މައްސަލައިގައި 11 އަހަރުގެ ޖަލު ހުކުމެއް އިއްވާފައެވެ. އެ ހުކުމް ހައިކޯޓުގައި އިސްތިއުނާފުކުރުމަށް ޔާމީންގެ ވަކީލުން ގެންދަވަނީ މަސައްކަތް ކުރައްވަމުންނެވެ.
ކުރިއަށް އޮތް އިންތިހާބުގައި އިދިކޮޅު ކޯލިޝަންގެ ފަރާތުން ވާދަކުރައްވާ ޔާމީންގެ މައްޗަށް އާރަށުގެ މައްސަލައިގައި ކުރި ހުކުމާ ގުޅިގެން އިންތިހާބުގައި އެމަނިކުފާނަށް ވާދަކުރެއްވުމުގެ ފުރުސަތު ކުޑައެވެ. ޔާމީނަށް އޮތް ހަމައެކަނި ގޮތަކީ އެ ހުކުމް އިސްތިއުނާފުވެފެން މިނިވަންވުމެވެ. ފުއްގިރި މައްސަލަ ސާބިތުވެއްޖެ ނަމަ އެ ހުކުމް ބާތިލްކުރަން ވެސް ޖެހޭނެއެވެ.
